وتكەن جىلى ەرتىس-بايان وڭىرىندە مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ جانە ولار ءۇشىن قولجەتىمدى ورتانى قالىپتاستىرۋ ماقساتىندا 225 الەۋمەتتىك ينفراقۇرىلىم نىسانى قايتا بەيىمدەلگەن. قوعامدا قولجەتىمدى ورتا قۇرۋ مىندەتتەرى بىرتىندەپ ىسكە اسىپ كەلەدى.
قازىرگى ۋاقىتتا ەلىمىزدە 2025 جىلعا دەيىن قازاقستاندا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار, Amanat پارتياسىنىڭ 2023-2027 جىلدارعا ارنالعان جول كارتاسى جانە مەملەكەت باسشىسىنىڭ تاپسىرماسى بويىنشا ازىرلەنگەن «حالىقپەن بىرگە» جوباسى ىسكە اسىرىلىپ جاتىر. جوبادا قولجەتىمدىلىكتىڭ ينتەراكتيۆتى كارتاسى سايتىنا ەنگىزىلگەن ەل بويىنشا بەيىمدەلۋگە ءتيىس 35 مىڭنان اسا باسىم نىساندار ايقىندالدى. ونىڭ اياسىندا 2021-2022 جىلدارى 8 مىڭنان اسا نىسان بەيىمدەلدى. ال وتكەن جىلدان باستاپ 2027 جىلعا دەيىن جىل سايىن كەمىندە 5 مىڭ نىسان (5 جىلدا 27 مىڭ) بەيىمدەلۋگە ءتيىس دەگەن جوسپار بار. كەيىنگى ءۇش جىلدىڭ قورىتىندىسى بويىنشا ەلىمىزدە 13 857 نىسان وسى تالاپقا سايكەستەندىرىلدى.
پاۆلودار وبلىسىندا بىلتىر بەيىمدەلۋگە جوسپارلانعان 276 نىساننىڭ ىشىنەن جەرگىلىكتى اتقارۋشى ورگاندار 225 نىساندا مۇگەدەكتىگى بار ادامداردىڭ بارلىق ساناتى ءۇشىن بەيىمدەۋ جۇمىستارىن جۇرگىزدى. اتاپ ايتقاندا, 108 نىسان – ءبىلىم بەرۋ, 20 نىسان – دەنساۋلىق ساقتاۋ, 46-سى – مەملەكەتتىك مەكەمەلەر جانە تاعى باسقالار.
«مەنىڭ بايقاۋىمشا, دەنساۋلىق جاعدايىنىڭ ەرەكشەلىكتەرىنە بايلانىستى مۇگەدەكتىگى بار ادامدار ءۇشىن قولجەتىمدىلىكتى قامتاماسىز ەتۋ بويىنشا پاۆلودار قالاسىنداعى جاعداي جىل ساناپ جاقسارىپ كەلەدى. مەملەكەتتىك مەكەمەلەر مەن جەكە عيماراتتاردىڭ يەلەرى (دۇكەندەر, ءدارىحانالار, ت.ب.) ءوز نىساندارىن قۇرىلىس نورمالارىنا سايكەستەندىرىپ جاتىر. مىسال ءۇشىن, مەن ءۇيىمىزدىڭ جانىندا ورنالاسقان دۇكەنگە, قامزين كوشەسىندەگى پوشتا بولىمشەسىنە, ورتالىق ستاديونعا مۇگەدەكتىگى بار ادامداردىڭ كرەسلو-اربامەن كىرۋ ماسەلەسى بويىنشا كوڭىلىم تولمايتىنىن ايتىپ, ەسكەرتۋ جاساعان ەدىم. وتىنىشتەرىم تىڭدالىپ, بارلىعى تۇزەتىلدى, تابالدىرىقتار, پاندۋس ورناتىلدى», دەيدى ءبىرىنشى توپ مۇگەدەكتىگى بار نۇرلان قادىرقۇلوۆ.
ەڭبەك جانە الەۋمەتتىك قورعاۋ كوميتەتىنىڭ پاۆلودار وبلىسى بويىنشا اۋماقتىق دەپارتامەنتى مەملەكەتتىك باسقارۋ, دەنساۋلىق ساقتاۋ, الەۋمەتتىك قورعاۋ, مادەنيەت جانە وزگە دە سالالارداعى الەۋمەتتىك ينفراقۇرىلىم نىساندارىنا 70 تەكسەرۋ جۇرگىزگەن. ونىڭ قورىتىندىسى بويىنشا انىقتالعان كەمشىلىكتەردى جويۋ تۋرالى 65 ۇيعارىم بەرىلدى, 2,5 ملن تەڭگەدەن اسا سوماعا 12 اكىمشىلىك ايىپپۇل سالىندى.
پاۆلودار وبلىسى