كەڭەس وداعىنىڭ باتىرى, حالىق قاھارمانى, ەلىمىزدىڭ تۇڭعىش قورعانىس ءمينيسترى, ارميا گەنەرالى ساعادات نۇرماعامبەتوۆ اتىنداعى اسكەري كوللەدجدە باتىردىڭ عاسىرلىق مەرەيتويىنا وراي كونفەرەنتسيا ءوتتى.
ءىس-شاراعا «Tayelsiz Qazaqstannyn Halyq Batyrlary» رقب باسشىسى, حالىق قاھارمانى, گەنەرال-لەيتەنانت باقىتجان ەرتاەۆ, «قارۋلى كۇشتەر ارداگەرلەرى» رقب توراعاسىنىڭ ورىنباسارى, گەنەرال-مايور مارات ناعۇمانوۆ, قورعانىس مينيسترلىگى اسكەري ءبىلىم جانە عىلىم دەپارتامەنتى باسشىسىنىڭ ورىنباسارى, پولكوۆنيك امانگەلدى توعىسوۆ, ۇلتتىق قورعانىس ۋنيۆەرسيتەتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, م.جۇماباەۆ اتىنداعى حالىقارالىق كوللەدجدىڭ وقىتۋشىلارى, اسكەري وقۋ ورنىنىڭ كادەتتەرى مەن ۇلاندارى قاتىستى.
ءىس-شارا اسكەري كوللەدج اۋماعىندا ورنالاسقان ساعادات نۇرماعامبەتوۆتىڭ بيۋستىنە گۇل شوقتارىن قويۋدان باستالدى. سالتاناتتى راسىمگە قاتىسۋشىلار باتىردى ءبىر مينۋت ءۇنسىز تۇرىپ, ەسكە الدى.
قارۋلى كۇشتەردىڭ مەملەكەتتىك اسكەري-تاريحي مۋزەيىنىڭ قولداۋىمەن كوللەدجدە باتىردىڭ ءومىربايانىنىڭ كەزەڭدەرىن بەينەلەيتىن فوتوكورمە, ايگىلى گەنەرالعا ارنالعان مۇراجاي ەكسپوزيتسياسى اشىلدى. وندا گەنەرال فورماسى, كيتەلى, ەكىنشى دۇنيەجۇزىلىك سوعىستا پايدالانعان كومانديرلىك سومكەسى مەن كارتاسى, ساعادات نۇرماعامبەتوۆتىڭ بەينەسى توقىلعان كىلەم ىلىنگەن.
جيىنعا قاتىسۋشىلارعا ارناپ قارۋلى كۇشتەردىڭ ارداگەرلەرى باقىتجان ەرتاەۆ پەن مارات ناعۇمانوۆ قۇتتىقتاۋ ءسوز سويلەدى. كونفەرەنتسيادا ۇلتتىق قورعانىس ۋنيۆەرسيتەتىنىڭ اعا وقىتۋشىسى, پولكوۆنيك اسقار ماكيپوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اسكەري كافەدراسىنىڭ وقىتۋشىسى, پولكوۆنيك اتىعاي بالعابەكوۆ, م.جۇماباەۆ اتىنداعى حالىقارالىق كوللەدجىنىڭ وقىتۋشىلارى, پودپولكوۆنيك ەرلان سەرىكباەۆ پەن كاپيتان سەرىك سۇلەيمەنوۆ بايانداما جاسادى.
جيىن بارىسىندا ءسوز سويلەگەندەر ساعادات نۇرماعامبەتوۆتىڭ ءومىرى مەن جاۋىنگەرلىك جولىنىڭ جاستاردى اسكەري-پاتريوتتىق تاربيەلەۋ ىسىندەگى ماڭىزىن اتاپ ءوتتى. قازاقستاننىڭ تۇڭعىش قورعانىس ءمينيسترىنىڭ ەسىمىمەن اتالاتىن اسكەري كوللەدج تاربيەلەنۋشىلەرى ساعادات قوجاحمەت ۇلىنىڭ ءومىربايانىن جاقسى بىلەتىنىن ايتا كەتكەن ءجون. باتىردىڭ قۇرمەتىنە وقۋ ورنىنىڭ حورى «ساعادات» ءانىن, وتان قورعاۋشىلارعا ارناپ باسقا دا شىعارمالار ورىندادى. ال جاس ۇلان امزەحان ءساتجان حالىق قاھارمانى ساعادات نۇرماعامبەتوۆ تۋرالى شىعارعان ولەڭىن وقىپ بەردى.