«قارلى, جاڭبىرلى ماۋسىم». جازدىڭ العاشقى ايىندا اۋا رايى قانداي بولادى؟

مەتەورولوگتاردىڭ مالىمەتىنشە, ماۋسىم ايىنىڭ العاشقى ونكۇندىگىندە قازاقستان اۋماعىندا تۇراقسىز اۋا رايى ساقتالادى. 

ءجيى جاڭبىر جاۋىپ, كەي كۇندەرى نوسەر قۇيادى. نايزاعاي ويناپ, قاتتى جەل سوعىپ, بۇرشاق جاۋى دا ىقتيمال. ءتىپتى ونكۇندىكتىڭ باسىندا جانە ورتاسىندا رەسپۋبليكانىڭ سولتۇستىگىندە, ورتالىعىندا, شىعىسىندا, وڭتۇستىك-شىعىس اۋداندارىنىڭ تاۋلى جانە تاۋ بوكتەرىندە تۇندە قارعا ۇلاساتىن جاڭبىر جاۋادى دەپ بولجانىپ وتىر.

ال اۋا تەمپەراتۋراسى ءجيى قۇبىلادى.

«ەلدىڭ سولتۇستىك-باتىسىندا, سولتۇستىگىندە, ورتالىعىندا, شىعىسىندا تۇندە سىناپ باعانى -5+3°س-تان +2+10°س-قا دەيىن, كۇندىز +5+13°س-تان +20+28°س-تى كورسەتسە, قازاقستاننىڭ وڭتۇستىك جارتىسىندا تۇندە -3+5°س-تان +8+15°س-قا دەيىن, كۇندىز +13+23°س-تان +25+30°س-قا دەيىن جىلى تەمپەراتۋرا بولادى. باتىستا كۇن رايى تۇندە +8+18°س-تان -3+7°س-قا دەيىن, كۇندىز +18+25°س-تان +8+15°س-قا جەتەدى», دەلىنگەن «قازگيدرومەت» حابارلاماسىندا.

ايدىڭ ەكىنشى جانە ءۇشىنشى ونكۇندىگىندە يران اۋداندارىنان كەلەتىن جىلى اۋا ماسسالارىنىڭ اسەرىنەن اۋا تەمپەراتۋراسى بىرتىندەپ جوعارىلايتىنى بولجانعان. 

«رەسپۋبليكانىڭ سولتۇستىگىندە, ورتالىعىندا, شىعىسىندا اۋا تەمپەراتۋراسى تۇندە +10+18°س دەيىن, كۇندىز +25+35°س, وڭتۇستىك جارتىسىندا تۇندە +15+23°س دەيىن, كۇندىز +30+40°C ىستىق بولادى.

ماۋسىم ايىنىڭ ەكىنشى جانە ءۇشىنشى ونكۇندىگىنىڭ كەي كۇندەرىندە اتموسفەرالىق فرونتتاردىڭ وتۋىمەن نايزاعاي ويناپ, جاڭبىر جاۋادى. وسى كۇندەرى ىستىق باسەڭدەيدى. سولتۇستىكتە, ورتالىق جانە شىعىس ايماقتاردا اۋا تەمپەراتۋراسى كۇندىز +15+25°س دەيىن, وڭتۇستىكتە +20+28°س-قا جەتەدى», دەلىنگەن «قازگيدرومەت» حابارلاماسىندا.

جالپى ماۋسىم ايىندا ورتاشا ايلىق اۋا تەمپەراتۋراسى رەسپۋبليكانىڭ باسىم بولىگىندە نورمادان 1-2° جوعارى, ەلىمىزدىڭ باتىس ايماقتارىندا نورمادا بولادى.

ال جاۋىن-شاشىن مولشەرى رەسپۋبليكانىڭ باسىم بولىگىندە نورما شاماسىندا, ەلدىڭ قيىر باتىسىندا نورمادان كوپ, قازاقستاننىڭ وڭتۇستىك, ورتالىق وڭىرلەرىندە نورمادان از بولاتىنى بولجانىپ وتىر.