«تازا قازاقستان» ەكولوگيالىق اكتسياسى اياسىندا سىر بويىندا تازالىق شارالارىمەن قاتار, كوركەيتۋ-كوگالداندىرۋ جۇمىستارىنا دا ايرىقشا نازار اۋدارىلدى. اكتسيا باستالعالى بەرى ءوڭىر كليماتىنا ءتوزىمدى قاراعاش, تەرەك, سىر تالىنىڭ مىڭداعان كوشەتى وتىرعىزىلدى.
جالپى, جازى اپتاپ وڭىردەگى جاسىل جەلەك قاتارى كەيىنگى جىلدارى سيرەپ قالعانى راس. ءار كوكتەمدە اۋىل مەن قالا كوشەلەرىنە ەگىلگەن كوشەتتىڭ كوبى سۋ تاپشىلىعىنان قۋراپ قالاتىنى دا بەلگىلى. كۇن جىلىنا ەگىلگەن كوشەتتىڭ كوپ ۇزاماي قاۋدىراعان قۋرايعا اينالىپ شىعا كەلۋىنە سالعىرتتىقتىڭ دا تيگىزەر كەسىرى از بولمايتىن. جەرگىلىكتى اكىمدىك «ەندى ونداي ولقىلىقتى بولدىرمايمىز» دەپ وتىر.
بىلتىر جىل سوڭىندا قالادا قۇرىلعان «جاسىل قىزىلوردا» كمم بيىلدان باستاپ كانالدار مەن ارىق جۇيەلەرىن تازالاپ, ۇڭعىما مەن ناسوستار ارقىلى تالدارعا سۋ جەتكىزدى. اللەيالار مەن ورتالىق كوشەلەردەگى گۇلزارلاردى, كوگالدى كۇتىپ ۇستاپ, قۋراعان اعاشتاردى كەسۋ, باپتاۋ وسى مەكەمە مىندەتىنە كىرىپ وتىر.
مەكەمە جۇمىسشىلارى جىبەك جولى, سارقىراما كانالدارىن تولىق تازالاپ, قىزىلجارما, تابيعات كانالدارى مەن قالاىشىلىك ارىق جۇيەلەرى جاعدايىن بەكىتىلگەن كەستەگە سايكەس كۇندەلىكتى باقىلايدى.
«بۇرىن اياقسۋدى ءبىر مەكەمە جەتكىزسە, تالدارعا كۇتىمدى باسقا كومپانيا جاسايتىن. ەندى سۋ العاننان باستاپ پاركتەر مەن اللەياداعى الاڭدار مەن تال-داراققا كۇتىم جاساۋ بىزگە جۇكتەلىپ وتىر. كۇزدە ارىق بىتكەندى قۋراعان ءشوپ پەن جاپىراق تولتىراتىنى دا كوز ۇيرەنگەن كورىنىس ەدى. بۇل كوكتەمدە اياقسۋدىڭ كەرەكتى كەزدە جەتۋىنە اجەپتاۋىر كەدەرگى كەلتىرەتىن. ولاردىڭ تازالىعىمەن ەندى ءبىزدىڭ مەكەمە اينالىسادى», دەيدى «جاسىل قىزىلوردا» كمم ديرەكتورىنىڭ ورىنباسارى بولات بەيسەنباەۆ.
وسى كۇنى «جاسىل قىزىلوردا» جاڭا تەحنيكالار الۋدى باستادى. مەكەمە جۇمىسشىلارى قالاداعى كوشەت ەگىلگەن اۋماقتاردى, پاركتەر مەن اللەيالاردى كۇندەلىكتى باقىلاپ وتىر.
قىزىلوردا