پەرنەتاقتادان ورىن العان تىنىس بەلگىلەرىنىڭ ارمانى جوق. ويتكەنى ولار تالاي ءداۋىردى ارتقا تاستاپ, بۇل زامانعا امان-ەسەن جەتتى. الدە دە پايداعا جاراپ تۇر. بىراق كومپيۋتەر كەزەڭىنە وتە الماي قالعان بەيمالىم بەلگىلەر دە بارشىلىق. سونىڭ ءبىرى – مىسقىل بەلگىسى.
مۇنىڭ ءتۇر-سيپاتى نەگىزىنەن ايناعا قاراپ تۇرعان سۇراق بەلگىسىنە ۇقسايدى. تەك يرەگى ءسال كۇردەلىرەك. سىرتقى ءپىشىنى اسا قاتتى تاڭعالدىرمادى, بىلەم. بىراق ونىڭ سويلەم سوڭىندا ەمەس, سويلەمنىڭ الدىندا تۇراتىنى وزگەدە جوق ەرەكشەلىك ەمەس پە؟ مىسقىل بەلگىسىن ءحىح عاسىردان باستاپ قولدانۋدى العاش ۇسىنعان – جازۋشى الكانتەر دە برام. 1966 جىلى جازۋشى ەرۆە بازەن «Plumonus L`Oiseau» كىتابىندا ءدال وسى بەلگىنى حاتقا تۇسىرگەن. الايدا ۋاقىت وتە كەلە ءۇتىر, نۇكتە باستاعان تىنىس بەلگىلەرى مىسقىل بەلگىسىنىڭ مىسىن باسىپ كەتتى.
ينتەرروبانگ
بۇل بەلگىنىڭ اتاۋى توسىن بولعانىمەن, قىزمەتى بارشاعا ءمالىم. تۇسىنىكتىرەك بولۋ ءۇشىن باسىنان باستايىق...
لەپ بەلگىسى مەن سۇراۋ بەلگىسى تۇتاسىپ كەتكەن تىنىس بەلگىنى 1962 جىلى «New York Advertising Agency» جارناما اگەنتتىگىنىڭ باسشىسى مارتين سپەكتەر ويلاپ تاپتى. ول ونى «ينتەرروبانگ» دەپ اتاپ, ريتوريكالىق سۇراۋلى سويلەمدەردە قولدانۋعا بولادى دەپ ءتۇسىندىردى. ياعني جاۋابى وزىنەن-ءوزى ايقىن نارسەنى اسەرلى لەپپەن, سۇراۋ تۇرىندە جەتكىزگەندە ينتەرروبانگ ىسكە كىرىسەدى. ال ءسوزدىڭ توركىنىنە كەلسەك, ء«interrogاtىvus» لاتىن تىلىنەن اۋدارعاندا سۇراۋشى, «bang» ءسوزى جارىلىس دەگەن ماعىنانى بىلدىرەدى. بىراق بۇل كۇندەرى سۇراۋ بەلگىسى مەن لەپ بەلگىسى بۇرىنعىداي ەمەن-جارقىن ارالاسپايتىنى بەلگىلى.
ماحاببات بەلگىسى
ەرۆە بازەننىڭ «Plumonus L`Oiseau» كىتابىندا ماحاببات بەلگىسىنىڭ دە قاراسى ءبىر كورىنگەن.
بايقاساق, مۇندا ەكى سۇراۋ بەلگىسى ءبىر-بىرىنە قاراپ تۇر. ءبىر قىزىعى, ولار ەكەۋ بولسا دا, استىنداعى نۇكتەلەرى ورتاق. ياعني ءبىر كوزىڭ ك ۇلىپ, ەكىنشى كوزىڭ جىلاي المايتىنى سەكىلدى ماحابباتتا «مەن» دەگەن ۇعىم جوقتىعىن وسى تىنىس بەلگىسى ايقىن اڭعارتىپ تۇر. ەگەر ول بۇل زامانعا جەتىپ, پەرنەتاقتادان ورىن السا, ەڭ تانىمال تىنىس بەلگىسى بولار ەدى...