مەملەكەت باسشىسىنىڭ تاپسىرماسى اياسىندا ۇكىمەت ەلىمىزدىڭ جىلۋ ەلەكتر كەشەنىن اۋقىمدى جاڭعىرتۋ بويىنشا جۇمىستاردى جالعاستىرىپ جاتىر. پرەمەر-مينيستر ولجاس بەكتەنوۆ كەنتاۋ, ريددەر, قىزىلوردا قالالارىنداعى جىلۋ كوزدەرىنە رەكونسترۋكتسيا جانە كۇردەلى جوندەۋ جۇرگىزۋ ءۇشىن ۇكىمەت رەزەرۆىنەن قاراجات ءبولۋ تۋرالى قاۋلىلارعا قول قويدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اتاپ ايتقاندا, كەنتاۋداعى جەو-5-ءتىڭ № 7, 8, 9, 10, 11 جانە 12 قازاندىقتارىن رەكونسترۋكتسيالاۋعا 9 ملرد تەڭگەدەن استام, ريددەر جىلۋ ەلەكتر ورتالىعىنىڭ تەحنولوگيالىق جابدىقتارى مەن ينفراقۇرىلىمىنا كۇردەلى جوندەۋ جۇرگىزۋگە 4,9 ملرد تەڭگە, ال قىزىلورداداعى وڭتۇستىك قازاندىقتىڭ ءۇش بۋ قازاندىعىن رەكونسترۋكتسيالاۋعا 2 ملرد تەڭگەدەن ءسال استام قاراجات ءبولىندى. وسىلايشا, اتالعان جىلۋ كوزدەرىن جاڭعىرتۋعا جالپى سوماسى شامامەن 16 ملرد تەڭگە باعىتتالدى. بۇل – كەلەسى جىلىتۋ ماۋسىمىندا اتالعان 3 قالانىڭ تۇرعىندارىن جىلۋمەن تۇراقتى قامتاماسىز ەتۋگە مۇمكىندىك بەرەدى.
جالپى ەلىمىز بويىنشا الداعى جىلىتۋ ماۋسىمىنا دايىندىق شەڭبەرىندە استانا, الماتى, شىمكەنت, اتىراۋ, وسكەمەن, قاراعاندى, اقتاۋ, تاراز, پەتروپاۆل, پاۆلودار, جەزقازعان, اقتوبە, ەكىباستۇز, ستەپنوگور, رۋدنىي, بالقاش, اقسۋ قالالارىنداعى 10 ەنەرگوبلوك پەن 55 قازاندىققا جانە 45 تۋربيناعا جوندەۋ جۇمىستارىن جۇرگىزۋ جوسپارلانىپ وتىر.
سونىمەن قاتار ينۆەستيتسيالىق كەلىسىمدەر ششەڭبەرىندە وسى كۇندەرى ەكىباستۇزداعى گرەس-1-ءدىڭ №1 ەنەرگوبلوگىندا قالپىنا كەلتىرۋ جانە اتىراۋداعى جەو مەن توپارداعى گرەس-تە تۋربواگرەگاتتاردى اۋىستىرۋ جۇمىستارى جۇرگىزىلىپ جاتىر. بۇدان بولەك, ەكىباستۇز گرەس-ىندە №3 ەنەرگوبلوك قۇرىلىسى, سونداي-اق وسكەمەندەگى جەو مەن قاراعاندىداعى جەو-3-ءتى كەڭەيتۋ بويىنشا جوبالار جوسپارلانعان.
جوعارى اتالعان بارلىق جوبانى جۇزەگە اسىرۋ ورتاق جيىنتىعى 1500 مۆت-تان استام جاڭا قۋاتتى ىسكە قوسۋعا مۇمكىندىك بەرەدى.