سينوپتيكتەر دۇيسەنبى, 27 مامىرعا ارنالعان قازاقستانداعى اۋا رايىنىڭ جالپى بولجامىن جاريالادى, دەپ حابارلايدى Egemen.kz.
سينوپتيكتەردىڭ بولجامى بويىنشا, قازاقستاننىڭ باسىم بولىگىندە جاۋىن-شاشىن بولادى, ەلىمىزدىڭ سولتۇستىگى مەن شىعىسىندا قاتتى جاڭبىر جاۋىپ, سوڭى قارعا ۇلاسۋى مۇمكىن.
«ەلدىڭ باسىم بولىگىندە تۇندە جاۋىن-شاشىن, شىعىستا قاتتى جاۋىن-شاشىن (جاڭبىر, قار), ەلىمىزدىڭ سولتۇستىك-شىعىسىندا دا نوسەر جاڭبىر بولادى دەپ كۇتىلەدى. ەلىمىزدىڭ وڭتۇستىگىندە عانا انتيتسيكلوننىڭ اسەرىنەن جاۋىن-شاشىنسىز اشىق اۋا رايى ساقتالادى. رەسپۋبليكامىز بويىنشا جەلدىڭ ەكپىن الۋى ءتان. سولتۇستىك وڭىردە بۇرشاق تۇسەدى, ورتالىعىمىزدا قاتتى جەل تۇرادى, وڭتۇستىك-شىعىستا تۇنگى ۋاقىتتا تۇمان بولادى دەپ بولجانادى», دەپ حابارلادى «قازگيدرومەت» رمك.تۇندە اقمولا, قاراعاندى, ۇلىتاۋ, سولتۇستىك قازاقستان وبلىستارىنىڭ باتىسىندا, سولتۇستىگىندە توپىراق بەتى قاتادى, تۇركىستان وبلىسىنىڭ تاۋلى اۋداندارىندا سىناپ باعانى 1-2 گرادۋس سۋىقتى كورسەتەدى دەپ كۇتىلەدى.
قوستاناي وبلىسىنىڭ وڭتۇستىگىندە, اتىراۋ وبلىسىنىڭ باتىسىندا, وڭتۇستىگىندە, قىزىلوردا ءوڭىرىنىڭ شىعىسىندا, باتىسىندا, باتىس قازاقستان وبلىسىنىڭ وڭتۇستىك-باتىسىندا, اباي وبلىسىنىڭ ورتالىعىندا ءورت قاۋپى جوعارى بولادى. اباي وبلىسىنىڭ وڭتۇستىگىندە, جەتىسۋ وبلىسىنىڭ شىعىسىندا, تۇركىستان وبلىسىنىڭ شولەيتتى اۋداندارىندا توتەنشە ءورت قاۋپى كۇتىلەدى.