«تازا قازاقستان» ەكولوگيالىق اكتسياسى اياسىندا وڭىردەگى ورمان القاپتارى مەن ساياباقتار, وزەن-كول جاعالاۋلارىن تازارتۋ جۇمىسى جالعاسىپ جاتىر. مامىر ايىنىڭ سوڭعى كۇندەرى وبلىستىڭ ون شاقتى اۋدانىندا جالپىحالىقتىق تازالىق سەنبىلىكتەرى ءوتتى.
مىسالى, اۋليەكول اۋىلىندا وتكەن سانيتارلىق تازارتۋ اكتسياسىنا مەملەكەتتىك جانە بيۋدجەتتىك ۇيىمداردىڭ قىزمەتكەرلەرى, ەرىكتىلەر, اۋىل تۇرعىندارى, كاسىپكەرلەر بار – ۇزىن-ىرعاسى 180-نەن اسا ادام قاتىستى. تۋعان جەردى اباتتاندىرۋ, قورشاعان ورتاعا قامقورلىق تانىتۋ باعىتىنداعى يگى ءىس-شارالارعا جەرگىلىكتى شارۋا قوجالىقتارى تەحنيكالارىن ءبولىپ, قوقىس ۇيىندىلەرىن شىعارىسۋعا اتسالىسىپ جاتىر.
وتكەن سەنبىلىكتە اۋدان تۇرعىندارى اۋليەكول اۋىلىنىڭ سولتۇستىگىندەگى ورمان-ساياباقتى قوقىستان تازارتىپ, كوبىنە جاستار كەلىپ باس قوساتىن دەمالىس اۋماعىن رەتكە كەلتىرىپ قويدى.
«تازا قازاقستان» جالپى رەسپۋبليكالىق اكتسياسىنا اۋليەكول اۋدانىنىڭ تۇرعىندارى ەكى ايدان بەرى بەلسەندى قاتىسىپ جاتىر. ەڭبەك ەتە ءجۇرىپ, اۋىلداستارمەن اڭگىمەلەسىپ, بوي جازۋ دا ءبىر عانيبەت قوي. مەملەكەت باسشىسى قاسىم-جومارت توقاەۆ اتاپ وتكەندەي, ەلىمىزدى اباتتاندىرۋ, كوگالداندىرۋ – ۇلكەن مەملەكەتتىك ءمانى بار ماڭىزدى ءىس. ءاربىر ادام اينالاسىن تازا ۇستاپ, تال ەگىپ, تۋعان جەردىڭ تابيعاتىنا قامقورلىق كورسەتۋدى ءومىر سالتىنا اينالدىرۋى كەرەك. تازالىق – دەنساۋلىق كەپىلى. مىسالى, وسى تازالىق ماۋسىمىنىڭ ىشىندە قانشاما اۋىلدىڭ اينالاسى تازارىپ, قىس بويى بەيبەرەكەت تاستالعان, كوكتەمگى قىزىل سۋ ايداپ اكەلگەن قوقىستان ارشىلىپ, كورگەن كوز سۇيسىنەتىندەي اجارى كىرىپ قالدى», دەيدى اۋليەكول اۋداندىق قوعامدىق كەڭەسىنىڭ ءتورايىمى الميرا جانسۇگىروۆا.
وتكەن سەيسەنبىدە قوستاناي اۋدانىندا دا ءدال وسىنداي سەنبىلىك ۇيىمداستىرىلدى. جەرگىلىكتى اكىمدىك جانىنان جۇمىس ىستەپ جاتقان جاستار رەسۋرستىق ورتالىعىنىڭ ماماندارى قوستاناي اۋىل شارۋاشىلىعى كوللەدجىنىڭ ستۋدەنتتەرىمەن بىرلەسىپ, توبىل قالاسى ارقىلى وتەتىن سايدى تۇرمىستىق قوقىستاردان تازارتتى. تازالىق اتسياسىنا 50 شاقتى ادام قاتىستى.
قالانىڭ بىرنەشە كوشەسىن قيىپ وتەتىن ساي تۇرمىستىق قالدىقتارعا, قاڭىلتىر قۇتىلارعا تولىپ قالعان. «مۇنداي كورىنىس قالامىزعا ابىروي اپەرمەيدى. وكىنىشكە قاراي, كەيىنگى كەزدەرى شاشىلىپ جاتقان قوقىستىڭ جانىنان بەيجاي ءوتىپ كەتۋگە ەت ۇيرەنىپ كەتكەن سياقتى. «تازا قازاقستان» اكتسياسىنىڭ ماقساتى دا – جۇرتتى قورشاعان ورتاعا نەمكەتتى قاراۋدان ارىلتىپ, تازالىققا, اسەمدىككە كوز ۇيرەتۋ», دەيدى جاستار رەسۋرستىق ورتالىعىنىڭ ەرىكتىلەرى. جاستار ورتالىعىنىڭ باستاماسى كوللەدج ستۋدەنتتەرى تاراپىنان قولداۋ تاۋىپ, قوقىس تولى ساي اينالاسى ءبىر-ەكى ساعاتتىڭ ىشىندە تازارىپ قالدى.
بەيىمبەت مايلين اۋدانىنىڭ ورتالىعى ايەت اۋىلىندا دا جاڭبىردىڭ سۋى اعاتىن ارىقتاردى تازارتۋ, لاي تولىپ, قايراڭ باسىپ قالعان سۋ ارنالارىن ارشۋ جۇمىستارى جۇرگىزىلدى. تۇرعىندار ايەتتەگى اشىق الاڭقايلار مەن مەكەمە عيماراتتارىنىڭ اينالاسىنا قاۋلاپ ءوسىپ كەلە جاتقان جاسىل ءشوپتى ج ۇلىپ, ورتالىق كوشەلەردى سىپىرىپ شىقتى. اكتسياعا 30 ادام قاتىستى, قوقىس شىعارۋعا ارنالعان ءبىر تەحنيكا تارتىلدى.
«ايەت اۋىلىنداعى تازالىق اكتسياسى – تۇرعىنداردىڭ ەكولوگيالىق مادەنيەتىن ارتتىرۋعا ىقپال ەتەتىن مانگە يە ماڭىزدى ءىس-شارانىڭ ءبىرى. ەل بولىپ بىرىگىپ, ءبىر جارتى كۇن تىرماق, سىپىرعىش, كۇرەك ۇستاپ اۋىلدىڭ ءىشى-سىرتىن تازارتىپ قويساق, وزىمىزگە جاقسى عوي. اۋىل تۇرعىندارى سەنبىلىككە ەكى ايتقىزباي شىعىپ, ەلدىكتىڭ, بىرلىكتىڭ نە ەكەنىن كورسەتىپ جاتىر. بۇل – وتە جاقسى ءۇردىس. بۇگىنگى ءىس-شاراعا قاتىسقانداردىڭ بارلىعىنا ريزامىن», دەيدى اۋدان اكىمىنىڭ ورىنباسارى باۋىرجان احمەتوۆ.
«تازا قازاقستان» ەكولوگيالىق اكتسياسى اياسىندا قوستاناي قالاسىنداعى «ترياتلون پاركىندە» دە سانيتارلىق تازارتۋ جۇمىسى اتقارىلدى. سەنبىلىككە 150-گە جۋىق ادام اتسالىسىپ, دەمالىس ورنىنىڭ اينالاسىن قامىس, قۋرايدان تازارتىپ, بىرنەشە كولىك قوقىس شىعاردى.
قوستاناي وبلىسى