كوكبازاردىڭ ارتىنداعى ساۋدا الاڭىندا ءتۇرلى جەمىس اعاشتارىنىڭ كوشەتتەرى ساتىلا باستاعان شاق. مامىر مەرەكەلەرىنەن سوڭ بۇل جەر قىزاناق, بۇرىش, باكلاجان ءتارىزدى كوكونىس كوشەتتەرى مەن سان الۋان گۇلگە تولىپ كەتەدى. بازاردىڭ ورتالىق عيماراتىنان شىققان ادامنىڭ ءبارى وسى جەرمەن وتەدى. كەرەگىمدى الىپ سىرتقا شىعىپ بارا جاتىپ, كوشەت ساتۋشىلاردان وقشاۋىراق وتىرعان قاريانى كوزىم شالىپ قالدى. ءوتىپ كەتىپ, قايتا اينالىپ كەلدىم. الدىنداعى قاعاز قوراپتىڭ ءىشى-سىرتىنا شولاق ساپتى توپىراق قوپسىتقىش, ءشوپ وتاعىش, شاعىن كۇرەك-كەتپەن سياقتى باقشا كۇتىمىنە تاپتىرمايتىن شاعىن دۇنيەلەردى قاپتاتىپ قويىپتى.
ءجون سۇراسا كەلە قاريانىڭ 88 جاستا ەكەنىن, قالاعا وسىدان ءبىراز جىل بۇرىن فەدوروۆ اۋدانىنا قاراستى ۋكراين اۋىلىنان كوشىپ كەلگەنىن, كوپ جىل اۋىل شارۋاشىلىعى سالاسىندا جۇمىس ىستەگەنىن, زەينەت دەمالىسىنا شىققالى تەمىر كەسىپ, ۇستالىقتى كاسىپ ەتىپ جۇرگەنىن بىلدىك. الدىنداعى جۇرتقا كەرەكتىڭ ءبارىن قىستاي دايىنداپ الادى دا, كوكتەمدە ساتۋعا شىعارادى ەكەن.
«اكەمنىڭ قويعان اتى – عينايات, ال جۇرت قازتاي دەپ قانا بىلەدى. تەگىم – نۇرپەيىسوۆ. وسى جاسقا دەيىن ىستەمەگەن جۇمىسىم جوق, شىراعىم. ساناساڭ, ون ساۋساعىڭ جەتپەيدى. بۇزاۋ باقتىم, بۇقا باقتىم, جىلقى دا باعىپ كوردىم, ەسەپشى بولىپ ىستەدىم, تراكتور, اۆتوكولىك جۇرگىزدىم, گاراج مەڭگەرۋشىسى, گاراج مەحانيگى, جىلقى زاۋىتىنىڭ مەحانيگى بولدىم. جاسىم قازىر 88-دە, 60-تا زەينەتكە شىقتىم. سوندا دا ءالى دامىل كورگەن جوقپىن. ۇيدە وتىرىپ بىردەڭە ىستەسەم كىشكەنە كوڭىلىم جايلانىپ قالادى. ال جاتسام اۋىرىپ قالامىن. مىنانىڭ ءبارىن قىس بويى جاساپ شىقتىم. ءبارىن ساياجايعا الىپ جاتىر. ءبىر ماۋسىمدا 500-600-ءى كەتىپ قالادى. ارقايسىسىن 1,5 مىڭنان ەسەپتەپ كور, 900 مىڭ تەڭگە بولادى. مۇنىڭ ءبارى – ارادان ىستەلگەن وتە ساپالى دۇنيەلەر. جاي تەمىر ەمەس. تاسقا ۇرساڭ دا ءجۇزى مايىرىلمايدى. مەنى جارتى قوستاناي بىلەدى. جۇرتتار ادەيى ىزدەپ كەلىپ الادى», دەيدى اقساقال.
عينايات قاريا قىستاي ۇستالىق ەتەدى ەكەن. قالاداعى مەتالل قابىلداۋ ورىندارىنان ەسكى ارالاردى ساتىپ الادى دا, ۇيگە اكەپ كەسىپ-كەسىپ ءارامشوپ وتاعىش جاسايدى. مىسالى, ەكى كىسىلىك ءبىر قول ارادان 50-60 ءشوپ وتاعىشتىڭ باسى شىعادى ەكەن. سونىڭ ءبارىن اقىرىنداپ شەتىنەن ەگەپ, قايراپ, دانەكەرلەپ, ساپتاپ قويادى. ال كوكتەمدە بازارعا شىعىپ, ماۋسىمنىڭ جيىرماسىنا دەيىن تۋرا ەكى اي وتىرادى.
«مەنىڭ تاۋارىم «سكلادسكوي» بازارىنداعى قاڭىلتىردان ىستەگەن قىتايدىڭ زاتتارىنان اناعۇرلىم ساپالى جانە كوپ ارزان. سوندىقتان جۇرت باعامدى دا, تاۋارىمدى دا ماقتاپ الادى, بىلەدى وزدەرى. ۇلكەن كەتپەن ىستەمەيمىن, اۋىر نارسە. ماعان وسىلار جەتىپ جاتىر. جۇرت راحمەتىن ايتىپ كەتەدى. قولىم ءالى دامىل كورگەن جوق, 13 جاسىمنان ەڭبەككە ارالاستىم. ءوزىڭ ساناپ كور, 75 جىل بولىپتى جۇمىس ىستەگەنىمە. اللاعا شۇكىر, سونىڭ ارقاسىندا دەنساۋلىعىم دا كىشكەنە جاقسى. بىراق كوز قالىپ بارادى, قۇلاق ءبىتتى. كارىلىككە قارسى ەڭ پايدالى ءدارى – ەڭبەك», دەيدى ۇستا.
عينايات قاريا باۋ-باقشا قۇرالدارىن تەك اسىل تەمىردەن عانا جاسايدى. سوندىقتان ۇستانىڭ قولىنان شىققان وتكىر زاتتاردىڭ ءجۇزى وڭايلىقپەن مۇقالا قويمايدى. اسىرەسە كۇز كەلىپ, كۇن سۋىتقانشا باۋ-باقشادان شىقپايتىن زەينەتكەرلەر مەن ايەل ادامدارعا اسا قولايلى. وسىنى بىلەتىن ءبىراز جۇرت قارت ۇستانى ادەيى ىزدەپ كەلىپ, ارنايى تاپسىرىس بەرىپ وزدەرىنە كەرەك قۇرالدىڭ سىزباسىنا دەيىن ۇستاتىپ كەتىپ جاتادى.
«شىراعىم, دەنساۋلىققا پايدالى بولعان سوڭ ءجۇرمىن. جاتسام جاتىپ قالامىن. كۇنىڭ كىسىگە قاراماسىن, كۇنى كىسىگە قاراعان ادامنان اللا تەرىس اينالادى. ايتپەسە, اقشا تاپپاي وتىرعان شال ەمەسپىن, مەملەكەت زەينەتاقىسىن بەرىپ, ءوزى اسىراپ جاتىر. ءۇش بالام جۇمىس ىستەيدى, نەمەرەلەرىم بار, تاۋبە. ەلىمىز تىنىش, جۇرتىمىز امان بولسا, ءبىزدىڭ تىلەگىمىز – سول», دەيدى قاريا.
قوستاناي وبلىسى