تاعى ءبىر وقۋ جىلى اياقتالدى. بيىل وبلىس بويىنشا 11-سىنىپتى 8 240 تۇلەك ءتامامداپ, 6–14 مامىر ارالىعىندا تەستىلەۋدىڭ ءۇشىنشى كەزەڭىنە قابىلدانعان وتىنىشكە سايكەس ولاردىڭ 89,7 پايىزى ۇبت-عا قاتىسادى. بەسىنشى شىلدەگە دەيىن سوزىلاتىن باستى ءبىلىم سىناعىندا تۇلەكتەر قىزىلوردا قالاسى, ارال, قازالى, جاڭاقورعان اۋداندارىنداعى تەستىلەۋ پۋنكتتەرىندە تەست تاپسىرادى.
وسى وقۋ جىلىندا حالىقارالىق وليمپيادالار مەن عىلىمي جوبالار كونكۋرسىنا 25 وقۋشى قاتىسىپ, 16-سى جۇلدەلى ورىندارعا يە بولىپتى. جالپى ءبىلىم بەرەتىن پاندەر بويىنشا پرەزيدەنتتىك, رەسپۋبليكالىق, وليمپيادا جانە عىلىمي جوبا كونكۋرسىنىڭ قورىتىندى كەزەڭىنە جەتكەن 121 وقۋشىنىڭ 30 پايىزى جۇلدەلى ورىن ەنشىلەگەن. العاش رەت اۋىل مەكتەپتەرى ءۇشىن ارنايى وتكەن وليمپيادانىڭ رەسپۋبليكالىق كەزەڭىنە جولداما العان 53 وقۋشىنىڭ اراسىنان 26 شاكىرت جۇلدەگەر بولىپ, وبلىس رەسپۋبليكا كولەمىندە «ۇزدىك وليمپيادالىق كوماندا» اتاندى.
ارينە, مۇنىڭ ءبارى جۇيەلى جۇمىستىڭ ناتيجەسى. 2023-2024 وقۋ جىلىندا جاراتىلىستانۋ-ماتەماتيكالىق باعىتتاعى 6 ءپان بويىنشا «تالدىسۋ», «قامباش» وليمپيادالار جانە قوسىمشا ءبىلىم بەرۋ ورتالىقتارىندا 6 كەزەڭدە جالپى ءبىلىم بەرۋ ۇيىمدارىنىڭ 7–10 سىنىپ وقۋشىلارى اراسىنان 960 بالا دايىندىق كۋرستارىنان ءوتتى.
وڭىردە پەداگوگ مارتەبەسىن جوعارىلاتۋ جانە شىعارماشىل مۇعالىمدەردى قولداۋ باعىتىنداعى باستامالار دا جەمىسسىز ەمەس. وقۋ-اعارتۋ مينيسترلىگى ۇيىمداستىرعان جىل سايىنعى «ۇزدىك پەداگوگ» رەسپۋبليكالىق كونكۋرسىنان 2022 جىلى 4 پەداگوگ جەڭىمپاز اتانسا, 2023 جىلى 5 مۇعالىم وسى اتاققا قول جەتكىزىپ, ارقايسىسى 3 ملن تەڭگە كولەمىندە گرانت يەلەندى.
بيىلعى وقۋ جىلىن بىتىرەتىندەر اراسىندا 11-سىنىپتى 8 240 تۇلەك اياقتاپ, ۇلكەن ومىرگە قادام باسادى. ولاردىڭ 589-ى «التىن بەلگىگە» ۇمىتكەر سانالادى. توعىزىنشى سىنىپتى «ۇزدىك اتتەستاتقا» اياقتاۋعا ءۇمىتتى شاكىرت سانى 2 014 بولىپ تۇر.
وقۋ-اعارتۋ مينيسترلىگى تاراپىنان ءبىلىم بەرۋ ۇيىمدارىنداعى مەكتەپ ءبىتىرۋ ءىس-شارالارىن وتكىزۋدىڭ تۇجىرىمداماسىنا ساي 24 مامىر كۇنى ء«بىلىمىم – وتانىما» 1–10 سىنىپ بويىنشا بىرىڭعاي تاربيە ساعاتى وتكىزىلىپ, 9, 11 سىنىپ تۇلەكتەرى «مەن. مەكتەپ. ۇستاز» اتتى ەسسە جازدى. وندا ءوزىنىڭ وقىپ شىققان مەكتەبىنە ىستىق ىقىلاسىن, ۇستازعا العىسىن ءبىلدىردى. «مەكتەبىم, ساعان مىڭ العىس!» تاقىرىبىنداعى 11-سىنىپ وقۋشىلارىنا ارنالعان ءىس-شارا بۇگىن ءوتتى.
جالپى ايماقتا 1–10 سىنىپ ارالىعىندا 173 859 وقۋشى بار. وسى وقۋشىلاردىڭ 98 پايىزىن جازعى تىنىعۋ لاگەرلەرىنە جىبەرىپ, ەڭبەكپەن قامتۋعا بارلىق قارجى كوزدەرىنەن 919,4 ملن تەڭگە جۇمسالادى. وبلىس كولەمىندە جازعى دەمالىستى ۇيىمداستىرۋعا 2 518 پەداگوگ, 38 بەلسەندى ستۋدەنت پەن 23 ەرىكتى تارتىلادى.
قىزىلوردا