الماتى قالاسىنىڭ اكىمدىگى تۇرعىنداردان بەلگىلى ونەر قايراتكەرلەرى: ءانشى ەرمەك سەركەباەۆ, كومپوزيتور ەسكەندىر حاسانعاليەۆ, اكتەرلەر يۋري پومەرانتسەۆ پەن ۆلاديمير تولوكوننيكوۆ اتىنا كوشە بەرۋ تۋرالى ۇسىنىس تۇسكەنىن حابارلادى, دەپ جازادى Egemen.kz.
قالالىق ءماسليحات تۇرعىنداردىڭ سۇرانىسىن ەسكەرىپ, شەشىمدەرىنىڭ جوباسىن جاريالادى.
«بوستاندىق اۋدانى يۋ.گاگارين داڭعىلىنىڭ ك.تيميريازەۆ كوشەسىنەن ءال-فارابي داڭعىلىنا دەيىنگى بولىگىنە ەرمەك سەركەباەۆ داڭعىلى, اۋەزوۆ اۋدانى يۋبيلەينايا كوشەسىنە ۆلاديمير تولوكوننيكوۆ اتىن بەرۋ جوسپارلانعان. ەسكەندىر حاسانعاليەۆتىڭ ەسىمىن تۇركسىب اۋدانىنىڭ «جاس قانات» شاعىن اۋدانىنداعى اتاۋى جوق كوشەگە بەرۋ كوزدەلدى, ال يۋري پومەرانتسەۆتىڭ ەسىمىمەن قالانىڭ بوستاندىق اۋدانىنداعى اتاۋى جوق كوشە اتالادى», دەلىنگەن الماتى قالالىق ءماسليحات جوباسىندا.
شەشىم جوباسى رەسپۋبليكالىق ونوماستيكا كوميسسياسىنىڭ قاراۋىنا جىبەرىلەدى.