14 ماۋسىم كۇنى ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ اقش مەملەكەتتىك حاتشىسى حيللاري كلينتونمەن تەلەفون ارقىلى سويلەستى. اڭگىمە بارىسىندا اڭگىمەلەسۋشى تاراپتار قىرعىزستانداعى جاعداي تۋرالى تولىققاندى پىكىر الماستى.
تاراپتار كوپتەگەن ادام قۇرباندىقتارىنا اكەلىپ سوقتىرعان زورلىق-زومبىلىقتىڭ قايتا ءوربىپ وتىرعاندىعىنا تەرەڭ الاڭداۋشىلىقتارىن ءبىلدىردى. اقش مەملەكەتتىك حاتشىسى قازاقستان پرەزيدەنتى نۇرسۇلتان نازارباەۆتىڭ كورشىلەس مەملەكەتتىڭ باسشىسى رەتىندە جانە ەقىۇ توراعاسى رەتىندە جۇمساپ وتىرعان كۇش-جىگەرىنە جوعارى باعا بەردى.
اڭگىمەلەسۋشى تاراپتار قىرعىزستاندى اۋىر داعدارىستان شىعارۋ ءۇشىن كومەك ۇيىمداستىرۋ ماقساتىندا ەقىۇ مەن بۇۇ-نىڭ كۇشىن بىرىكتىرۋ قاجەت دەگەن كەلىسىمگە كەلدى. سونىمەن قاتار, ولار ۋاقىتشا ۇكىمەتتى قاقتىعىسقا بايلانىسقان تاراپتارمەن بەلسەندى ءارى ءتيىمدى جۇمىس جاساۋعا, جالپى قىرعىزستان حالقىنىڭ مۇددەسى ءۇشىن ۇلتارالىق ءتوزىمدىلىك, سەنىم جانە كەلىسىمگە قاجەتتى جاعداي ۇيىمداستىرۋعا شاقىردى.
اڭگىمە قورىتىندىسى بويىنشا تاراپتار قىرعىزستانداعى جاعدايدى رەتتەۋگە باعىتتالعان ءىس-ارەكەتتەردى ۇيلەستىرۋ ماقساتىندا جاعدايدى ءارى قاراي باقىلاۋدا ۇستاپ, كەڭەستەردى جالعاستىرۋعا كەلىستى.