ەستەتيكالىق گيمناستيكا – ەلىمىزدە ەندى عانا دامىپ كەلە جاتقان سپورت ءتۇرى, كوركەم گيمناستيكاعا ۇقساس بولعانىمەن, وزىندىك ەرەكشەلىكتەرى بار. بىرىنشىدەن, سايىس بارىسىندا ەشقانداي قۇرال قولدانىلمايدى. ەكىنشىدەن, توپتىق سايىس بولعاندىقتان, كوماندادا كەمى 6 ادام ونەر كورسەتەدى. ۇشىنشىدەن, بۇل سپورت تۇرىمەن اينالىسۋ ءۇشىن قاتتى تالاپ قويىلمايدى ءارى كوركەم گيمناستيكاعا قاراعاندا ۇزاق مەرزىمدە اينالىسۋعا بولادى. ەلوردادا توپتىق ەستەتيكالىق گيمناستيكادان ەل چەمپيوناتى باستالدى. بۇل تۋرالى استانا قالاسىنىڭ دەنە شىنىقتىرۋ جانە سپورت باسقارماسىنان ءمالىم بولدى, دەپ حابارلايدى Egemen.kz.
«قازاقستان چەمپيوناتى جىلىنا ءبىر مارتە ۇيىمداستىرىلادى. بيىل 8 وبلىستان سپورتشىلار قاتىسىپ جاتىر. بىلتىر 5 وبلىستىڭ سپورتشىلارى كەلگەن, بيىل قاتىسۋشىلار قاتارى ارتتى. تۋرنيردە ۇزاق باعدارلاما بويىنشا جاس ەرەكشەلىكتەرىنە قاراي 260 ادام جۇلدەگە تالاسىپ جاتىر. قىسقا باعدارلاما 1,5 مينۋتتى قامتىسا, ۇزاق باعدارلاما 3,5 مينۋتقا دەيىن جالعاسادى. ءتۋرنيردىڭ ناتيجەسىندە كۇزدە گونكونگتە وتەتىن ازيا چەمپيوناتىنا باراتىن ۇزدىكتەر ىرىكتەلەدى», دەدى جارىستىڭ باس تورەشىسى زايرا جاقىپوۆا. ايتا كەتسەك, ەستەتيكالىق گيمناستيكادان قازاقستان قۇراماسى 2019 جىلدان بەرى الەم چەمپيوناتىنا تۇراقتى تۇردە قاتىسىپ كەلەدى. 2022 جىلى اۋسترياداعى جاھاندىق دودادا كوماندالىق سايىس بويىنشا قولا جۇلدەگە يە بولسا, 2023 جىلى الماتى قالاسىندا 16 مەملەكەتتىڭ قاتىسۋىمەن وتكەن الەمدىك باسەكەدە جاسوسپىرىمدەر ساناتىندا استانا قالاسىنىڭ «سامۇرىق» كومانداسى ءبىرىنشى رەت قولا جۇلدەگەر اتانعان ەدى. ەستەتيكالىق گيمناستيكاعا قاتىساتىندار كوركەم گيمناستيكانىڭ ەلەمەنتتەرىن عانا ەمەس, سپورتتىق گيمناستيكا, بي جاعىنان دا شەبەرلىكتەرىن شىڭداي الادى.