پوليتسيا قىزمەتكەرلەرى, ەرىكتىلەر, تجد قىزمەتكەرلەرى جانە باسقا دا اقتوبەلىك ازاماتتار 4 ماۋسىم كۇنى كەشكىلىك ۋاقىتتا ۇيىنەن بەلگىسىز باعىتقا شىعىپ كەتكەن 13 جاستاعى جەتىرۋ كارىمدى ىزدەستىرىپ جاتىر. بالانى ىزدەۋگە 500-گە جۋىق ادام جۇمىلدىرىلدى. كينولوگتەر ءىزشىل يتتەرىمەن بالا جوعالعان «زارەچنىي-1» تۇرعىن ءۇي الابىن, ەلەك جانە قارعالى وزەندەرىنىڭ جاعالاۋىن تۇگەل تەكسەرىپ شىقتى. ىزدەستىرۋ شارالارىنا 40 بىرلىك تەحنيكا, ەكى قايىق, ۇشۋ اپپاراتتارى دا پايدالانىپ جاتىر. الايدا وسى كەزگە دەيىن كوردىم-ءبىلدىم دەگەن ادام تابىلمادى.
4 ماۋسىمدا كەشكىلىك جەتىرۋ كارىم قاقپانى اشىپ, كوشەگە شىعىپ كەتكەن. ۇيىندە اتاسى مەن اجەسى بولعان. ءجاسوسپىرىمنىڭ اناسى پەرزەنتحانادا. سول كۇنى قاتتى نوسەر قۇيىپ تۇرعاندا, ونىڭ كوشەگە شىعىپ كەتكەنىن ۇيدەگى قارت كىسىلەر بايقاماي قالىپتى. ءجاسوسپىرىم ءتۋابىتتى سىرقات. سول توڭىرەكتەگى ۇيلەردىڭ شاتىرلارى, كارىز قۇدىقتارى, قازۋلى شۇڭقىرلار تۇگەل تەكسەرىلگەنىمەن, ەش ناتيجە جوق. بالا جاڭبىر جاۋىپ تۇرعاندا, وزەن جاعالاپ كەتۋى نەمەسە توعايدىڭ اراسىنا كىرىپ كەتۋى دە مۇمكىن. كۇننىڭ كۇركىرەۋىنەن قورقىپ ەلسىزگە قاراي كەتىپ, اداسىپ جۇرە بەرۋى, نە اعاشتىڭ تۇبىندە تىعىلىپ جاتىر دەگەن كۇدىك بار. ەرىكتىلەر ءجاسوسپىرىمنىڭ فوتوسۋرەتىن الىپ, جول بويىنداعى تاماقتانۋ ورىندارى, جانار-جاعارماي بەكەتتەرى مەن دۇكەندەرگە كىرىپ سۇراستىرسا دا, كۇن كەشكىرگەندە كەتكەن بالانى كوردىم-ءبىلدىم دەگەن ادام جوق. قازىرگى كەزدە كوشەلەر مەن عيماراتتارداعى بارلىق بەينەباقىلاۋ كامەرالارى تەكسەرىلىپ جاتىر.
اقتوبە وبلىسى