قازاقستان مۇسىلماندارى ءدىني باسقارماسى قۇربان شالۋ ءراسىمىن قاشىقتان وتكىزۋگە ارنالعان qurban2024.kz سايتىن ىسكە قوستى, دەپ حابارلايدى Egemen.kz ۇيىمنىڭ ءباسپاسوز قىزمەتىنە سىلتەمە جاساپ.
«مۇسىلمان قاۋىمىنىڭ قاسيەتتى ايت مەرەكەسىنە وراي بارشا قازاق ەلىن قۇربان ايت كۇنى جۇزەگە اساتىن قايىرىمدىلىق اكتسياسىنا ۇلەس قوسۋعا شاقىرامىز. حالىققا, اسىرەسە ۇلكەن قالالاردا تۇراتىن جاماعاتقا وڭتايلى بولۋ ءۇشىن بيىل دا قۇربان شالۋ وفلاين جانە ونلاين فورماتتا جۇزەگە اسادى», دەلىنگەن حابارلامادا.
قىزمەتتى پايدالانعىسى كەلەتىندەر سايت ارقىلى قۇرباندىق مالىن تاڭداپ, قاجەتتى قاراجاتتى Kaspi QR ارقىلى اۋدارا الادى. قۇرباندىققا قوي مەن ەشكىنى ءبىر كىسى, ءىرى قارا مەن تۇيەنى جەتى ادامعا دەيىن شالۋعا بولادى.
«تاپسىرىسىڭىز ءساتتى بولسا, ءسىزدىڭ ۇيالى تەلەفونىڭىزعا قۇرباندىق شالعاننان كەيىن ونىڭ فوتو جانە بەينە ەسەبى تاپسىرىس بەرۋشى كورسەتكەن نومىرگە جىبەرىلەدى», دەپ قوستى تسيفرلىق دامۋ ءبولىمىنىڭ باسشىسى تيمۋر سەرىكحان ۇلى.
سايتتىڭ مالىمەتىنشە, جاس قوزى 65-80 مىڭ تەڭگە, قۇرباندىققا شالىناتىن ەشكى 40-50 مىڭ, ءىرى قارا مال 350-650 مىڭ تەڭگە ارالىعىندا بولادى.