اقش-تا قازاق ەتنومۇراجاي-كورمەسى اشىلىپ, شەتتە جۇرگەن بارشا جەرلەسىمىز ۇلتتىق مۇرالاردى كوزبەن كورىپ, قولمەن ۇستادى. مادەني ءىس-شارانى نيۋ-يوركتەگى كاسىپكەر قازاق ازاماتى نازار ءالي بيمەنوۆ ۇيىمداستىرعان. كورمە ەندى برۋكلين اۋدانىندا تۇراقتى ءوتىپ تۇرماق. ال بۇل جولى العاشقى كۇنى ادام كوپ جينالاتىندىقتان, ۇيىمداستىرۋشىلار ەتنومۇراجايدىڭ اشىلۋ سالتاناتىن برۋكليندەگى ساياباقتا وتكىزگەن.
يگى باستامانى قولعا الىپ, كورمەنى ۇيىمداستىرعان, ءوز قارجىسىنا ەلىمىزدەن ەكسپوناتتاردى الدىرعان – نازار ءالي بيمەنوۆ. كاسىپكەر قازاقتىڭ باي مادەنيەتىن بۇكىل امەريكاعا تانىستىرعىسى كەلەدى.
«نيۋ-يورك قالاسىندا ەندى تۇراقتى تۇردە وتكىزىپ تۇرامىز. قازىر كەرەكتى ءىس-شارالار اتقارىلىپ جاتىر. ال اقش-تى ارالاپ, ءوڭىر-وڭىرگە ارناپ ءوز شارۋاشىلىعىمنان ەكى سپرينتەر كولىگىن ءبولدىم. ياعني جىلجىمالى-كوشپەلى مۇراجاي بولادى. قازىر ەتنومۇراجاي قورىندا قازاقتىڭ سالت-داستۇرىنە قاتىستى, تۇرمىس تىرشىلىگىندە قولدانعان كوپتەگەن جادىگەر جينالعان. ەرتوقىم, قامشى, ساداق, استاۋ, كەسە, قىمىز پىسەتىن كۇبى بار. ءتىپتى XIX عاسىرداعى كەلساپتى دا الدىردىق», دەيدى ۇيىمداستىرۋشى.
«كورمەگە كەلگەن جاستار وزدەرى بىلمەيتىن زاتتاردىڭ اتىن سۇراپ جاتىر. مۇندا ءبىراز جادىگەر جينالعان. كونە اسپاپتار دا بار. جەتىگەن, قوبىز... وسىندا تۋعان قازاق بالالار: «مىنامەن قالاي وينايدى؟», دەپ اسىقتاردى دا, قىزىقتاپ كورىپ, ويناپ جاتىر. سوندىقتان بۇل ماقتانۋعا تۇرارلىق ءىس دەپ ويلايمىن», دەيدى نيۋ-يورك تۇرعىنى ءناسىپ حازيەۆا.
ەتنومۇراجاي الداعى ۋاقىتتا دا جاڭا جادىگەرلەرمەن تولىقتىرىلماق. ماسەلەن, كورمەدە سۋۆەنير كيىز ءۇي تۇر, بولاشاقتا ەلدەن التى قاناتتى شىن قازاق ءۇيدى الدىرتۋ جوسپارى بار.