ەل ديقاندارى پايدالاناتىن اۋىل شارۋاشىلىعى تەحنيكاسىنىڭ 76 پايىزى توزعان. بۇل تۋرالى پالاتانىڭ جالپى وتىرىسىندا دەپۋتاتتىق ساۋالىن جولداعان سەناتور ءالي بەكتاەۆ ايتتى, دەپ حابارلايدى Egemen.kz.
سەناتور ءالي بەكتاەۆ دەپۋتاتتىق ساۋالىندا وندىرىلگەن اۋىل شارۋاشىلىعى تەحنيكاسىنىڭ توزۋى مەن تاپشىلىعى ماسەلەلەرىنە توقتالدى. مىڭ گەكتارعا بەس تراكتور, ءۇش كومباين بولسا, ەگىستىك القاپتارىندا 65 مىڭ تراكتور مەن 43 مىڭ كومبايننىڭ از ەكەنىن ايتتى. بۇل رەتتە تەحنيكانى جاڭارتۋدىڭ جىلدىق كولەمى بۇل قارقىنمەن 4,5 پايىزدى قۇرايدى, تەك تراكتور تاپشىلىعىن تولتىرۋ مەن كومباين پاركىن جاڭارتۋعا 14-15 جىل قاجەت ەكەندىگىن تىلگە تيەك ەتتى.
«ەلىمىزدە ءارتۇرلى اۋىل شارۋاشىلىعى تەحنيكالارىن شىعاراتىن 10 زاۋىت جانە وزدىگىنەن جۇرەتىن تەحنيكا شىعاراتىن سەگىز كاسىپورىن بار. 2023 جىلى بۇل كاسىپورىندار 5,4 مىڭ تراكتور, مىڭ كومباين, 17 مىڭنان استام تىركەمە جانە اسپالى مەحانيزمدەر شىعاردى. ياعني, ولار اۋىل شارۋاشىلىعى سالاسىنىڭ تراكتورلار مەن كومبايندارعا دەگەن جىلدىق قاجەتتىلىگىنىڭ 80%-ىن جانە تىركەمە تەحنيكانىڭ 30%-عا جۋىعىن وندىرەدى.
وكىنىشكە قاراي, مۇنداي تراكتورلار مەن كومبايندارداعى قازاقستاندىق قامتۋ دەڭگەيى 42-44 پايىزدى عانا قۇرايدى. نەگىزگى قوسالقى بولشەكتەر يمپورتتالادى. سوندىقتان دا تۇپكىلىكتى ءونىمنىڭ باعاسى جوعارى, شارۋالار ءۇشىن قولجەتىمسىز.
سونىمەن قاتار جەڭىل اۋىل شارۋاشىلىعى تەحنيكاسى مەن جەم-شوپتىك تەحنيكانىڭ, ءشوپ جينايتىن كومبايندار مەن سەپكىشتەردىڭ باسىم بولىگى شەتەلدە شىعارىلادى. كوبىنەسە مەتالدان جاسالعان قاراپايىم تەحنولوگيانى نەگە ءبىز شىعارا المايمىز؟ قازاقستاندا وتاندىق اۋىلشارۋاشىلىق ماشينا جاساۋدى دامىتۋدىڭ جالپى مەملەكەتتىك ساياساتى بار ما؟», دەپ سۇرادى ءالي بەكتاەۆ.
سونىمەن قاتار سەناتور جاڭا اۋىلشارۋاشىلىق تەحنيكاسىن ساتىپ الۋ ءۇشىن قايتا وڭدەۋ تولەمىنىڭ قىمباتتىلىعىن اتاپ ءوتتى. بۇل شارۋالاردىڭ جاڭا تەحنيكا ساتىپ الا الماي, ەسكىرگەن تراكتورلار مەن كومباينداردى پايدالانىپ, ۇنەمى جوندەۋگە ءماجبۇر ەكەندىكتەرىن ايتتى.
«2024 جىلعى جاعداي بويىنشا ۋتيل الىمىنىڭ كولەمى ءبىر تراكتور ءۇشىن 370 000-نان 7 380 000 تەڭگە, ال ءبىر كومباين ءۇشىن 1 600 000-نان 8 300 000 تەڭگە ارالىعىن قۇرايدى. ونى تولەۋگە شاماسى كەلمەگەن ورتا جانە شاعىن شارۋاشىلىقتار جاڭا تەحنيكا الۋدى قويدى. ەسكى تەحنيكامەن ەگىس ەگەدى, ەسكى كومباينمەن استىق جينايدى. جارامسىز تەحنيكانى قوسالقى بولشەككە پايدالانادى, ال قالعان قاڭقاسىن مەتاللولومعا وتكىزىپ كۇن كورەدى. تەحنيكانى الىپ جاتقان دا, كادەگە جاراتىپ, جويىپ جاتقان دا شارۋالاردىڭ وزدەرى. سوندا نەگىزگى وپەراتور بولىپ, قارجى جيناپ وتىرعان «جاسىل دامۋ» مەكەمەسىنىڭ ۇلەسى نەدە؟ جاڭا تەحنيكا ءۇشىن ەسكىرمەي جاتىپ, كادەگە جاراتۋ تولەمىن الۋ ەشقانداي لوگيكاعا سىيمايتىن نارسە ەمەس پە؟», دەدى بەكتاەۆ دەپۋتاتتىق ساۋالىندا.
قىرمىزى جۇماعاليقىزى,
ەۇۋ ستۋدەنتى