ۇلىتاۋ وبلىسىندا «كەڭگىر كەرىمسالى» اتتى رەسپۋبليكالىق پوەزيا فەستيۆالى ءوتتى. جاس اقىنداردىڭ قالامىن ۇشتاپ, تالابىن ارتتىرۋ ماقساتىندا جاسالعان ولەڭ مەرەكەسى وبلىس قۇرىلعالى ءبىرىنشى رەت ۇيىمداستىرىلدى. ءىس-شارانىڭ اشىلۋ سالتاناتى ورتالىقتاعى اباي ەسكەرتكىشىنىڭ الدىندا ءوتتى. جيىلعان جۇرتشىلىق باس اقىننىڭ رۋحىنا تاعزىم ەتىپ, گۇل شوقتارىن قويدى. فەستيۆالعا قۇرمەتتى قوناق رەتىندە «وتان» وردەنىنىڭ يەگەرى ءجۇرسىن ەرمان, جىرشى, پروفەسسور الماس الماتوۆ, اباي اتىنداعى مەملەكەتتىك سىيلىقتىڭ لاۋرەاتى عالىم جايلىباي, قازاقستان جازۋشىلار وداعى باسقارما توراعاسىنىڭ ورىنباسارى باۋىرجان جاقىپ ارنايى شاقىرىلدى.
اشىلۋ راسىمىنەن كەيىن ورتالىقتاندىرىلعان بالالار مەن جاسوسپىرىمدەر كىتاپحاناسىندا «جاڭا كەزەڭ. جاس قالامگەر» دوڭگەلەك ۇستەلى ءوتتى. وندا قوناقتار مەن جەرگىلىكتى قالامگەرلەر ءسوز سويلەپ, ادەبيەتتىڭ دامۋى ۇدەرىسى حاقىندا پىكىر الماستى. «كەڭگىر كەرىمسالى» فەستيۆالى كەمەرىنە تولعان كەڭگىردىڭ سۋى سەكىلدى جىلدان-جىلعا ايدىندانىپ, ايبىندانا بەرەتىن باياندى مەرەكەدەي كورىنىپ وتىر. حالىقارالىق دەڭگەيگە شىعاتىنىنا دا كامىل سەنەمىن. بۇل – پوەزيا سالتاناتى ۇلىتاۋ ءوڭىرىنىڭ رۋحاني ومىرىندەگى ۇلكەن جاڭالىق», دەدى ع.جايلىباي. ءىس-شارا س.قوجامقۇلوۆ اتىنداعى مۋزىكالىق دراما تەاترىندا «كەڭگىردىڭ قوڭىر كەشىندە» اتتى پوەزيا كەشىمەن جالعاسىن تاپتى. باۋىرجان جاقىپ ولەڭ وقىپ, باسقارما توراعاسىنىڭ قۇتتىقتاۋىن جەتكىزدى. «جاس اقىنداردىڭ الدىندا ۇلكەن جول كۇتىپ تۇر. سول قاسيەتتى ساپار كيەلى ۇلىتاۋ دالاسىنان باستالىپ, قازاقستان اسپانىنا جىر جۇپارىن اڭقىتسا, ۇلت رۋحانياتىنا ۇلكەن ولجا سالىندى دەگەن ءسوز», دەدى ول.
جەزقازعاندىق ءتورت قالامگەر – مۇقاش سەيىتقازينوۆ, ەرنۇر سەيداحمەت, سارا سماعۇل, تولەش اسانعا مۇشەلىك بيلەت پەن توسبەلگى تاپسىرۋ ءراسىمى ءوتتى. سونىمەن قاتار ۇلىتاۋ وبلىسى جاس اقىندارىنىڭ «كەڭگىر كەرىمسالى» انتولوگياسى جانە جەزقازعاندىق جانات ابدىعوجيننىڭ «ارنادىم ساعان» كىتابى وقىرمانعا جول تارتتى.
فەستيۆال جەرگىلىكتى اقىن مۇقاعالي سەيىتقازىنىڭ «ماعان سەنى جاقسى كورگەن ۇنايدى» اتتى ادەبي-سازدى كەشىمەن اياقتالدى.