وتاندىق كينوگەرلەر قازاقتىڭ باتىر قىزى ءاليا مولداعۇلوۆا تۋرالى كوركەم فيلم ءتۇسىرۋدى قولعا الدى. اتالعان تۋىندى ءاليا مولداعۇلوۆانىڭ 100 جىلدىعىنا, جەڭىستىڭ 80 جىلدىعىنا وراي 2025 جىلدىڭ مامىر ايىندا جارىققا شىعادى دەپ جوسپارلانعان.
مايدان دالاسىندا ەرەن ەرلىك كورسەتكەن قايسار قىزدىڭ ءومىر جولى تۋرالى دەرەكتى فيلمدەر توپتاماسى بۇعان دەيىن تۇسىرىلگەنىمەن, تولىقمەتراجدى كوركەم فيلم العاش رەت كورەرمەنگە جول تارتپاق. جوبانىڭ رەجيسسەرى ەلىمىزگە تانىمال جاس رەجيسسەر – الەن نيازبەكوۆ. ال ءفيلمنىڭ ستسەناريىن ماسكەۋلىك جۋرناليست الەنا كۋلەشوۆا ءۇش جىل كولەمىندە جازىپ شىققان.
– قازاقتىڭ باتىر قىزى ءاليا مولداعۇلوۆا مايدانعا اتتانعاندا ءجاسوسپىرىم بولدى. قولىنا قارۋ الىپ, مەرگەندىك تانىتقان ول 78 جاۋ اسكەرىنىڭ كوزىن جويىپ, كەڭەس وداعىنىڭ باتىرى اتاعىن الدى. بۇل وقيعا ماسكەۋلىك جۋرناليست الەنا كۋلەشوۆانى باۋراپ العانى سونشالىق, ول ءومىرىنىڭ ءۇش جىلىن ستسەناري جازۋعا ارنادى. ميفتەر مەن اڭىزداردان باس تارتىپ, ءومىردىڭ شىنايى شىندىعىن ىزدەدى. ءاليانى جاقسى بىلەتىن ادامداردى تاۋىپ, ولارمەن تىلدەستى, – دەيدى ءفيلمنىڭ باس پروديۋسەرى الەكساندر شۋحوۆ.
كينوگەرلەر جۇمىس بارىسىندا عىلىمي قاۋىمداستىق پەن تاريحشىلاردىڭ دا پىكىرى ەسكەرىلەتىنىن, ء«اليا» ءفيلمى سوعىس تۋرالى ەمەس, باتىلدىق پەن قايسارلىقتى بويعا سىڭىرگەن قازاق قىزىنىڭ بولمىسىنا ارنالاتىنىن اتاپ ءوتتى.
الماتىدا جۋرناليستەرمەن جۇزدەسكەن شىعارماشىلىق توپ وكىلدەرى جوباعا 900 ملن تەڭگەدەن استام قاراجات جۇمسالادى دەپ جوسپارلانعانىن, ءتۇسىرىلىم جۇمىستارى ەل اۋماعىنان بولەك, بەلارۋس ەلىندە ءوتۋى مۇمكىن ەكەنىن جەتكىزدى.
ء«بىز تەك سەنىمدى, ساراپشىلار راستايتىن جانە مويىندايتىن فاكتىلەردى قولدانۋدى ماقسات ەتتىك, ماسكەۋ اسكەري مۇراعاتتارىنداعى جۇمىس ناتيجەسىندە درامالىق ماتەريال ءۇشىن دالەلدەنگەن نەگىز جينالدى. تۋىندىدا ءاليانىڭ وسكەن ورتاسى, اتا-اناسى, تۋعان جەرى تۋرالى باياندالادى. اتالعان جوبا وسكەلەڭ ۇرپاقتى وتانشىلدىققا, ادالدىققا باۋليتىن دۇنيە بولادى دەگەن ءۇمىتىمىز مول. 9 مامىردان باستاپ جالپىۇلتتىق كاستينگ وتەدى. باستى ءرولدى سومدايتىن اكتريسانى قازاقستان تۇرعىندارى اراسىنان ىزدەستىرەمىز. ءاليانىڭ وبرازىن اشاتىن 15-16 جاستاعى, بويى 150-155 سم بولاتىن قازاق قىزىنا كەڭ اۋقىمدى اشىق كاستينگ جاريالايمىز», دەيدى رەجيسسەر الەن نيازبەكوۆ.
الماتى