كارل ماركس پەن فريدريح ەنگەلستىڭ پارتيا مانيفەسىندە ايتقان «بارلىق ەلدىڭ پرولەتارلارى, بىرىگىڭدەر!» دەگەن ءسوزى كوممۋنيستەردىڭ ەڭ تانىمال ۇرانىنا اينالدى. بىراق ولاردىڭ ءبىر ادىم ىلگەرى, ەكى ادىم كەيىن ءجۇرىسى بۇل ويدى ىسكە اسىرعان جوق. سەبەبى قوعامنىڭ بىرىگۋ نۇكتەسى وتىرىك ەدى.
دانىشپان لەۆ تولستوي يدەيالارى ىشىندە «بولمىس بىرلىگى» الدىڭعى ساپتا تۇرادى. ويشىلدىڭ «جالپىادامزاتتىق ورتاق رۋح» تۇجىرىمداماسى كەمەلدەنۋدىڭ كىلتى بولىپ سانالادى. جاقىندا جازۋشىنىڭ كوپتومدىعىنىڭ بىرىنەن قوعامدىق سانانىڭ تۇتاستىعى حاقىندا جازىلعان تولعامىنا كوزىم ءتۇستى. وقىپ وتىرىپ وتىرىككە قۇرىلعان كەز كەلگەن باسقارۋ جۇيەسىنىڭ «قۇم ۇستىنە سالىنعان قۇبىلمالى ساراي» عانا ەكەنىنە كوزىم جەتە بەردى. ءارى قاراي ارىستان اقساقالدىڭ ءوزى سويلەسىن:
«ادامدار اقيقاتتا عانا بىرىگە الادى. ول ءۇشىن ءبىر-بىرىنە قاراما-قارسى ءجۇرۋدىڭ قاجەتى جوق. كەرىسىنشە, بارلىعى اقيقاتقا قاراي ءجۇرۋى كەرەك. تەك سوندا عانا ولار ءبىرتۇتاس بولمىسقا اينالادى. ادامدار جاراسايىن دەپ جاراسپايدى, جولدارى ءبىر بولعاننان كەيىن جاراسادى.
ۇلكەن حرام بار دەپ ەلەستەتەيىك. ونىڭ جارىعى جوعارىدان ءبىر نۇكتەگە عانا تۇسەدى. قۇلشىلىق قىلۋشىلار باستارىن قوسۋ ءۇشىن ءبىر-بىرىنە ەمەس, الگى ورتاداعى ساۋلەگە ۇمتىلسا جەتكىلىكتى. سوندا عانا ولار ءوزارا جۇمىلادى».
ال ءبىزدىڭ ساۋلەمىز نە دەپ اتالادى؟
ونى ءبىز كورىپ تۇرمىز با؟
باقىتقا قاراي باستايتىن باعىتىمىز بار ما قازىر؟
قازىرگى قازاق قوعامىنىڭ ماڭىزدى ماسەلەسىنىڭ ءبىرى وسى. مۇددە بىرلىگى قالىپتاسپاي, مەملەكەتتىك تۇتاستىق مۇمكىن ەمەس. ال ونى رۋحاني بىرلىككە ۇمتىلعان جاندار عانا جاساي الادى.