«نەمىس ماشيناسىن» كىم تەجەي الادى؟

ا توبىندا 2-تۋردى باستاعان ازۋلى گەرمانيا قۇراماسى ماجارستان فۋتبولشىلارىن 2:0 ەسەبىمەن ەڭسەرىپ, پلەي-وفف كەزەڭىنە وتۋگە كۇنى بۇرىن قامدانىپ قويدى. 22-مينۋتتا ماجارستان قۇراماسىنىڭ قاقپاسى الدىنداعى ابىر-سابىردا جا­مال مۋسيالانىڭ ۇرىمتال تۇستان شى­رەنە تەپكەن دوبىن ماجارلىق فۋتبول­شىلار تويتارا العان جوق. گەرمانيا قۇراماسىن العا شىعارعان مۋسيالا ەۋروپا چەمپيوناتىنداعى ەكىنشى گولىن ەنشىسىنە جازدى. ءبىرىنشى تۋردا گەرمانيا قۇراماسى شوتلانديا فۋتبولشىلارىن 5:1 ەسەبىمەن جەڭگەندە مۋسيالا دا ءبىر گول سوققان بولاتىن. جامال – شتۋتگارتتا تۋىپ, جەتكىنشەك شاعىندا انگلياعا قونىس اۋدارىپ, «چەلسيدىڭ» اكادەمياسىندا شىڭ­­داۋدان وتكەن ساڭلاق. ءتىپتى انگليانىڭ جاسوسپىرىمدەر جاستار قۇراماسىندا دا وينادى. 17 جاسىندا گەرمانيا ۇلتتىق قۇراماسىنىڭ جەيدەسىن كيدى. 21 جاستاعى تالانتتى فۋتبولشى المانيا جەرىندەگى الاماندا تالايدىڭ تاڭدايىن قاقتىراتىنىن تاعى ءبىر بايقاتتى.

تارتىستى ماتچتاعى ەكىنشى گولدى گەرمانيا قۇراماسىنىڭ كاپيتانى, گەلزەنكيرحەننىڭ تۇرىگى يلكاي گۇنداعان ەنشىسىنە جازدى. 67-مينۋتتا ماكسيميليان ميتتەلشتادتتىڭ بەرگەن پاسىن گۇنداعان ءمۇلت جىبەرگەن جوق. ماديارلار بارىن سالىپ شابۋىلدى ورىستەتكەنىمەن, مۇمكىندىكتى وڭتايلى پايدالانا المادى.

بۇل توپتاعى كەزەكتى تارتىس شوت­لانديا مەن شۆەيتساريا قۇرامالارى اراسىندا ءوربىپ, تەڭ تارقاستى. ماتچ الدىندا شوتلانديا قۇراماسىنىڭ باس باپكەرى ستيۆ كلارك قالايدا جەڭىسكە جەتىپ, شوتلاند حالقىن قۋانتامىز دەپ ءىرى سويلەگەن ەدى. 13-مينۋتتا ماكتومينەيدىڭ سوققىسى شۆەيتساريا قۇراماسىنىڭ ويىن­شىسى فابيان شەردىڭ اياعىنا ءتيىپ اۆتوگول تىركەلدى. دەسە دە شوتلاندىقتاردىڭ قۋانىشى ۇزاققا سوزىلعان جوق. 26-مينۋتتا شوتلانديا قۇراماسىنىڭ قورعاۋشىسى ەنتوني رەللستوننىڭ قاڭعالاقتاپ ءجۇرىپ قيىس تەپكەن پاسىن جەردان شاكيري ۇتىمدى پايدالانىپ, تارازى باسىن تەڭەستىردى.

بۇل توپتا گەرمانيادان سىرت شۆەي­تساريا قۇراماسى دا پلەي-وفف كەزەڭىنە سىنىق سۇيەم جاقىن تۇر.

ۆ توبىنىڭ 2-تۋر ويىنىن حورۆاتيا مەن البانيا قۇرامالارى وتكىزدى. ماتچ­تىڭ 11-مينۋتىندا قورعاۋشى ەلسەيد حيۋسايدىڭ اسپانداتىپ بەرگەن پاسىن جارتىلاي قورعاۋشى كازيم لاتسي گولعا ۇلاستىرىپ, البانيا قۇراماسىن العا شىعارعان. الباندار باسىمدىقتى 72-مينۋتقا دەيىن ۇستاپ تۇرعانىمەن, 73-مي­نۋتتا اندرەي كراماريچ تارازى باسىن تەڭەستىرىپ كەتتى. وسى گولدان كەيىن البانداردىڭ ساعىن سىنىپ, تاۋى شا­عىلعانداي اسەر قالدىردى. الاڭعا 2-تايمدا شىققان لۋكا ءسۋچيچتىڭ (76-مينۋت­تا) تەپكەن دوبى البان فۋتبول­شىسىنىڭ (كلاۋس گياسۋليا) اياعىنا ءتيىپ اۆتوگول تىر­كەلدى. ەكىنشى تايمنىڭ نەگىزگى ۋاقىتىنا باس قازى 6 مينۋت قوسقان. اۆتوگول سوققان ايىبىن جۋعان كلاۋس گياسۋليا 94-مينۋتتا البانيا قۇراماسىن كەزەكتى جەڭىلىستەن قۇتقاردى, ەسەپ: 2:2.