قۇربان ايتتىڭ العاشقى كۇنى ورال قالاسىنداعى «ەل ىرىسى» بازارىندا گاز بالونى جارىلىپ, 10 ادام زارداپ شەكتى. جارىلىس قۇربانعا سويىلعان مالدىڭ باس-سيراعىن ءۇيتۋ ءۇشىن پايدالانىلعان گاز بالونىنان شىققان, دەپ حابارلايدى Egemen.kz.
وقىس وقيعا تۋرالى حابار جەدەل جاردەم وپەراتورىنا 16-ماۋسىم كۇنى تاڭەرتەڭگى ساعات 09:49-دە تۇسكەن. دارىگەرلەردەن قۇرالعان 5 بريگادا وقيعا ورنىنا 5 مينۋتتىڭ ىشىندە جەتىپ ۇلگەرگەن.
«زارداپ شەككەندەر – بارلىعى 10 ادام, ولاردىڭ 2-ەۋى كامەلەتكە تولماعان ەر بالا, ەرەسەكتەردىڭ جاس شاماسى 27-67 ارالىعىندا», دەپ حابارلادى باتىس قازاقستان وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
ءبىر تاۋلىكتەن كەيىنگى جاعداي مىناداي: قازىرگى ۋاقىتتا 3 ەرەسەك ادام رەانيماتسيادا, 4-ەۋى پوليتراۆما بولىمشەسىندە جانە ەكى ءجاسوسپىرىم كوپبەيىندى وبلىستىق بالالار اۋرۋحاناسىندا قاجەتتى ەم الۋدا. ءجاسوسپىرىمنىڭ بىرەۋى – جانساقتاۋ بولىمىندە, بىرەۋى پوليتراۆما بولىمشەسىندە جاتىر.
ناۋقاستاردىڭ ءحالىن دەنساۋلىق ساقتاۋ باسقارماسىنىڭ باسشىسى ماديار وتەشەۆ, باسشىنىڭ ورىنباسارى گۇلنار ءابدىراحمانوۆا, دسب باس شتاتتان تىس تراۆماتولوگى سەرىك قارەكەنوۆ جانە قالالىق كوپبەيىندى اۋرۋحانا ديرەكتورى ارمان مىرزاحمەتوۆ ارنايى بارىپ كوردى. ءتيىستى مامانداردىڭ قاتىسۋىمەن كونسيليۋم وتكىزىلگەن. سونداي-اق, استانا جانە الماتى قالالارىنىڭ اپاتتار مەديتسيناسى ورتالىعى رەانيماتولوگتارىمەن جانە كومبۋستيولوگتارىمەن بىرلەسىپ تەلەمەديتسينا جۇرگىزىلگەن. قازىر كەلىسىلگەن ەمدەۋ تاكتيكاسى بويىنشا ەم-شارا جۇرگىزىلىپ جاتىر .
باتىس قازاقستان وبلىسىندا سوڭعى كۇندەرى كۇن رايى وتە ىستىق, 40 گرادۋسقا جاقىنداپ تۇر. توتەنشە جاعدايلار دەپارتامەنتى جوعارى ءورت قاۋپى قاتەرىن كۇن سايىن حابارلايدى. ءۇش كۇنگە سوزىلاتىن قۇربان ايت كەزىندە قاۋىپسىزدىكتى ساقتاۋ تۋرالى قمدب-نىڭ باتىس قازاقستان وبلىسىنداعى وكىل يمامى سامات الىباەۆ تا ۇندەۋ جاسادى.
قازىر حالىق كوپ جينالاتىن قوعامدىق ورىنداردا, قۇربان ايت شالىنىپ جاتقان قاساپحانالاردا قاۋىپسىزدىك شارالارى كۇشەيتىلدى.