كەرەكۋدىڭ جالاۋلى اۋلىندا تاسقىن سۋدان زارداپ شەككەن بەس وتباسىنا جاڭادان سالىنىپ جاتقان ۇيلەر شىلدە ايىندا تاپسىرىلادى دەپ كۇتىلىپ وتىر. قازىرگى ۋاقىتتا ەكى باسپانانىڭ قۇرىلىسى 90 پايىزعا اياقتالعان.
بيىل ءساۋىر ايىندا سۋ تاسقىنىنا بايلانىستى اقتوعاي اۋدانى جالاۋلى اۋلىندا توتەنشە جاعداي جاريالانعان ەدى. كەيىن سۋ تاسقىنى كەزىندە زارداپ شەككەن جانە كوميسسيانىڭ شەشىمىمەن تۇرۋعا جارامسىز دەپ تانىلعان 5 ءۇي انىقتالىپ, ولاردىڭ ورنىنا جاڭا قۇرىلىستار سالىنا باستادى.
وسى اپتا باسىندا پاۆلودار وبلىسىنىڭ اكىمى اسايىن بايحانوۆ ەلدى مەكەنگە ارنايى بارىپ, بيىكتەۋ تۇسقا سالىنىپ جاتقان جاڭا ۇيلەردىڭ ساپاسىن تەكسەردى. بۇل باسپانالاردىڭ قۇرىلىسى ءساۋىر ايىنىڭ باسىندا باستالىپ, قۇرىلىستا 30 ادام جانە 2 تەحنيكا جۇمىس ىستەپ جاتىر. قازىرگى ۋاقىتتا بارلىق ءۇيدىڭ قابىرعالارى بوي كوتەرىپ, ەكى ۇيدەگى قۇرىلىس جۇمىستارى 90 پايىزعا ورىندالعان.
«جاڭا ۇيلەردى سالۋعا ERG توبى قولداۋ ءبىلدىردى. جۇمىستاردى جەرگىلىكتى «ستالمونتاج» جشس جۇرگىزىپ جاتىر. اۋىل تۇرعىندارىنا ارنالعان ۇيلەردى وسى اۋداننىڭ جاۋاپتى كاسىپكەرىنىڭ سالۋى مەن ءۇشىن ماڭىزدى بولدى. ۇيلەرگە ۇزاق جاناتىن جىلىتۋ قازاندىقتارى, سۋدى بۇرۋعا ارنالعان شۇڭقىر ورناتىلادى جانە ورتالىق سۋ قۇبىرىنا قوسىلادى. تۇرعىن ۇيلەردىڭ كىلتتەرىن يەلەرىنە وسى جىلدىڭ شىلدە ايىنىڭ باسىندا تابىستاۋ جوسپارلانىپ وتىر. ۇيلەردى تولىعىمەن اياقتاپ, ادال تاپسىرۋدى جۇكتەدىم», دەدى ءوڭىر باسشىسى.
بۇعان قوسا جالاۋلى اۋلىندا بۇگىندە جالپى سىيىمدىلىعى 200 مىڭ تەكشە مەتر بولاتىن 3 جاڭا قازانشۇڭقىردىڭ قۇرىلىسى جالعاسىپ جاتىر. بۇل بولاشاقتا اۋىلدى سۋ باسۋ ماسەلەسىن كەشەندى شەشۋگە مۇمكىندىك بەرەدى. ونى دا شىلدە ايىنىڭ سوڭىنا دەيىن اياقتاۋ جوسپارلانعان.
اتاپ وتەيىك, پاۆلودار ءوڭىرى العاشقىلاردىڭ ءبىرى بولىپ سۋ تاسقىنى كەزىندە مۇلكى زارداپ شەككەن وبلىس تۇرعىندارىنىڭ بارلىق 125 ءوتىنىمى بويىنشا وتەماقى تولەدى.
پاۆلودار وبلىسى,
اقتوعاي اۋدانى,
جالاۋلى اۋلى