مەملەكەت باسشىسى ءتيىستى سالا باسشىلارىنىڭ باسىن قوسىپ, تۋريزم سالاسىنداعى وزەكتى ماسەلەلەرگە نازار اۋدارعانى وتە دۇرىس بولدى. ويتكەنى بىزگە قىزىعاتىن تۋريستەر جىلدان-جىلعا كوبەيىپ كەلەدى. دەسەك تە شەتەلدىكتەر ءبىزدىڭ ەلگە جاعاجاي ءۇشىن كەلمەيدى. بىزدە اۋا رايى قوڭىرسالقىن, جاز مەزگىلى تىم قىسقا بولعاندىقتان ءتۋريزمنىڭ بۇل ءتۇرى جەتكىلىكتى دامىماعان.
راسىن ايتقاندا, جاعاجايلارداعى سەرۆيس قىمبات. وعان قوسا ينفراقۇرىلىمى دا ماقتانارلىقتاي ەمەس. كاسىپكەرلەردى دە تۇسىنۋگە بولادى. قىسقا مەرزىمدە بارىنشا تابىس تاۋىپ قالعىسى كەلەدى. ويتكەنى دەمالىس ورىندارى 8-9 اي بويى بوس تۇرادى عوي.
وسىندايدا ءبىزدىڭ ەلگە ساپارلاۋدى كوزدەگەن تۋريستەرگە نە ۇسىنا الامىز دەگەن سۇراق تۋادى. ءبىز ەلدەگى كليماتتىق جاعدايدى ەسكەرە وتىرىپ, شەتەلدىك تۋريستەرگە ەكوتۋريزمدى ۇسىنا الاتىمىزدى ايتامىز. ول ءۇشىن تاۋ-تاس, ورمان-كولىمىز بار. ءبارى كەرەمەت, اسەم, ءارى تابيعي قالپىن ءالى بۇزا قويماعان. ءبىزدىڭ «بوز جىرى» دەپ اتالاتىن ەكسكليۋزيۆتى تۋر باعدارلارىمىز بار. بىلسەڭىزدەر, قاتونقاراعاي ۇلتتىق تابيعي پاركى 640 مىڭعا جۋىق شارشى شاقىرىمدى الىپ جاتىر. سول جەردە ەكوتۋريزمنىڭ ۇلكەن ءبىر وشاعىن جاساۋعا بولادى. وسىنىڭ ءبارىن نەگىزگە الىپ, ەلدە ەكوتۋريزمدى دامىتۋ كەرەك دەگەن تاڭداۋ جاسادىق. ەندى وسى باعىتتا جۇمىس ىستەيمىز.
ەلدەگى قىزمەت كورسەتۋ ساپاسىنا تۋريستەردىڭ كوڭىلى تولا ما, دەگەن ساۋالعا توقتالايىن. ءوزىمىزدىڭ ىشكى تۋريزممەن ساياحاتتايتىن ازاماتتارعا قىزمەت قىمباتقا تۇسكەن سوڭ, كوڭىلى تولا بەرمەيدى. مۇنىڭ تۇپكى سەبەبى حالىقتىڭ ءال-اۋقاتىنا قاتىستى دەر ەدىم. نەگىزى ەلدە تۋريستەرگە كورسەتىلەتىن قىزمەت اقىسى قىمبات ەمەس. جاز ايلارىندا كوپشىلىك ەڭبەك دەمالىسىنا شىعادى. سودان سۇرانىس كۇرت ارتىپ, باعا كوتەرىلەدى. ءسويتىپ, قۇنى تۇركيا, مىسىر ەلدەرىنىڭ باعاسىمەن يىقتاسىپ كەتەدى. باعانى نارىق رەتتەيدى دەگەن وسى. مىسالى, شىمبۇلاققا بارعان شەتەلدىك تۋريستەر ساپارعا ءدان ريزا بولادى. وندا شاڭعى تەۋىپ, جان راقاتىن تابامىن دەگەن ادامعا كەرەكتىڭ ءبارى بار. قوناقۇيلەر مەن مەيرامحانالار دا وزىق ۇلگىدە قىزمەت كورسەتەدى. قىزىعى, شەتەلدىكتەر ءۇشىن بىزدەگى باعا سالىستىرمالى تۇردە ارزان. سەبەبى ەۋروپا مەن رەسەيدەگى كەيبىر دەڭگەيلەس دەمالىس ورىندارى شىمبۇلاقتان الدەقايدا قىمبات. سالاداعى باستى ماسەلە – ورگاندارداعى سالاارالىق قاتىناستىڭ جوقتىعى. تۋريزم سالاسى ءبىر مەكەمەگە عانا بايلانىپ تۇرعان جوق قوي. تۋريست شەكارادان وتكەندە شەكارا قىزمەتىنە, كەيىن كولىككە جۇگىنەدى. ودان ءارى ۇلتتىق پارككە بارعاندا مەكەمە قوناقتاردى جايلى قارسى الىپ, شىن ىقىلاس-نيەتپەن شىعارىپ سالۋعا ءتيىس. مەملەكەت باسشىسى كۇشتىك قۇرىلىمداردان باستاپ, تۋريزمگە قاتىسى بار بارلىق مەكەمە باسشىلارىن جيىپ, ناقتى تاپسىرما جۇكتەپ وتىر. ويتكەنى تۋريزم جانە سپورت مينيسترلىگىندە ءتيىستى بارلىق ورگانعا اسەر ەتە الاتىن كۇش جوق. پرەزيدەنتتىڭ ورىندى تاپسىرمالارى ورنىقتى ورىندالسا, ەل ءتۋريزمى وڭالادى دەگەن ۇمىتتەمىز.
الماس مارات ۇلى,
«Limon Travel» تۋريستىك كومپانياسىنىڭ ديرەكتورى