بۇگىن ۇكىمەت وتىرىسىنان كەيىن وتكەن بريفينگتە عىلىم جانە جوعارى ءبىلىم ءمينيسترى ساياسات نۇربەك 2025 جىلى وتەتىن ۇبت فورماتىندا وزگەرىس ەنگىزىلەتىنىن حابارلادى. كەلەر جىلى تەست تاپسىرۋدىڭ جاڭا فورماتى پيلوتتىق جوبا رەتىندە ىسكە قوسىلادى, دەپ جازادى Egemen.kz kaz.inform.kz-كە سىلتەمە جاساپ.
ساياسات نۇربەك ورتالىقتاندىرىلماعان جوعارعى وقۋعا ءتۇسۋ جۇيەسىنە قاراماستان, كەم دەگەندە ستۋدەنتتەردى باعالاۋ, سالىستىرۋ جانە ىرىكتەۋ ءۇشىن بەلگىلى ءبىر ستاندارت قاجەت ەكەنىن اتاپ ءوتتى.
«مينيسترلىك 2021 جىلدان باستاپ دۇنيەجۇزىلىك بانكتىڭ قولداۋىمەن ۇبت فورماتىن قايتا قۇرۋ جانە ەڭ باستىسى – تەست سۇراقتارىنىڭ مازمۇنىن تۇبەگەيلى قايتا وڭدەۋ بويىنشا ۇلكەن جوبانى ىسكە قوستى. الدىڭعى جىلى ءبىز ەكى باعىت بويىنشا جۇمىس ىستەدىك. ءبىرىنشىسى – SIT سياقتى تۇبەگەيلى جاڭا فورمات بويىنشا تەستتەردى دايىنداۋ, بارلىق سۇراقتاردى مازمۇندى تۇردە قايتا قاراۋ. وتكەن اپتادا بۇل كومپونەنت اياقتالدى. تەست دايىنداۋدى الەمگە ايگىلى فرانتسۋز كومپانياسى جۇرگىزدى. جاڭا مودەل بويىنشا 350 تەستولوگ دايىندالدى», دەدى عىلىم جانە جوعارى ءبىلىم ءمينيسترى.
ءمينيستردىڭ ايتۋىنشا, جاڭا مودەل بويىنشا دايىندالعان ماماندار ەندى SIT فورماتىنا ۇقساس جاڭا ادىستەمە بويىنشا سۇراقتار دايىندايدى. ساياسات نۇربەك باسقاراتىن ۆەدوموستۆو بيىل ۇبت بويىنشا اۋقىمدى پيلوتتىق جوبانى جۇزەگە اسىرۋ تەتىكتەرىن ەنگىزۋ دايىندىعىنا كىرىسەدى.
ء«بىز بازانى قۇرعاندا جاڭا ۇبت فورماتىن پيلوتتىق تۇردە باستاۋ ءۇشىن كەم دەگەندە 50 مىڭ سۇراق ازىرلەۋىمىز كەرەك. مۇندا وتە مۇقيات, ۇقىپتى بولۋىمىز قاجەت, ويتكەنى فورماتتىڭ كۇرت وزگەرۋى دە ۇلكەن پروبلەمالارعا الىپ كەلەدى, جوعارى سىنىپ وقۋشىلارىن وسى فورماتقا دايىنداۋ قاجەت. ءبىز پيلوتتىق جوبانى كەلەسى جىلى باستايمىز, جوبا ۇبت فورماتىن بىردەن وزگەرتپەيدى, بەلگىلى ءبىر پيلوتتىق رەجيمدە ىسكە قوسىلادى. بىرتە-بىرتە ءبىز SIT حالىقارالىق ستاندارتىنا كوشەمىز, وندا ءاربىر تالاپكەر ءوزى تەستىلەۋ ورنىن, ۋاقىتىن تاڭدايدى, دايىندالادى, تاپسىرادى, سەرتيفيكات الادى, سونىمەن وقۋعا تۇسەدى», دەدى ساياسات نۇربەك.