پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ استانادا دۇنيەجۇزىلىك بانكتىڭ (دب) جانە حالىقارالىق قارجى كورپوراتسياسىنىڭ (حقك) وكىلدەرىمەن كەزدەستى.
كەزدەسۋگە دب ورتالىق ازيا بويىنشا وڭىرلىك ديرەكتورى تاتيانا پروسكۋرياكوۆا, دۇنيەجۇزىلىك بانكتىڭ قر-داعى تۇراقتى وكىلى اندرەي ميحنەۆ, قازاقستان, قىرعىزستان, تاجىكستان بويىنشا حقك وڭىرلىك مەنەدجەرى زافار حاشيموۆ جانە حقك-نىڭ قازاقستانداعى وكىلدىگىنىڭ باسشىسى ەكاتەرينا بەندجامين قاتىستى.
تاراپتار ەكولوگيالىق جوبالارعا بولىنگەن بۇرىن قارجىلاندىرىلعان ينۆەستيتسيالىق جوبالار مەن گرانتتاردىڭ ىسكە اسىرىلۋ بارىسىن, سونداي-اق ىنتىماقتاستىقتىڭ ىقتيمال جاڭا باعىتتارىن تالقىلادى.
نۇرلان بايبازاروۆ دۇنيەجۇزىلىك بانكتىڭ قازاقستان اتىنان باسقارۋشىسى رەتىندە ۇيىممەن ودان ءارى جۇمىس ىستەۋدە مەملەكەتتىك-جەكەشەلىك ارىپتەستىكتى دامىتۋ جانە ينفراقۇرىلىمعا ينۆەستيتسيالار تارتۋ ماسەلەلەرىنە ەرەكشە نازار اۋدارۋعا نيەتتى ەكەنىن اتاپ ءوتتى. ول سونداي-اق ەل ۇكىمەتىن كونسۋلتاتسيالىق قولداۋ شەڭبەرىندە دۇنيەجۇزىلىك بانك ىسكە اسىراتىن بىرلەسكەن ەكونوميكالىق زەرتتەۋلەر باعدارلاماسىن جالعاستىرۋدىڭ ماڭىزدىلىعىنا توقتالدى.
دۇنيەجۇزىلىك بانك پەن حقك وكىلدەرى ءوز تاراپىنان ورنىقتى ءارى ينكليۋزيۆتى ەكونوميكانى دامىتۋعا, ەكولوگيالىق جاعدايدى جاقسارتۋعا باعىتتالعان ۇكىمەتتىڭ ءىس-قيمىلىنا قولداۋ ءبىلدىرىپ, وسى باعىتتارداعى جوبالاردى قاراۋعا دايىن ەكەندەرىن حابارلادى. سونداي-اق قازاقستاندى ورتالىق ازيا ءۇشىن CAWEP سۋ-ەنەرگەتيكالىق باعدارلاماسىنا بەلسەندى قاتىسۋعا شاقىردى. اتالعان باعدارلاما وزگەرمەلى كليمات جاعدايىندا ءوڭىردىڭ سۋ-ەنەرگەتيكالىق قاۋىپسىزدىگىن ارتتىرۋ ءۇشىن جاعداي جاساۋعا باعىتتالعان.
دۇنيەجۇزىلىك بانك توبى تۇرمىستىق قالدىقتاردى قايتا وڭدەۋ, ينفراقۇرىلىمدى قايتا قۇرۋ, اۋىل شارۋاشىلىعىن, سۋ جانە ەنەرگەتيكا سالالارىن دامىتۋ, ارال تەڭىزىن قالپىنا كەلتىرۋ, عىلىم مەن ءبىلىم بەرۋدى دامىتۋ جونىندەگى جوبالاردى قارجىلاندىرۋعا مۇددەلى. ەلىمىز ءۇشىن قيىن كەزەڭدە گرانتتىق قولداۋ رەتىندە اۋقىمدى سۋ تاسقىنىنان كەلتىرىلگەن زالالدى باعالاۋدى جۇرگىزۋ ۇسىنىلدى.
نۇرلان بايبازاروۆ قازاقستان ەلدىڭ الەۋمەتتىك-ەكونوميكالىق دامۋىنا ىقپال ەتەتىن دۇنيەجۇزىلىك بانك توبىمەن ارىپتەستىككە ۇلكەن ءمان بەرەتىنىن ايتتى. نەعۇرلىم ءتيىمدى ءوزارا ءىس-قيمىل جاساۋ ءۇشىن قازاقستاندىق تاراپ قولدا بار بيۋروكراتيالىق كەدەرگىلەردى جويۋعا نيەتتى. ماسەلەن, كۆازيمەملەكەتتىك كومپانيالار ءۇشىن حالىقارالىق قارجىلاندىرۋعا قول جەتكىزۋ كەزىندە قارسى كەپىلدىكتەر بەرۋ جونىندەگى تالاپ الىنىپ تاستالماق.
«دۇنيەجۇزىلىك بانك توبى – 30 جىلدان استام ۋاقىت بويى ءبىزدىڭ ەلىمىز ءۇشىن ماڭىزدى ستراتەگيالىق سەرىكتەستەردىڭ ءبىرى ءارى ەڭ ءىرى جەكە كاپيتال كوزى. ءبىز سەرىكتەستىكتىڭ قالىپتاسقان داستۇرلەرىن ساقتاپ, جاڭا بىرلەسكەن جوبالاردى دامىتۋعا نيەتتىمىز», دەپ ءسوزىن تۇيىندەدى ۆيتسە-پرەمەر.