كەدەندىك اكىمشىلەندىرۋ ماسەلەلەرى

كوميتەت توراعاسى سۇلتانبەك ماكە­جانوۆ وتىرىستى اشا كەلىپ, كەدەندىك اكىمشى­­لەندىرۋدى جەتىلدىرۋ مەملەكەتتىك شەكارا ار­قىلى وتەتىن تاۋارلاردى نەعۇر­لىم ءتيىمدى باقىلاۋعا, كەدەندىك باج بەن سالىق الىم­دارىن جاقسارتۋعا, كاسىپكەر­لەردىڭ شىعىن­دارىن ازايتۋعا, ەلدەر اراسىن­داعى ساۋدا قاتىناستارىنا دەگەن سەنىم دەڭگە­يىن ارتتىرۋعا, سونداي-اق ەلىمىزدىڭ ەكونومي­كالىق وركەندەۋىنە ىقپال ەتەتىنىن اتاپ ءوتتى.

«كەدەندىك اكىمشىلەندىرۋ ۇنەمى جەتىل­دىرىلىپ وتىرادى, بىراق سونىمەن بىرگە شەشۋدى قاجەت ەتەتىن ماسەلەلەر دە بار. شەكارا ماڭىنداعى كولىك ينفراقۇرىلىمى مەن جول بەلدەۋلەرىنىڭ تەحنيكالىق جاي-كۇيى, قاۋىپتەردى باسقارۋ جۇيەسىنىڭ جۇمىسى, كەدەندىك شەكارا ارقىلى ءوتۋدى جەدەلدەتۋ جانە وڭايلاتۋ, مەملەكەتتىك قىزمەتتەردى تسيفرلاندىرۋ, سونداي-اق كەدەن ورگاندارىنىڭ مارتەبەسى نەگىزگى پروبلەما بولىپ تۇر», دەپ اتاپ ءوتتى س. ماكەجانوۆ.

قارجى مينيسترلىگى مەملەكەتتىك كىرىستەر كوميتەتىنىڭ وكىلى ءوز كەزەگىندە كەدەندىك اكىمشىلەندىرۋدى جەتىلدىرۋ جۇمىس­تارى تۋرالى ايتىپ بەردى. قازىرگى كەزدە قىتاي, وزبەكستان جانە تۇرىك­مەنستان شەكاراسىنداعى وتكىزۋ بەكەتتەرىن تولىقتاي جاڭعىرتۋ جۇمىستارى ءجۇرىپ جاتىر. بۇل وتكىزۋ قابىلەتىن 6 ەسەگە ارتتىرۋعا, ۋاقىتتى 2 ساعاتتان 25 مينۋتقا دەيىن قىسقارتۋعا جانە سىبايلاس جەمقورلىق قاۋىپتەرىن ازايتۋعا مۇم­كىندىك بەرەدى. شەكارادا توپتالىپ قالۋ­دى بولدىرماۋ ءۇشىن ەلەكتروندى كەزەك جۇيەسى ازىرلەندى جانە ەنگىزىلدى. ونى قولدانعاندا شەكارا ماڭىنداعى اۋداندار­دا الەۋمەتتىك جانە كريمينوگەندىك جاعداي جاقسارا تۇسەدى, رەسپۋبليكالىق ماڭىزى بار جولدار بويىندا كولىكتىڭ شوعىرلانىپ قالۋىن بولدىرماۋعا مۇمكىندىك بەرەدى.

دوڭگەلەك ۇستەل وتىرىسىنا قارجى مو­نيتورينگى اگەنتتىگىنىڭ, ۇلتتىق قاۋىپ­سىزدىك كوميتەتىنىڭ, باس پروكۋراتۋرا­نىڭ, ۇلتتىق ەكونوميكا, كولىك, ونەركاسىپ جانە قۇرىلىس, اۋىل شارۋاشىلى­عى, تسيفرلىق دامۋ, يننوۆاتسيالار جانە اەرو­عارىش ونەركاسىبى مينيسترلىكتەرى­نىڭ, «اتامەكەن» ۇكپ, قازاقستان كەدەن بروكەرلەرى قاۋىمداستىعىنىڭ, سونداي-اق ۇلتتىق ەكسپەديتورلار قاۋىمداستىعى مەن «قتج-جۇك تاسىمالى» كومپانياسىنىڭ وكىلدەرى قاتىستى.