پارجيدە وتەتىن پاراليمپيادا ويىندارىنىڭ باستالۋىنا 100 كۇن قالدى. 28 شىلدە – 8 تامىز ارالىعىندا وتەتىن تورتجىلدىقتىڭ باستى دوداسىنا قاتىساتىن سپورتشىلارىمىزدى قولداۋ ماقساتىندا سپورتتىق ءىس-شارا ءوتتى.
ەلوردادا وتكەن «قوزعالىستاعى الەم. وليمپيادا, پاراليمپيادا جانە دۇنيەجۇزىلىك كوشپەلىلەر ويىندارى – بىرلىكتە» اتتى بۇقارالىق ءىس-شاراعا وليمپيادا چەمپيوندارى, پاراليمپيادا ويىندارىنىڭ جۇلدەگەرلەرى, الەم چەمپيوندارى سەرىك ساپيەۆ, سۆەتلانا پودوبەدوۆا, راۋشان قويشىباەۆا سىندى ساڭلاقتار سپورتتىق ءىس-شاراعا قاتىسۋشىلارعا ساتتىلىك تىلەدى.
ۇلتتىق پاراليمپيادا كوميتەتىنىڭ باس حاتشىسى ولجاس اقپامبەتوۆ ۇلى الامانعا ليتسەنزيا يەلەنىپ, جاتتىعۋدى ۇدەتكەن سپورتشىلارعا جەڭىس تىلەپ, ساڭلاقتارىمىزدى قولداۋعا ۇندەدى.
«فرانتسيانىڭ پاريج قالاسىندا وتەتىن پاراليمپيادا ويىندارىنا قاتىسۋشىلار سپورتتىڭ 9 تۇرىنەن دوداعا ءتۇسۋ جوسپارلانىپ وتىر. ازىرگە ءبىزدىڭ سپورتشىلارىمىزدا 12 ليتسەنزيا بار, الدا ءالى دە جولداما تاراتىلاتىن تۋرنيرلەر بولادى. ءبىز پارا سپورتشىلارعا ساتتىلىك تىلەپ, قاشاندا جانكۇيەرلىك تانىتامىز. وسىنداي يگىلىكتى ءىس-شارالار وتكىزۋ پاراليمپيادالىق قوزعالىستىڭ دامۋى مەن ينكليۋزيۆتى قوعامنىڭ نىعايۋىنا اسەرىن تيگىزەدى», دەدى و.اقپامبەتوۆ.
پاۋەرليفتينگتەن ريو پاراليمپياداسىنىڭ كۇمىس جۇلدەگەرى, الەم كۋبوگىنىڭ جەڭىمپازى راۋشان قويشىباەۆا ەلىمىزدىڭ ءىرى قالالارىندا پارا سپورتشىلاردىڭ الاڭسىز جاتتىعاتىن ورتالىقتارى سالىنسا, الەمدىك دودالارداعى دەڭگەيىمىز بۇدان دا بيىكتەي تۇسەتىنىن جەتكىزدى. «استانا قالاسىندا پاراسپورتتان دايىندىق جۇرگىزەتىن وليمپيادالىق كەشەن بار. سونداي سپورتتىق ورتالىق الماتىدا الاتاۋدىڭ بوكتەرىنەن بوي كوتەرسە, قانداي عانيبەت! بارلىق قالادا سالىنباسا دا ءىرى مەگاپوليستە بولسا, سپورتتىق جەتىستىگىمىزدىڭ ارتۋىنا وراسان سەپتىگى تيەر ەدى. مەن پاۋەرليفتينگ سپورتىنا 45 جاسىمدا قاتىستىم, 50-گە تولعاندا ريو پاراليمپياداسىنىڭ كۇمىس مەدالىن ولجالادىم. دەمەك مۇمكىندىك جاس تالعامايدى, تەك تىنباي تەر توگىپ جاتتىعۋ قاجەت. پاريج پاراليمپياداسىنا ليتسەنزيا يەلەنگەن سپورتشىلارىمىز مەرەيىمىزدى اسىراتىنىنا سەنىمدىمىن», دەدى ر.قويشىباەۆا.
XVII جازعى پاريج-2024 پاراليمپيادا ويىندارىنا ەلىمىزدىڭ سپورتشىلارى پارا جەڭىل اتلەتيكا, پاراپاۋەرليفتينگ, پاراتاەكۆوندو, پاراۇستەل تەننيسى, ءپاراجۇزۋ, پارادزيۋدو, پاراكانوە, وتىرىپ وينايتىن ۆولەيبول جانە پاراوق اتۋدان قاتىسۋدى مەجەلەپ وتىر.