بەس جىلدان كەيىن ەلدە بىرنەشە ماماندىق يەلەرىنە سۇرانىس كۇرت ارتۋى مۇمكىن. ساراپشىلار 2024-2030 جىلدارعا ارنالعان ورتامەرزىمدى بولجام جاساپ, مەملەكەتكە اسا قاجەت بولاتىن 25 ماماندىق توبىن تۇزگەن.
ەڭبەك رەسۋرستارىن دامىتۋ ورتالىعىنىڭ (ەردو) ساراپشى ماماندارى بىلىكتى كادرلارعا دەگەن سۇرانىستى ەكشەي كەلە, بەسجىلدىقتا زارۋلىگى ايقىن بىلىنەتىن 25 ماماندىقتى اتادى. ەسەپشىلەر (93 مىڭ ادام), كۇزەتشى, ينكاسساتور (77 مىڭ), دۇكەن ساتۋشىلارى (77 مىڭ), كولىك جۇرگىزۋشىلەرى (44 مىڭ), الەۋمەتتىك عىلىمدار مەكتەپ مۇعالىمدەرى (35 مىڭ), كۇتىم بويىنشا ورتاشا مەديتسينالىق پەرسونال (33 مىڭ), بالاباقشا تاربيەشىلەرى (32 مىڭ), جاراتىلىستانۋ عىلىمدارى بويىنشا ورتا مەكتەپ مۇعالىمدەرى (31 مىڭ), جالپى بەيىندى كەڭسە قىزمەتكەرلەرى (30 مىڭ), باستاۋىش سىنىپ مۇعالىمدەرى (26 مىڭ) الدىڭعى وندىقتا تۇر. بۇعان قوسا مەكەمە, ۇيىم, كاسىپورىنداردىڭ باسشىسى لاۋازىمىنا دا جەتەكشى جەتىسپەۋشىلىگى سەزىلۋى مۇمكىن. جىلجىمايتىن م ۇلىك اگەنتتەرى, جۇك كولىگىن جانە اۆتوبۋس جۇرگىزۋشىلەرى, تاكسي قىزمەتىن ۇسىنۋشىلار, اسپاز, قۇرىلىس سالاسىنداعى ارلەۋشى, سانتەحنيك تە تاپتىرمايتىن مامان يەسى اتانباق.
بازالىق ستسەناري بويىنشا جالدامالى جۇمىس كۇشىنە زارۋلىك تە كۇشەيەدى. ماماندار 7 جىلدىڭ ىشىندە وپتيميستىك ولشەممەن العاندا كادرلارعا دەگەن قوعامنىڭ سۇرانىسى كۇرت ارتىپ, 2,2 ميلليون ادامعا جەتۋى مۇمكىن دەگەن بايلام جاسايدى. ال پەسسيميستىك ستسەناري بويىنشا 1,2 ميلليون ادام بولۋى مۇمكىن. ۋربانيزاتسيا ءۇش مەگاپوليس – الماتى, استانا, شىمكەنت قالالارىندا قارقىندى جۇرەتىندىكتەن دە جالدامالى جۇمىسكەرلەردىڭ قاجەتتىلىگى ەسەلەپ ارتىپ, رەسپۋبليكالىق كورسەتكىشتىڭ 26%-ىنا جەتەدى دەپ بولجانىپ وتىر. ورتالىق پەن شىعىس جانە سولتۇستىك وڭىرلەردە جۇمىس كۇشىنە سۇرانىس باسقا وبلىستارمەن سالىستىرعاندا ايتارلىقتاي تومەن بولماق. ەڭبەك رەسۋرستارىن دامىتۋ ورتالىعىنىڭ ديرەكتورى دميتري شۋمەكوۆ جالدامالى جۇمىسكەرلەرگە دەگەن سۇرانىس 2027 جىلى كۇرت ارتىپ, بولجامدى قاجەتتىلىك 285 مىڭ ادامعا جەتەدى دەگەن پىكىر ايتادى. ال 2030 جىلى سۇرانىسقا يە كادرلار 288 مىڭ ادامعا كوبەيمەك. قوعامدىق قىزمەت سەكتورىندا جالدامالى جۇمىسكەرلەرگە سۇرانىس ءبىلىم بەرۋ, دەنساۋلىق ساقتاۋ, مەملەكەتتىك باسقارۋ سالاسىندا ەسەلەپ ارتىپ, 248 مىڭ ادامنان 641 مىڭ ادامعا جەتۋى مۇمكىن. سونداي-اق تاۋارلاردى تاسىمالداۋ, تاراتۋ ورىسىندە جۇمىسشىلارعا سۇرانىس جوعارى بولادى. اقپارات جانە بايلانىس, قارجى سەكتورى, ساقتاندىرۋ, جىلجىمايتىن م ۇلىك وپەراتسيالارى, كاسىپتىك جانە عىلىمي قىزمەت, اكىمشىلىك ماماندارىنا دا سۇرانىس ۇلعايادى. ونەركاسىپ, قۇرىلىس, اۋىل شارۋاشىلىعى سىندى باعىتتاردا دا جۇمىس كۇشىنىڭ قاجەتتىلىگى ايقىن اڭعارىلادى.