ەرتىس-بايان ءوڭىرىنىڭ ىسكەر ازاماتتارى شاعىن جىلىجايلار تۇرعىزۋعا بەت بۇرا باستاعانى بايقالادى. تىرلىگى قىسى-جازى جالعاسىپ, ەل-جۇرت تابيعي دارۋمەندەردەن تارىعا باستاعان مەزگىلدە ساپالى كوكونىس پەن جەمىس-جيدەكتى جەرگىلىكتى نارىققا شىعاراتىن كاسىپكەرلەردى قولداۋ تەتىكتەرى دە از ەمەس. ەسەسىنە بۇعان دەيىن قىرعىز, وزبەك اعايىنداردان تاسىپ كەلگەن اۋىلشارۋاشىلىق ونىمدەرىن وزىمىزدە وسىرە باستادىق.
اقسۋدىڭ العاباس اۋلىندا جۋىقتا شاعىن جىلىجاي پايدا بولدى. نەبارى 260 شارشى مەتر جەرگە جايعاسقان كەشەن وبلىس ورتالىعىنىڭ تۇتىنۋشىلارىن ارزان كوكونىس ونىمدەرىمەن قارىق قىلۋدى كوزدەپ وتىر. جىلىجاي يەسى, «تامىر-كومپاني» جەكە كاسىپورنىنىڭ باسشىسى دارحان الپەيىسوۆ العاشقى ماۋسىمدا بۇل جەرگە قيار مەن قىزاناق, بولگار بۇرشاعىن, اسكوك, شالعام, پياز ەككەنىن ايتادى.
– جىلىجايعا تۇقىم مەن كوشەتتەردى ەككەنىمە ءبىر ايدان ەندى استى. ازىقتىق وسىمدىكتەردىڭ كوشەتى جىلى اۋا رايىن جاقسى كورەدى. سوندىقتان جىلىجايدى ۇنەمى جىلىتىپ, بىرقالىپتى تەمپەراتۋرا ۇستالىپ تۇر. بۇل بيزنەسكە 12 ملن تەڭگە ينۆەستيتسيا قۇيدىم. ونىڭ 5 ملن تەڭگەسىن مەملەكەت گرانت رەتىندە بەرسە, وزگەسى جەكە قاراجات. بارلىق قاجەتتى تۇقىمدى جەرگىلىكتى دۇكەندەردەن ساتىپ الدىم. قازىر شارۋاشىلىعىمدا ەكى قىزمەتكەرىم بار. ولاردىڭ سانىن الداعى ۋاقىتتا تورتەۋگە جەتكىزۋ جوسپاردا تۇر. ال ءونىم جينالا باستاعان ۋاقىتتا ماۋسىمدىق جۇمىستارعا قوسىمشا ادام كۇشى تارتىلادى, – دەيدى جاس كاسىپكەر.
دارحاننىڭ العاشقى ماماندىعى – اسكەري شتۋرمان. اقتوبەدەگى اۋە قورعانىسى سالاسىندا اسكەري ۇشاق شتۋرمانى بولىپ ءبىراز ۋاقىت ەڭبەك ەتكەن. اسكەري قىزمەتتە 10 جىلداي ءجۇرىپ, اياگوز, الماتى, پاۆلودار قالالارىندا بولىپتى. كەلىسىمشارتى اياقتالعان سوڭ كوپتەن بەرى كوكەيىندە جۇرگەن بيزنەس يدەياسىن جۇزەگە اسىرۋعا بىردەن كىرىسىپ كەتىپتى. ايتۋىنشا, جىلىجاي شارۋاشىلىعىن قۇرۋ, كوكونىستەردى ەگۋ ءادىس-تاسىلدەرىنىڭ بارلىعىن ينتەرنەتتەن, الەۋمەتتىك جەلىدەگى تانىمال بلوگەرلەردەن ۇيرەنگەن. كوكتەپ شىعا باستاعان كوشەتتەردى العاشقىدا قاردى ەرىتىپ, سونىڭ سۋىمەن سۋارىپ كەلگەن. الداعى كۇندەرى جىلىجاي جانىنان قۇدىق قازىپ, قاجەتتى سۋدى سودان تارتىپ شىعارماقشى. ەڭبەكقور ازامات ءونىمى جاقسى شىقسا, الداعى ۋاقىتتا بۇل جەرگە قۇلپىناي ەگىپ كورمەكشى.
ءسوز سوڭىندا كاسىپكەر پاۆلودار قالاسىنداعى ساۋدا-ساتتىق نۇكتەلەرى جىلىجايدىڭ بولاشاق ونىمىنە سۇرانىس جاساپ وتىرعانىن جەتكىزدى. وبلىس ورتالىعىنداعى «Jailau» فەرمەرلىك بازارىندا جانە «راحات» كوتەرمە-بولشەك بازارىندا ساتۋ كوزدەلگەن. بولاشاقتا شارۋاشىلىعى كەڭەيە تۇسسە, ەلىمىزدىڭ وڭتۇستىگى مەن قىرعىزستاننان تاسىلاتىن كوكونىس ونىمدەرىنىڭ ءبىر بولىگىن قامتاماسىز ەتۋ جوسپارىندا بار.
پاۆلودار وبلىسى