ۇلى عالىم قانىش يمانتاي ۇلى ساتباەۆتىڭ تۋعانىنا 125 جىل تولۋىنا ارنالعان ءىس-شارالار ودان ءارى جالعاسىن تاۋىپ جاتىر. سونىڭ ءبىرى – 18–19 مامىر كۇندەرى ساتباەۆ قالاسىندا «قانىشتىڭ قازىنالى الەمى» تاقىرىبىمەن وتكەن رەسپۋبليكالىق ايتىس.
ايتىسقا قاتىسۋشىلار ەڭ اۋەلى قالا ورتالىعىنداعى ق.ساتباەۆ ەسكەرتكىشىنە گۇل شوقتارىن قويدى. ش.دىلدەباەۆ اتىنداعى كەنشىلەر مادەنيەت سارايىنىڭ تورىندە 14 اقىن باق سىناستى.
كوركەم وي, كەستەلى ءسوز ارقىلى اقىندار قانىش تۇلعاسىن لايىقتى سومداي ءبىلدى. ۇلى عالىمنىڭ ەلگە دەگەن شىنايى پەرزەنتتىك ماحابباتى, ەرلىككە پارا-پار ولشەۋسىز ەڭبەگى جان-جاقتى جىرلاندى.
«قازاقمىس» كورپوراتسياسىنىڭ بايگەسى – جەڭىل اۆتوكولىك ايتىسكەر مەيىربەك سۇلتانحانعا بۇيىردى.
اقىندار ءومىرجان كوپبوسىن, ديدار قاميەۆ, جانسايا مۋسينا, سەرىك قۋانعان, ايىم اسىلبەك العاشقى ۇشتىكتىڭ شوعىرىن قۇرادى.
كەزىندە شاحتالاردا شاڭ جۇتا ءجۇرىپ, قولدارىنان قالامىن تاستاماعان كەنشى اقىندار كاكىمبەك سالىقوۆ پەن شىنبولات دىلدەباەۆ اتىنداعى ارنايى سىيلىقتاردىڭ تاعايىندالۋى دا جاراسىمدى بولدى.
ۇلىتاۋ وبلىسى