كريميناليست – كوزگە كورىنە بەرمەيتىن, ەڭبەگى قوعام اراسىندا باعالانا بەرمەيتىن ماماندىق. بۇل سالادا تاباندى تۇردە تەر توگىپ, قوعام قاۋىپسىزدىگىنىڭ ساقتالۋىنا ۇلەسىن قوسىپ جۇرگەن پوليتسيا پولكوۆنيگى قانات سارتوۆتى كاسىبي مەرەكەسى قارساڭىندا اڭگىمەگە تارتتىق.
نەگىزى سارتوۆتار وتباسىنداعى ەرلى-زايىپتىنىڭ ەكەۋى دە پوليتسيا ورگاندارىندا قىزمەت ەتەدى. قانات سارتوۆ – وڭىرلىك پوليتسيا دەپارتامەنتى جەدەل كريميناليستيكالىق باسقارما باسشىسىنىڭ ورىنباسارى, ال گۇلميرا سارتوۆا اكىمشىلىك پوليتسيادا اعا ينسپەكتور لاۋازىمىندا. وتاعاسى الماتى پوليتسيا اكادەمياسىن ءبىتىرىپ, سوت ساراپشى-كريميناليست ماماندىعىن العاننان كەيىن 2007 جىلى پاۆلودار قالاسىنا كەلىپ, كريميناليست رەتىندە ەڭبەك جولىن باستاعان. ونىڭ ماقساتقا جەتۋدەگى تاباندىلىق, كاسىبيلىك جانە جۇمىستاعى ۇقىپتىلىق قاسيەتتەرى باسشىلىق تاراپىنان جوعارى باعالانىپ, ارادا ونداعان جىل وتكەندە جەدەل-كريميناليستيكا باسقارماسى باستىعىنىڭ ورىنباسارى بولىپ تاعايىندالدى. تاعدىر تاڭداعان جارى گۇلميرا دا پەداگوگيكالىق ينستيتۋتتى اياقتاعان سوڭ, كەيىن يۋۆەنالدى پوليتسياعا قىزمەتكە كەلگەن.
قانات اعانىڭ ايتۋىنشا, كريميناليست ماماندار وقيعا ورنىنا جەتكەن بويدا اۋەلى قىلمىستىڭ ءمان-جايىنا قانىعادى. سودان كەيىن قىلمىسكەردىڭ ىزىنە تۇسەتىن دايەكتەردى جيناۋعا كىرىسەدى.
– كريميناليست مامانداردىڭ نەگىزگى مىندەتى – قىلمىس بولعان جەردەگى كەز كەلگەن دايەكتى, ىزدەردى ىزدەۋ, فوتوعا ءتۇسىرۋ, تىركەۋ, زەرتتەۋگە الىپ كەتۋ. كريميناليستيكادا اۆتوماتتى جۇيە بار, سونىڭ كومەگىمەن كۇدىكتىنى تابۋ ءۇشىن كەز كەلگەن تابىلعان زاتتى, ساۋساق, وكشە ءىزى, ادام اعزاسىنىڭ دنق ساقتالاتىن بولىكتەرى, ءبارى-ءبارى تەكسەرىلەدى. نەگىزى قايتالانبايتىن ساۋساق تاڭباسى سياقتى ءار ادامنىڭ وزىنە ءتان ءيسى بولادى. ول ءيىس قىلمىس بولعان ورىندا ءبىراز ۋاقىت قانا ساقتالادى. بۇل قىلمىستىڭ ءىزىن سۋىتپاي اشۋعا بەيىمدەلگەن ءيىسشىل يتتەرگە قاسكويدى ىزدەۋگە كومەكتەسەتىنى حاق. ال ەگەر كۇدىكتىنىڭ ۇزاق ۋاقىت قولدانعان جەكە زاتى, ماسەلەن قول ورامال, تاراق, بەلدىك, قولعاپ نەمەسە باسقا زاتى تابىلعان بولسا, ول – تەرگەۋ ءۇشىن تاپتىرماس ايعاق. سەبەبى بۇل زاتتار يەسىنىڭ جەكە ءيسىن بىرنەشە اي, كەيدە ءتىپتى جىلدار بويى ساقتاي الادى. بىزدە ودورولوگيالىق زەرتحانا بار. ودورولوگيا دەگەنىمىز – يىستەر تۋرالى عىلىم. ول قىلمىستى اشۋ مەن تەرگەۋ ءۇشىن كەڭىنەن قولدانىلاتىن ءادىس. ورتالىقتا دنق قورى بار, سول جاقتا ءجىتى تەكسەرىلىپ, بۇرىن قىلمىس جاساعان ازاماتتارعا قاتىستىلىعى انىقتالادى. كەشەندى كريمينولوگيالىق ەسەپتەگى قىلمىس جاساعان, قىلمىس جاساۋعا بەيىم تۇراتىن تۇلعالاردىڭ جەكە دەرەكتەرى دە تابىلعان زاتتارمەن سالىستىرىلادى. سول ارقىلى اسا اۋىر قىلمىستاردىڭ بەتى اشىلىپ جاتاتىن ساتتەر از ەمەس, – دەپ اڭگىمەلەدى ق.سارتوۆ.
ەلىمىزگە سىرتتان كەلگەن يميگرانتتاردان ساۋساق ءىزى الىناتىنى ءمالىم. وسىنداي داكتيلوسكوپيالىق زەرتتەۋلەردىڭ ناتيجەسىندە, بۇرىن قىلمىس جاساعان شەتەلدىكتەردى انىقتاۋ مۇمكىن بولىپ وتىر. جۋىقتا كورشى ەلدەن سونداي ءبىر ازامات شەكارادان بەرى ءوتىپ, قازاقستاندا جاسىرىنىپ قالۋعا تىرىسقان. ونى ساۋساق تاڭباسى ارقىلى اجىراتۋدىڭ ءساتى ءتۇستى.
ايتىپ وتەيىك, پوليتسيا پودپولكوۆنيگى گۇلميرا سارتوۆا دا سالادا 15 جىل تابان اۋدارماي قىزمەت ەتىپ كەلە جاتقان بىلىكتى مامان. ەرلى-زايىپتىلار وزدەرىنە جۇكتەلگەن مىندەتتەردى ۇلكەن جاۋاپكەرشىلىكپەن قابىلدايدى. سونىڭ ناتيجەسىندە, ولاردىڭ جۇمىسىنا قاتىستى باسشىلىقتارىنا ەشقاشان شاعىم تۇسپەپتى. بۇگىندە وتباسى ەكى قىز, ءبىر ۇل ءوسىرىپ وتىر. ونەگەلى شاڭىراققا اينالىپ, ۇل-قىزدارى سپورت پەن ونەرگە قۇشتار بولىپ جەتىلىپ كەلەدى.
– كريميناليست ماماندىعىن مەڭگەرۋ ەكىنىڭ ءبىرىنىڭ قولىنان كەلە بەرمەيتىنى دە راس. سەبەبى ماماندى دايارلاۋ بارىسى دا كۇردەلى. پوليتسيا قىزمەتكەرى بولۋ بالا كۇنگى ارمانىم ەدى. ەڭ باستىسى, بۇگىندە قۇقىق قورعاۋ سالاسىندا ەل تىنىشتىعى جولىندا قىزمەت ەتىپ كەلەمىن. وزىمە جۇكتەلگەن ابىرويلى مىندەتتى ءارى قاراي ۇلكەن جاۋاپكەرشىلىكپەن اتقاراتىن بولامىن. قىزمەت پەن وتباسىنىڭ اراسىندا بارلىعىنا ۇلگەرۋ وڭاي ەمەس. ارينە, قىلمىسكەرلەر ءۇشىن دەمالىس كۇندەرى بولمايتىنى بەلگىلى, ال مەنىڭ وتباسىم مۇنى جاقسى تۇسىنەدى. جۇمىستان ورالعان ۋاقىتتا مەن ءۇشىن ءۇيىمنىڭ جىلۋىن سەزىنۋدەن اسقان قۇندى ءارى باقىتتى ەشتەڭە جوق, – دەيدى وتاعاسى.
ول قازىرگى ۋاقىتتا قول استىنداعى كريميناليستەردىڭ وقيعا ورنىنا جەدەل جەتۋىن, ەسەپكە الۋ ماتەريالدارىنىڭ جۇرگىزىلۋىن, كريميناليستيكالىق زەرتتەۋلەردىڭ ورىندالۋىن باقىلايدى. كوپتىڭ العىسىن ارقالاپ, انتىنا ادالدىق تانىتىپ جۇرگەن پوليتسەيلەر وتباسىنا باياندى باقىت پەن اماندىق تىلەدىك.
پاۆلودار وبلىسى