بۇل ساۋالعا بىردەن جاۋاپ بەرۋ قيىن. دەگەنمەن كۇتىمى جاقسى بولسا ءۇي جانۋارلارى ۇزاق جاسايدى. ايتالىق, ءتورت ت ۇلىكتىڭ تورەسى – جىلقى 30 جىل تىرشىلىك ەتسە, يت 15 جىلدان ارتىق جاسامايدى ەكەن.
بىراق ءبىردى-ەكىلى ۇزاق جاساعان يتتەر بولعان. ماسەلەن, ماجارستاندا ءبىر قويشىنىڭ ءيتى 34 جىل جاساعان. الىپ جانۋارلاردىڭ ىشىندەگى ۇزاق جاسايتىنى افريكا پىلدەرى. ولار 70 جىل ءومىر سۇرەدى. سونداي-اق بەگەموت پەن مۇيىزتۇمسىق 50 جىل تىرشىلىك ەتەدى. ال مايمىلدار 40-50 جىل ءومىر سۇرسە , حايۋاناتتار ساياباعىندا ۇنەمى كۇتىمدە جۇرەتىن كروكوديل عاسىر جاسايدى. توتىقۇس 120 جىل تىرشىلىك كەشەدى. بالىقتاردىڭ ىشىندە ەۋروپالىق جىلانبالىق 90 جىل جاساسا, بەكىرە – 60, شورتان – 50 جىل ءومىر سۇرەدى.
جازۋ ماشينكاسى
تاريحي دەرەكتەردە 1864 جىلى گەرمانيالىق پەتەر ميتتەرحوفەر جاساعان ماشينكا العاشقى جازۋ ماشينكاسى سانالادى.
پەتەر ونى اعاش ۇستاسى بولعاندىقتان اعاشتان ويىپ, ادەمىلەپ جاساعان. ءبىر قىزىعى, شەبەردىڭ قولىنان شىققان وسى ماشينكانىڭ بىرەۋى ساقتالىپ قالعان. قازىر ول درەزدەننىڭ تەحنيكالىق مۋزەيىندە تۇر. سونىمەن قاتار دانيالىق ماللينگ حانسەن جاساعان جازۋ ماشينكادا العاشقىلاردىڭ ءبىرى سانالادى. بۇل – فابريكالىق ادىسپەن جاسالعان تۇڭعىش ماشينكا.
قويلار دا اقىلدى
وسىدان ءبىراز جىل بۇرىن كەمبريدج ينستيتۋتىنىڭ عالىمدارى 20-دان اسا جانۋارعا زەرتتەۋ جۇرگىزگەن.
ناتيجەسىندە, قوي ءوزىنىڭ 50 تۇقىمداسىنىڭ ءتۇرىن ەستە ساقتاي الادى دەگەن تۇجىرىم جاساعان. عالىمداردىڭ ايتۋىنشا, ءتورت ت ۇلىكتىڭ ىشىندە «جادى مىقتىسى» – وسى شوپان اتا تۇقىمى. ولار ادام بەينەسىن دە ۇمىتپايدى ەكەن.