رەسپۋبليكانىڭ ءار وڭىرىندە «ايبىن–2024» ءداستۇرلى اسكەري-پاتريوتتىق جيىنى ءوتتى. جاستاردى وتانشىلدىققا باۋليتىن ءىس-شارا 2015 جىلدان بەرى تۇراقتى تۇردە ۇيىمداستىرىلىپ كەلەدى. جارىسقا قاتىسۋشىلار 6 سپورت تۇرىنەن ءوزارا مىقتىنى انىقتادى.
اتىراۋداعى «ايبىن–2024» وبلىستىق ءداستۇرلى اسكەري-پاتريوتتىق جيىنى «سارمات» مامانداندىرىلعان مەكتەپ ليتسەي-ينتەرناتىنىڭ بازاسىندا ءوتتى. ءىس-شاراعا وبلىس ورتالىعى مەن اۋداندارىنان 9 كوماندادان بارلىعى 140 ءجاسوسپىرىم قاتىستى. جاس قورعاۋشىلار پنەۆماتيكالىق مىلتىقتان اتۋ, كۇش جاتتىعۋلارى, گازقاعار مەن قورعانىس كوستيۋمىن كيۋ, اك-74 اۆتوماتىن شاشۋ, قايتا جيناۋمەن سىنالدى. سونداي-اق ارقان تارتىپ, 3000 جانە 1000 مەتر قاشىقتىققا جۇگىرىپ جارىستى.
– بۇل جارىستىڭ ماقساتى – اسكەرگە شاقىرىلعانعا دەيىنگى جاستاردى پاتريوتتىق سەزىمگە باۋلۋ, اسكەري-قولدانبالى سپورت تۇرلەرى مەن سالاماتتى ءومىر سالتىن ناسيحاتتاۋ, فيزيكالىق داعدىلاردى جەتىلدىرۋ. سايكەسىنشە جيىن جاستار اراسىندا اسكەري-پاتريوتتىق تاربيە جۇمىستارىن جەتىلدىرۋگە, قارۋلى كۇشتەردىڭ مارتەبەسىن بيىكتەتۋگە باعىتتالعان. جىل سايىن ءىس-شاراعا ءوڭىرىمىزدىڭ دارىندى جاستارى قاتىسادى. ولاردىڭ رەسپۋبليكالىق جارىستاردا جوعارى ناتيجە كورسەتكەنى قۋانتادى. «ايبىن–2024» وبلىستىق اسكەري-پاتريوتتىق جاستار جيىنىنىڭ قورىتىندىسى بويىنشا ءى ورىن يندەر اۋدانىنىڭ كومانداسىنا بۇيىردى. جۇلدەلى ءىى ورىندى قىزىلقوعا اۋدانىنىڭ كومانداسى, ءىىى ورىندى قۇرمانعازى اۋدانىنىڭ قۇراماسى يەلەندى. جەڭىمپازدارعا ءتۇرلى ماراپاتتار, كۋبوكتەر, ديپلومدار مەن مەدالدار تابىس ەتىلدى. ءبىرىنشى جانە ەكىنشى ورىن جەڭىمپازدارى «الي» وقۋ پوليگونى بازاسىندا الماتى قالاسىندا وتەتىن رەسپۋبليكالىق كەزەڭگە جولداما الدى, – دەدى «جاس سارباز» جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگى اتىراۋ وبلىسى بويىنشا فيليالىنىڭ توراعاسى نۇرلان ەلەۋوۆ.
ال پەتروپاۆلداعى سپارتاكياداعا ءار ەلدى مەكەننەن ىرىكتەلىپ الىنعان 6 توپ قاتىستى. اسكەري-پاتريوتتىق جيىندا 14-تەن 17 جاسقا دەيىنگى 100-گە جۋىق بوزبالا باق سىنادى. ءار توپتا 15 جاسوسپىرىمنەن تىركەلدى. وڭىرلىك سايىس 4 كۇنگە سوزىلدى.
– وسىنداي جارىستارعا ءجيى قاتىسامىن. اتا-انام دا اسكەري قىزمەتتە. اسكەري-سپورتتىق جيىنداردىڭ جاستار ءۇشىن ماڭىزى زور دەپ بىلەمىن. دەنساۋلىققا دا پايدالى, – دەيدى قاتىسۋشى نۇرجان سابىرجان.
ماڭعىستاۋدا وتكەن جيىنعا اۋدان, قالالاردان 7 كوماندادان بارلىعى 105-كە جۋىق جاس قاتىستى. «ايبىن–2024» وبلىستىق اسكەري-پاتريوتتىق جاستار سلەتىنىڭ قورىتىندىسى بويىنشا ءبىرىنشى ورىن اقتاۋ قالاسىنىڭ «اقتاۋ» كومانداسىنا بۇيىردى. ەكىنشى ورىندى جاڭاوزەن قالاسىنىڭ «قايسار» كومانداسى, ءۇشىنشى ورىندى قاراقيا اۋدانىنىڭ «جاس قىران» كومانداسى يەلەندى.
ءىس-شارانى ماڭعىستاۋ وبلىسىنىڭ قورعانىس ىستەرى جونىندەگى دەپارتامەنتى مەن ماڭعىستاۋ وبلىسى ءبىلىم باسقارماسىنىڭ «وقۋ-ادىستەمەلىك ورتالىعى» ۇيىمداستىردى.
– وڭىردە دارىندى جاستاردىڭ جارىستارى تۇراقتى نەگىزدە وتكىزىلىپ تۇرادى. ءبىز ءۇشىن ولاردىڭ رەسپۋبليكالىق دەڭگەيدە جوعارى ناتيجە كورسەتۋى وتە ماڭىزدى, – دەدى ماڭعىستاۋ وبلىسى وقۋ-ادىستەمەلىك ءبىلىم بەرۋ ورتالىعىنىڭ ديرەكتورى جاڭاگۇل ۇمبەتوۆا.