قوستانايداعى ىبىراي التىنسارين مەموريالدىق مۇراجايىندا ءبىلىم بەرۋ سالاسىنىڭ ۇزدىگى, قوعام قايراتكەرى مىرزاحمەت ءشايحيندى ەسكە الۋعا ارنالعان تاعىلىمدى كەزدەسۋ ءوتتى. وعان كەزىندە ۇستازدىڭ ءتالىم-تاربيەسىن كورگەن زيالى قاۋىم وكىلدەرى, عالىمدار مەن مۇعالىمدەر, وقۋشىلار قاتىستى.
تىڭ يگەرۋ جىلدارىنان بەرى قارايعى كەزەڭدە ۇلت تىلىندە ءبىلىم الۋعا ىنتالى تالاي قازاق بالاسىنا التىن بەسىك بولعان قارا شاڭىراق – قازىرگى ىبىراي التىنسارين اتىنداعى مەكتەپ-ينتەرناتقا بيىل 140 جىل تولىپ وتىر. ءبىلىم ورداسىنىڭ ىبىراي سالدىرعان ەسكى عيماراتىن 1969 جىلى قالالىق اتقارۋ كوميتەتى بۇزدىرىپ تاستاعان. مەكتەپ عيماراتىنىڭ بۇزىلۋىنا قارسى بولعان قازاق زيالىلارىنىڭ باسىندا مىرزاحمەت شايحين تۇرعانىن ايتا كەتۋ كەرەك. بىراق قايراتكەر تۇلعانىڭ وزىنە ايىپ تاعىلىپ, جاڭالىققا ۇمتىلىسى جوق, ەسكى كوزقاراستىڭ ادامى رەتىندە پارتيا سوگىسىنە ىلىگەدى.
كەش بارىسىندا پارتيالىق وكتەمدىك بەلەڭ الىپ تۇرعان قيىن كەزەڭدە ىبىراي مەكتەبىن قىزعىشتاي قورىپ, ۇلت رۋحانياتىنىڭ جوقشىسى بولا بىلگەن كۇرەسكەر تۇلعا جايىندا كوپتەگەن ونەگەلى ەستەلىك ايتىلدى.
«مەكتەپكە 1960 جىلى عانا ىبىرايدىڭ ەسىمى بەرىلدى. ىبىراي ەسىمىنىڭ بەرىلۋىنە اعارتۋشى اتىنداعى مەكتەپتە ۇزاقجىلدار ابىرويلى قىزمەت ەتكەن اياۋلى ۇستاز مىرزاحمەت ءشايحيننىڭ قوسقان ۇلەسى زور. 1961 جىلى قوستاناي وبلىسىندا العاشقىلاردىڭ ءبىرى بولىپ ى.التىنسارين اتىنداعى №1 مەكتەپ-ينتەرنات بولىپ قايتا قۇرىلدى. تىڭ كوتەرۋ كەزىندە ەسكى مەكتەپتەگى ەكى قاباتتى جاتاعىمىزدى قالا باسشىلىعى ورىس مەكتەبىنە بەرىپ جىبەردى. سول سولاقاي شەشىمگە جالعىز ءوزى قارسى شىققان دا وسى مىرزاحمەت شايحين اعامىز ەدى. ۇستازىمىز قازىرگى «ەگەمەن قازاقستان» گازەتىنە «ىبىراي اشقان مەكتەپ نەگە جابىلادى؟» دەگەن ماقالا بەردى. گازەت رەداكتسياسى دا اعايدىڭ پىكىرىن قولداپ, قوسىمشا پىكىر جاريالاعان ەدى. بىراق نە كەرەك, جەرگىلىكتى باسشىلار ءتۇرلى جەلەۋ تاۋىپ, ۇستازىمىزدى مەكتەپتەن كەتۋگە ءماجبۇر ەتتى. مىرزاحمەت جابەت ۇلى ءوز وتانىن شىن سۇيگەن ابىرويلى ازامات رەتىندە ونەگەلى ىسىمەن ەل ەسىندە قالدى. قازىر تاريح, ۋاقىت ءبىزدىڭ پايدامىزعا شەشىلگەنىنە ءتاۋبا دەيمىن. ءسۇرىلىپ كەتكەن ءبىلىم عيماراتىنىڭ جانىندا ىبىراي اتامىزدىڭ اتىندا مەكتەپ تە بار, مۇندا دارىندى بالالار ءبىلىم الادى», دەيدى ارداگەر ۇستاز, مىرزاحمەت ءشايحيننىڭ شاكىرتى بەگەن كوپەش.
دارىندى بالالارعا ارنالعان ىبىراي مەكتەبىنىڭ وقۋشىلارى كەش قوناقتارىن مىرزاحمەت ءشايحيننىڭ ءومىرى مەن ۇستازدىق قىزمەتىنە ارنالعان عىلىمي جوبالارىمەن تانىستىردى.
ءىس-شارادان كەيىن مۋزەي قىزمەتكەرلەرى مەن ەسكە الۋ كەشىنە قاتىسۋشىلار مىرزاحمەت ءشايحيننىڭ باسىنا بارىپ, ارنايى قۇران باعىشتادى.
قوستاناي وبلىسى