وبلىستىق تاريحي-ولكەتانۋ مۇراجايىندا 100 جىلدىق تاريحى بار كونە قامزول ساقتاۋلى تۇر. وتكەن عاسىردىڭ جيىرماسىنشى جىلدارى سايىن دالانى شارپىپ وتكەن كامپەسكەلەۋ ناۋقانىندا كەزىندە قارابالىق وڭىرىندەگى سارىوي بولىسىن باسقارعان بەرمۇحامەد الدياروۆتىڭ وتباسىنان الىنعان قىزىل قامزولدىڭ سىرى كەتسە دە, سىنى كەتە قويماعانى كورىنىپ تۇر.
ءحىح عاسىردىڭ سوڭى, حح عاسىردىڭ باسىندا اۋقاتتى اۋلەتتەن شىققان ايەل ادامدار كيگەن قىمبات كيىمنىڭ وقالى ورنەگى مەن ءسان-سالتاناتى كەيىنگى كەزدە حالىقارالىق ءسان كورمەلەرىنىڭ تورىنەن ءجيى كورىنىپ, الەم جۇرتشىلىعىن تامساندىرىپ جۇرگەن قازاقتىڭ ءسان كيىمدەرىنىڭ ەشقايسىسىنان كەم تۇسپەيتىنى قايران قالدىرادى.
قامزولدى بك(ب)پ قوستاناي گۋبكومى بايلاردىڭ مۇلكىن تاركىلەۋ ناۋقانى دۇرىلدەپ تۇرعان 1928 جىلى مۋزەيگە تاپسىرعان.
«تۇرمىستاعى باي ايەلدەرگە ارنالعان مۇنداي جەڭسىز سىرت كيىمدى مىقىننان تۇسەتىندەي ۇزىن قىلىپ بارقىتتان نەمەسە اتلاس ءتارىزدى قىمبات ماتادان تىككەن. تۇمار رەتىندە ويىعىن, قامزولدىڭ تومەنگى قاپتالى مەن ەتەگىن جىبەك نەمەسە مەتالل جىپتەرمەن زەرلەگەن. بۇل قامزول قىزىل بارقىتتان تىگىلگەن, سىرتقى بەتى التىن جىپتەرمەن وسىمدىك تۇرىندەگى ورنەكتەرمەن زەرلەنىپ, جىلتىراقتارمەن كومكەرىلگەن. كەۋدە ويىعى مەن قالتالارى كوك بارقىتپەن, قامزولدىڭ ەتەگى – التىن وقالى تاسپامەن كومكەرىلگەن. استارى ماقتا-ماتا كەزدەمەدەن جاسالعان», دەيدى مۋزەي مامانى ءنازيما وتاشەۆا.
بۇگىندە مۇراجايدىڭ قۇندى جادىگەرلەرىنىڭ بىرىنەن سانالاتىن التىن وقالى قامزولدى 1994 جىلى الماتىلىق قولونەر شەبەرى تۇرسىنكۇل جايلاۋباەۆا قالپىنا كەلتىرگەن.
قوستاناي وبلىسى