استاناداعى جاقسىلىق ۇشكەمپىروۆ اتىنداعى جەكپە-جەك سارايىندا بوچچادان جىل سايىنعى ەل چەمپيوناتىنىڭ اشىلۋ ءراسىمى ءوتتى. سالتاناتتى ءىس-شاراعا پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ, قر تۋريزم جانە سپورت ءمينيسترى ەرمەك مارجىقپاەۆ قاتىستى, دەپ حابارلايدى Egemen.kz قر تۋريزم جانە سپورت مينيسترلىگىنە سىلتەمە جاساپ.
ەل بىرىنشىلىگىندە جەكەلەي سىننان بولەك, العاش رەت كوماندالىق جانە جۇپتىق سايىستاردا جەڭىمپازدار انىقتالادى.
چەمپيوناتقا قاتىسۋشىلارعا ساتتىلىك تىلەگەن ماۋلەن اشىمباەۆ بوچچادان ۇلتتىق قۇراما مۇشەلەرىن تاياۋدا فينليانديادا وتكەن بەدەلدى حالىقارالىق جارىستا جەڭىپ العان جۇلدەلەرىمەن قۇتتىقتادى.
«جاقىندا فينليانديادا وتكەن جارىستا ۇلتتىق قۇرامامىزدىڭ مۇشەلەرى قۋانىش اسقاربەكوۆ, يتيانا شىڭعىسحانوۆا جانە الەكساندر قۇرمانتاەۆ العاش رەت قولا مەدال جەڭىپ الدى. بۇل جىل وتكەن سايىن سپورتشىلارىمىزدىڭ كاسىبي دەڭگەيى ءوسىپ كەلە جاتقانىن كورسەتەدى. شەبەرلىكتەرى شىڭدالىپ, وزدەرىنە دەگەن سەنىمدىلىكتەرى جانە ءىرى جەڭىستەرگە دەگەن قۇلشىنىسى ارتىپ كەلەدى. از ۋاقىتتىڭ ىشىندە بۇل سپورتتان جارىق جۇلدىزدارىمىزدىڭ شىققانىنا جانە ءار جارىس سايىن قاتىسۋشىلاردىڭ قاتارى كوبەيىپ كەلە جاتقانىنا قۋانىشتىمىن. ءبىز بارشاڭىزدى ماقتان تۇتامىز. مەملەكەت باسشىسى قاسىم-جومارت كەمەل ۇلى توقاەۆ قازاقستاندا ينكليۋزيانى دامىتۋعا ۇنەمى باسا ءمان بەرىپ كەلەدى. ءبىزدىڭ جەتىستىكتەرىمىز – وسىنداي قولداۋدىڭ جانە ۇلكەن كوماندانىڭ بىرلەسكەن جۇمىسىنىڭ ناتيجەسى», دەدى ماۋلەن اشىمباەۆ.
سالتاناتتى ءىس-شارا بارىسىندا تۋريزم جانە سپورت ءمينيسترى ەرمەك مارجىقپاەۆ ءسوز سويلەپ, مۇمكىندىگى شەكتەۋلى جاندارعا ارنالعان بىرەگەي جوباعا قاتىستى پىكىر ءبىلدىردى.
«بۇل سپورتتىق ءىس-شارا – ەلىمىزدەگى بالالار, جاستار مەن ەرەسەكتەر اراسىنداعى بىرەگەي جوبا. مينيسترلىك مۇمكىندىگى شەكتەۋلى جاندارعا دەنە شىنىقتىرۋ جانە سپورتپەن شۇعىلدانۋعا قولايلى جاعداي جاسالعان. كەيىنگى جىلدارى ەلىمىزدە بوچچا قارقىندى دامىپ كەلە جاتىر. بۇگىندە بوچچامەن ەلىمىزدىڭ 17 وڭىرىندە 200-دەن استام ادام اينالىسادى», دەدى ەرمەك مارجىقپاەۆ.
ايتا كەتەيىك, قازاقستان ۇلتتىق قۇراماسىنىڭ قۇرامىندا 26 سپورتشى بار. ەل سپورتشىلارى جىل سوڭىنا دەيىن پولشا مەن باحرەيندە وتەتىن ەكى حالىقارالىق رەيتينگتىك جارىسقا قاتىسۋدى جوسپارلاپ وتىر.
ايتا كەتەيىك, فينليانديانىڭ لاحتي قالاسىندا وتكەن سايىستا قۋانىش اسقاربەكوۆ جەكەلەي سىندا قولا مەدال ولجالادى. سونداي-اق كوماندالىق جارىستا دا قۋانىش اسقاربەكوۆ, يتيانا شىڭعىسحانوۆا جانە الەكساندر قۇرمانتاەۆ ۇزدىك ۇشتىكتەن كورىندى. ودان بولەك, جەكەلەي سىندا يتيانا شىڭعىسحانوۆا – ءتورتىنشى, مەرۋەرت تىلەبالدى – بەسىنشى, بالجان بولەكپاەۆا – التىنشى جانە تەمىرلان التىنسارى سەگىزىنشى ورىن العانىن ايتا كەتكەن ءجون.