دۇنيەجۇزىلىك ەكونوميكالىق فورۋمنىڭ ساياحات پەن ءتۋريزمدى دامىتۋ يندەكسىنە سايكەس تۋريستىك باعىتتار تىزىمىندە ناتيجەمىز اجەپتاۋىر جاقسارىپتى. جالپى 119 ەل اراسىنان قازاقستان 52-ورىنعا تۇراقتادى.
وسىعان دەيىن يندەكستە ەلىمىز 117 مەملەكەتتىڭ اراسىندا 66-ورىندا بولعانىن ايتا كەتكەنىمىز ءجون. باعالاۋ ناتيجەسىنە كەڭىنەن توقتالساق, ەلدىڭ ءتۋريزمى باسەكەگە قابىلەتتىلىك جاعىنان 2-ساتىعا جايعاسىپتى. ءتۋريزمنىڭ الەۋمەتتىك-ەكونوميكالىق اسەرى جاعىنان بەستىكتە بولسا, دەنساۋلىق ساقتاۋ جانە گيگيەنا بويىنشا 23-ورىندا. بۇعان قوسا تابيعي جانە مادەني رەسۋرستار, ادامي كاپيتال مەن ەڭبەك نارىعى, تۋريستىك ينفراقۇرىلىم مەن سەرۆيس ساناتتارى بويىنشا جوعارى باعا العان. ءتىزىم بويىنشا ەلىمىز ازەربايجان, وزبەكستان, قىرعىزستاننان العا شىعىپ, ورتالىق ازياداعى ەڭ جوعارى كورسەتكىشكە يە بولىپ وتىر.
بىلتىر ەلدەگى 19 كۋرورتتى ايماقتا 3,8 ميلليوننان اسا تۋريست دەمالعان. بۇل كورسەتكىش الدىڭعى جىلمەن سالىستىرعاندا 311 مىڭ ادامعا وسكەن. ناتيجەسىندە, كۋرورتتى ايماقتارداعى قوناقۇيلەر بىلتىر 130 ملرد تەڭگەدەن اسا تابىس تاپقان. تۋريستەر اراسىندا الماتى تاۋ كلاستەرى ەڭ تانىمال ورىنداردىڭ ءبىرى سانالادى. بىلتىر بۇل كۋرورتتى ايماققا 2,3 ميلليوننان اسا ادام ساياحاتتاعان. سول سەكىلدى بىلتىر ماڭعىستاۋ كۋرورتتى ايماعىنا 356,2 مىڭنان اسا ادام بارسا, ششۋچە-بۋرابايدا 305,4 مىڭ, اباي وبلىسىنىڭ الاكول كول جاعالاۋىندا 205,8 مىڭ قوناق دەمالعان.
تۋريزم جانە سپورت مينيسترلىگى تۋريزم يندۋسترياسى كوميتەتىنىڭ توراعاسى نۇرتاس كارىپباەۆتىڭ ايتۋىنشا, تۋريستەردى قابىلداۋ شارتتارىن جەتىلدىرۋگە كوڭىل بولىنگەن. بۇل دا بولسا, ەلگە تۋريستەردىڭ كوپتەپ كەلۋىنە سەپتەسسە كەرەك.
«جىل سايىن ەلدەگى كۋرورتتى ايماقتاردا دەمالاتىن تۋريستەر سانى ارتىپ كەلەدى. بۇل اتالعان ايماقتاردىڭ تارتىمدىلىعىن جانە ەلىمىزدىڭ تۋريستىك الەۋەتىنە قىزىعۋشىلىق ارتقانىن اڭعارتادى. ءبىزدىڭ ماقساتىمىز – ءاربىر قوناق ەلىمىزدىڭ ىستىق ىقىلاسى مەن قوناقجايلىعىن سەزىنۋى ءۇشىن تۋريستەردى قابىلداۋ شارتتارىن ودان ءارى جەتىلدىرۋ», دەيدى ن.كارىپباەۆ.