بۇقار جىراۋ مۋزەيىنە قاراپايىم اۋىل تۇرعىنى 1941 جىلى جارىق كورگەن «Qazaq ءاdebietj» (قازاق ادەبيەتى) حرەستوماتياسىن تاپسىردى. لاتىن قارپىندەگى بۇل وقۋ قۇرالى ورتا مەكتەپتىڭ 9-سىنىبىنا ارناپ شىعارىلعان ەكەن.
كونە وقۋلىق الماتى قالاسىنداعى قازاقتىڭ بىرىككەن مەملەكەتتىك باسپاسىنان شىققان. قۇراستىرۋشىسى – ادەبيەت زەرتتەۋشىسى, كەيىن فيلولوگيا عىلىمىنىڭ دوكتورى, ۇلتتىق عىلىم اكادەمياسىنىڭ كوررەسپوندەنت مۇشەسى, قازاق كسر ەڭبەك سىڭىرگەن عىلىم قايراتكەرى بولعان ەسماعامبەت ىسمايىلوۆ.
بۇل كىتاپ-وقۋلىقتىڭ ەرەكشەلىگى – مۇندا كەڭەس زامانىنىڭ العاشقى جىلدارى شىعارماشىلىعىنا تىيىم سالىنىپ, ەسىمدەرىن ەل ايتۋعا قورىققان تۇلعالارىمىزدىڭ ادەبي دۇنيەلەرى جارىق كورگەن.
حرەستوماتيادا ىبىراي التىنسارين, اباي قۇنانباي ۇلى, شاڭگەرەي بوكەەۆ, اقان سەرى قورامسا ۇلى, نارمامبەت ورمامبەت ۇلى, نۇرجان ناۋشاباەۆ, ءماشھۇر ءجۇسىپ كوپەەۆ, عۇمار قاراش, سپانديار كوبەەۆ, سۇلتانماحمۇت تورايعىروۆ, ءسابيت دونەنتاەۆ, ىعىلمان شورەكوۆ, تاعى باسقا ادەبيەت وكىلدەرىنىڭ, جالپى سانى 20 اقىن-جازۋشىنىڭ شىعارمالارى باسىلعان.
جادىگەر-كىتاپتى مۋزەيگە اقتوعاي اۋدانى مۇتكەنوۆ اۋىلىنىڭ تۇرعىنى, زەينەتكەر نۇراش بەيسەمباەۆا تاپسىردى. نۇراش مۇقاجانقىزىنىڭ ايتۋىنشا, حرەستوماتيانى اۋىلدىق مەكتەپتە ۇزاق جىلدار ۇستازدىق ەتكەن ءجۇسىپ تولەۋتەمىروۆ اتتى ەل اعاسى ساقتاپ كەلىپتى. كەيىن مەكتەپ كۇردەلى جوندەۋدەن وتكەن ۋاقىتتا ەسكى وقۋلىقتار اراسىنان تابىلعان.
پاۆلودار وبلىسى