بايقوڭىر اۋدانى اكىمدىگى مەن كاسىپكەرلەر تۇرعىندارمەن كەزدەستى. جيىندا بايقوڭىر اۋدانىندا ورنالاسقان اپاتتى ءۇي يەلەرىن جاڭا باسپاناعا كوشىرۋ, اۋماقتى رەنوۆاتسيالاۋ ماسەلەسى تالقىلاندى, دەپ جازادى Egemen.kz.
اكىمدىك مالىمەتىنشە, اتالعان اۋدانداعى 240 گەكتار رەنوۆاتسيادان وتەدى. جاڭارتۋ باعدارلاماسى شەڭبەرىندە 2024 جىلى 60 اپاتتى ءۇيدىڭ (شامامەن 4200 ادام) تۇرعىندارىن 1400 جاڭا پاتەرگە كوشىرۋ جوسپارلانعان.
اۋقىمدى قۇرىلىس جۇمىستارىن جۇرگىزۋ ءۇشىن BI-Group, «موي دوم» جانە Galamart سىندى ءىرى كومپانيالار تارتىلادى.
تۇرعىندار كەلىسىمى نەگىزىندە ەگەمەن قازاقستان مەن كەنەسارى, يمانوۆ پەن بەيسەكباەۆ, تاحا حۋسەين مەن تاشەنەۆ كوشەلەرىنىڭ قيىلىسىندا جۇمىستار باستالدى.
«ەسكى تۇرعىن ءۇي ماسەلەسىن شەشۋدە كاسىپكەرلەردىڭ الەۋەتىن جۇمىلدىرۋ جانە جەكە قۇرىلىس سالۋشىلاردىڭ ينۆەستيتسيالىق بەلسەندىلىگىن ىنتالاندىرۋ قاجەت. وسىلايشا, اپاتتى جانە توزىعى جەتكەن تۇرعىن ءۇي ماسەلەلەرى بىرلەسكەن كۇش-جىگەرمەن شەشىلەدى. ناتيجەسىندە قالانىڭ ورتالىق بولىگىمەن بىرگە ونىڭ شەتى دە داميدى, تيىسىنشە قالانىڭ ەسكى بولىگىنىڭ كەلبەتى دە وزگەرەدى», دەدى بايقوڭىر اۋدانىنىڭ اكىمى تالعات راحمانبەردى.
جاڭارتۋ جۇمىستارى تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان.
جەرگىلىكتى تۇرعىندارمەن كەزدەسۋدە «موي دوم» كومپانياسىنىڭ وكىلى ايبەك ەسەەۆ ولاردىڭ اپاتتىق مۇلكىن ءتيىستى زاڭنامانى باسشىلىققا الا وتىرىپ باعالاۋدان كەيىن, ءوزارا كەلىسىم بويىنشا ساتىپ الۋعا دايىن ەكەنىن اتاپ ءوتتى.
استانانىڭ تۇرعىن ءۇي قورىن جاڭعىرتۋ مەن رەنوۆاتسيانىڭ 2028 جىلعا دەيىنگى مەملەكەتتىك باعدارلاماسى اياسىندا بايقوڭىر اۋدانىنداعى اسان قايعى كوشەسىندە التى جولاقتى جول سالىنادى. بۇل جول اممان كوشەسىنەن تاحا حۋسەين كوشەسى ارقىلى الاش تاس جولىنا دەيىن سوزىلادى. جوعارىدا اتالعان ينۆەستورلاردىڭ كومەگىمەن وڭ جانە سول جاعالاۋدى تىكەلەي بايلانىستىرىلادى.