ىشكى ىستەر مينيسترلىگى وزدەرىن پوليتسيا قىزمەتكەرلەرى رەتىندە تانىستىرىپ جۇرگەن ءبىر توپ ادامعا قاتىستى پىكىر ءبىلدىردى, دەپ حابارلايدى Egemen.kz.
WhatsApp جەلىسىندە وزدەرىن پوليتسيا قىزمەتكەرلەرى رەتىندە تانىستىرىپ جۇرگەن ءبىر توپ ادام ءۇي-ءۇيدى ارالاپ جۇرگەنى تۋرالى حابارلاما تاراپ جاتىر. ولار الداعى حالىق ساناعى الدىندا بارلىعىندا جارامدى جەكە كۋالىگى بار-جوعىن تەكسەرۋ كەرەك ەكەنىن العا تارتادى. بۇل رەتتە ولار ىشكى ىستەر مينيسترلىگىنىڭ رامىزدەرى بار قۇجاتتار مەن بلانكىلەردى ۇسىنادى.
«ولار جالعان فورما كيىپ الىپ, ۇيلەردى ارالاپ, ۇرلىققا تۇسەدى. بوتەن ادام ۇيىڭىزگە كەلىپ: «مەن ءسىزدىڭ فوتوسۋرەتىڭىزدى/ساۋساق ءىزىڭىزدى قانداي دا ءبىر سحەمانىڭ بولىگى رەتىندە الۋىم قاجەت» دەپ ايتۋى مۇمكىن. ولاردا نوۋتبۋك, بيومەتريالىق قۇرىلعى جانە ازاماتتاردىڭ اتى-ءجونى جازىلعان ءتىزىم بار. ولار ءتىزىمدى كورسەتىپ, جوعارى ايتىلعان اقپارتتاردى الۋعا تىرىسادى», دەلىنگەن حابارلامادا.
ۆەدومستۆونىڭ مالىمەتىنشە, ىشكى ىستەر مينيسترلىگىنىڭ قىزمەتكەرلەرى مۇنداي تەكسەرىس جۇرگىزبەيدى.
«مۇنداي الاياقتىق فاكتىلەرى رەسپۋبليكا اۋماعىندا تىركەلگەن جوق. ءىىم جەكە كۋالىكتەرىن تەكسەرۋ, سۋرەتكە ءتۇسىرۋ جانە ساۋساق ىزدەرىن الۋ ماقساتىندا تۇرعىندار اراسىندا تەكسەرىس جۇرگىزبەيدى. قىلمىستىق كودەكستىڭ 274-بابىنا سايكەس كورىنەۋ جالعان اقپارات تاراتقانى ءۇشىن قىلمىستىق جاۋاپكەرشىلىك كوزدەلەتىنى تۋرالى ەسكەرتەمىز», دەپ حابارلادى ۆەدومستۆونىڭ ءباسپاسوز قىزمەتى.
ىشكى ىستەر مينيسترلىگى ازاماتتاردى قىراعى بولۋعا جانە جەكە دەرەكتەر تۋرالى اقپاراتتى بەيتانىس ادامدارعا بەرمەۋگە شاقىرادى.