قىتاي عالىمدارى روبوتتاردىڭ ءجۇرىس-تۇرىسى مەن سىرت كەلبەتىن بارىنشا ادامعا ۇقساتىپ جاتىر.
جاھاندى دۇرلىكتىرگەن جاساندى ينتەللەكتىنىڭ كەرنەۋى كۇننەن-كۇنگە كۇشەيىپ كەلەدى. ءوز بەتىنشە ويلاناتىن روبوتتار كوبەيىپ, بارلىق سالادا باسىمدىق العانىنا كۋا بولىپ وتىرمىز. قىتايدىڭ داليان قالاسىنداعى «بولاشاق پەن عىلىم» مۋزەيىندە EX Robot گۋمانويدتاردىڭ پروتوتيپتەرى تانىستىرىلدى. بۇل قۇلتەمىرلەردىڭ تەرىسى ارنايى مەديتسينالىق سيليكوننان جاسالىپ, دەنەسىنىڭ ۇساق-تۇيەگىنە دەيىن ادامعا ۇقساس جاسالعان. قىزىق ءارى قورقىنىشتى...
كىتاپ وقىعان وزار
«Microsoft» كومپانياسىنىڭ نەگىزىن قالاۋشى بيلل گەيتس تۋرالى تالاي كىتاپ جازىلدى. ءوزى دە بالا كۇنىنەن كىتاپتى جاتا-جاستانىپ وقىعان. ال وعان اتا-اناسى ىقپال ەتكەن.
كومپيۋتەرلەرگە دەگەن قۇمارلىعىن بايقاعان ءبيلدىڭ اتا-اناسى ونى ءبىر جىل بويى ەلەكتروندى ماشيناعا جولاتپاعان. سول ۋاقىتتا ول ۇلى ادامداردىڭ ومىرباياندارىمەن تانىسىپ, ءبىراز كىتاپتى كەمىرىپتى. بالا كۇنىنەن بويىنا سىڭگەن وسى داعدى كەيىن ونى جەتىستىككە جەتكىزدى. بيلل گەيتس ءوزىنىڭ سۇحباتىندا قازىر ءبىر جاسار نەمەرەسىنە جاساندى ينتەللەكت جانە كۆانتتىق كومپيۋتەرلەر تۋرالى كىتاپتار وقيتىنىن ايتقان. سونداي-اق ميللياردەر جىل سايىن وزىنە ۇناعان كىتاپتار ءتىزىمىن كوپشىلىككە ۇسىنىپ وتىرادى.
زيانى جوق زىمىران
قىتاي عارىش وربيتاسىنا ەكولوگيالىق تازا زىمىران تاسىعىشتى شىعاردى.
جاڭا تۇرپاتتى «CZ-6C» زىمىرانى ءساتتى ۇشىرىلدى. زىمىران قىتايدىڭ سولتۇستىگىندەگى شانسي پروۆينتسياسىنداعى تايۋان عارىش ايلاعىنان اتتاندى.
كەمە بەلگىلەنگەن نىسانعا «Haiwang-01» جانە «Zhixing-1C» جەر سەرىكتەرىن, كەڭ جولاقتى وپتيكا جانە بەينەباقىلاۋ جۇرگىزەتىن قۇرىلعىلاردى جەتكىزدى. «CZ-6C» – سۇيىق وتىنمەن جۇمىس ىستەيتىن ەكى ساتىلى زىمىران. ول شانحاي عارىش تەحنولوگيالارى اكادەمياسىندا ازىرلەنگەن. زىمىراننىڭ ۇزىندىعى 43 مەتر. كەمە جەر ماڭايىنداعى وربيتاعا 4,5 توننا جۇكتى جەتكىزە الادى.