ىرگەتاسى وتكەن جىلدىڭ قاراشا ايىندا قالانعان «كىا» زاۋىتىنىڭ قۇرىلىسى 2025 جىلى اياقتالادى. جوبانى جۇزەگە اسىرۋعا 90 ميلليارد تەڭگەدەن استام ينۆەستيتسيا تارتىلىپ وتىر. زاۋىت جىلىنا 70 مىڭ اۆتوموبيل شىعارادى. ونىڭ 50 مىڭى ۇساق بولشەكتەردەن قۇراستىرىلادى, ياعني بۇل جەردە ءوندىرىستىڭ جەرگىلىكتى ۇلەسىنىڭ مەيلىنشە جوعارى بولۋىنا باسا ءمان بەرىلىپ وتىر. زاۋىت ىسكە قوسىلعان سوڭ, سالا ماماندارى ءۇشىن 1,5 مىڭ تۇراقتى جۇمىس ورنى اشىلادى دەگەن بولجام بار.
اسا ماڭىزدى حالىقارالىق جوبانىڭ جۇمىسىمەن تانىسۋ ماقساتىندا ەلىمىزگە ارنايى كەلگەن «Kia Corporation» باسشىسى حو سۋن سون استاناعا از كۇن ايالداپ, پرەزيدەنت قاسىم-جومارت توقاەۆتىڭ قابىلداۋىندا بولدى. كورپوراتسيا باسشىسى پرەزيدەنتكە توبىل وڭىرىندە سالىنىپ جاتقان تولىق تسيكلدى زاۋىت قۇرىلىسىنىڭ بارىسىن بايانداپ, مۇنىڭ سىرتىندا, اۆتوموبيل بولشەكتەرىن الەمدىك دەڭگەيدە ءوندىرىپ جاتقان ءىرى كومپانيالاردى ەلىمىزگە تارتۋ جۇمىستارى جۇرگىزىلىپ جاتقانىن جەتكىزدى. ناتيجەسىندە, ەلىمىزدە اۆتوكولىك بولشەكتەرىن شىعاراتىن زاۋىت سالۋ جونىندە كەلىسىمگە قول قويىلعان. پرەزيدەنت «KIA» كورپوراتسياسىنىڭ شەشىمىن قۇپتاپ, اۆتويندۋستريانى دامىتۋ ەلىمىزدىڭ ونەركاسىپ ساياساتىنىڭ نەگىزگى باعىتتارىنىڭ ءبىرى ەكەنىن, بۇل سالانى دامىتۋ ءۇشىن بىلىكتى وتاندىق مامانداردى دايارلاۋ ماسەلەسى دە ەسكەرىلۋى كەرەك ەكەنىن ايتقان.
استانادان كەيىن قوستانايعا ات باسىن تىرەگەن «Kia Corporation» پرەزيدەنتى وبلىس اكىمى قۇمار اقساقالوۆپەن كەزدەسىپ, جاڭا زاۋىتتىڭ قۇرىلىسىمەن تانىستى. كەزدەسۋ بارىسىندا جوبانىڭ قازاقستان مەن وڭتۇستىك كورەيا اراسىنداعى ىنتىماقتاستىقتى ودان ءارى نىعايتىپ, ەكى ەل ەكونوميكاسىنىڭ دامۋىنا تىڭ سەرپىن بەرەتىنى ايتىلدى. سونداي-اق جاڭا زاۋىت حالىقارالىق نارىقتا ءباسى جوعارى «Kia» برەندىنىڭ قازاقستان مەن تمد نارىعىندا كەڭ تارالۋىنا ىقپال ەتەتىن بولادى.
«Kia Corporation» پرەزيدەنتىنىڭ ايتۋىنشا, ورتا ازيا مەن تمد ەلدەرىندە اۆتوموبيل نارىعىن دامىتۋدا قوستاناي قالاسى شەشۋشى ىقپال ەتە الادى. مۇنداي مۇمكىندىككە قوستانايدا دامىعان كولىك ينفراقۇرىلىمىنىڭ بولۋى مەن توعىز جولدىڭ تورابىندا ورنالاسقان شاھاردىڭ گەوگرافيالىق جاعدايىنىڭ تيىمدىلىگى نەگىز بولا الادى. وسىناۋ كوزىر مۇمكىندىك قوستانايدى اۆتوموبيل ءوندىرىسى مەن ەكسپورت ورتالىعىنا اينالدىرۋعا ءتيىس.
جەرگىلىكتى اتقارۋشى بيلىك «كىا» زاۋىتىنا قوستانايدىڭ سولتۇستىك-باتىسىنداعى يندۋستريالىق ايماقتان 70 گەكتار جەر تەلىمىن ءبولىپ بەرگەن. قازىر مۇندا قۇرىلىس-مونتاجداۋ جۇمىستارى قىزۋ ءجۇرىپ جاتىر. قادا قاعۋ جۇمىستارى اياقتالىپ كەلەدى. كۇزگە سالىم 98 مىڭ شارشى مەترلىك عيماراتتىڭ قۇرىلىسى باستالماق. شەتەلدىك كومپانيا مەملەكەت تاراپىنان دا ۇلكەن قولداۋعا يە.
قوستاناي وبلىسىنىڭ اكىمى قۇمار اقساقالوۆ جوبانى جۇزەگە اسىرۋ بارىسىندا ادام كاپيتالىنا ەرەكشە نازار اۋدارىلاتىنىن اتاپ ءوتتى. اكىمنىڭ ايتۋىنشا, «كىا» زاۋىتىن قاجەتتى ماماندارمەن قامتاماسىز ەتۋ ماقساتىندا وڭىرلىك كوللەدجدەر مەن جوعارى وقۋ ورىندارىندا ماشينا جاساۋدىڭ 5 باعىتى بويىنشا جاڭا ماماندىقتار اشىلادى. ولاردىڭ ىشىندە ماشينا جاساۋ تەحنولوگياسى, اۆتوماتتاندىرۋ جانە باسقارۋ, ماشينالار مەن جابدىقتاردى پايدالانۋ جانە تەحنيكالىق قىزمەت كورسەتۋ, قارا مەتالل وڭدەۋ, دانەكەرلەۋ ءتارىزدى ماماندىق تۇرلەرى بار. بۇل ماماندىقتاردى يگەرەتىن ستۋدەنت-جاستاردىڭ ءبىلىم-تاجىريبەسىن ۇشتاستىرۋ ماقساتىندا وڭىردەگى بىرنەشە وقۋ ورنىن ماتەريالدىق-تەحنيكالىق تۇرعىدان جان-جاقتى جابدىقتاۋ جۇمىستارى قولعا الىنىپ جاتىر.
ينۆەستورلار ەڭ الدىمەن وندىرىسكە قولايلى ينفراقۇرىلىمنىڭ بار-جوعىنا قارايتىنى بەلگىلى. سوندىقتان جوبانى ويداعىداي ىسكە اسىرۋ ماقساتىندا زاۋىتقا بولىنگەن جەر اۋماعىن ينجەنەرلىك-كوممۋنيكاتسيالىق ينفراقۇرىلىممەن قامتاماسىز ەتۋ باعىتىندا دا اۋقىمدى جۇمىس اتقارىلىپ جاتىر. اتاپ ايتقاندا, ەلەكتر, گاز, سۋ جانە كارىز جەلىلەرى, سونداي-اق سىرتقى جارىقتاندىرۋ, بايلانىس جەلىلەرىن تارتۋ ءتارىزدى ينجەنەرلىك كوممۋنيكاتسيالاردىڭ تولىق كەشەنىن سالۋ جوسپارلانىپ وتىر.
جاڭا زاۋىتتى قاجەتتى شيكىزاتپەن قامتاماسىز ەتۋ, دايىن ءونىمدى ۇزدىكسىز تاسىمالداۋ ماقساتىندا ۇزىندىعى 4,2 شاقىرىم كىرەبەرىس تاسجول جانە تەك زاۋىت قاجەتىنە عانا پايدالانىلاتىن 5 شاقىرىمدىق تەمىرجول تورابىن سالۋ كوزدەلگەن.
قوستاناي وبلىسى