كەيىنگى كەزدە قازاقستان حالقى اسسامبلەياسى اياسىندا ۇيىمداستىرىلعان 15 مىڭنان استام ءتۇرلى فورماتتاعى ءىس-شارانىڭ بارلىعى «ادال ازامات» تۇجىرىمداماسىن جۇزەگە اسىرۋعا, ۇلتتىق بىرلىك پەن كەلىسىمدى نىعايتۋعا باعىتتالعان. باستى مىندەت – ەتنوستاردى ازاماتتىق نەگىزدە بىرىكتىرۋ.
ەلىمىزدە مىڭنان استام ەتنومادەني بىرلەستىك بار, وتكەن جىلدار ىشىندە ولار نىعايىپ, ازاماتتىق قوعامنىڭ كۇشتى ينستيتۋتىنا اينالدى. بىرلەستىك مۇشەلەرى توتەنشە جاعداي – سۋ تاسقىنىنىڭ قيىن-قىستاۋ كەزەڭىندە قۇتقارۋشىلارمەن جانە ەرىكتىلەرمەن بىرگە الدىڭعى قاتاردا بولدى. گۋمانيتارلىق كومەك جيناپ, جەتكىزۋگە ايرىقشا ۇلەس قوستى. ءبىز حالقىمىزدىڭ بىرلىگىن, باۋىرلاستىعىن ءوز كوزىمىزبەن كوردىك. بۇل بىرلىك سەنىمگە نەگىزدەلگەن جانە ءبىز قانداي دا قيىن جاعدايدا ازاماتتارىمىزدىڭ ەڭ جاقسى قاسيەتتەرىن – پاتريوتتىقتى, ىنتىماقتىقتى كورسەتەتىنىنە كۋا بولدىق. وسى سىناقتاردان سۇرىنبەي ءوتىپ, حالقىمىز بۇدان دا نىعايا تۇسەتىنىنە جانە بۇل كۇش جاسامپازدىققا جاڭا سەرپىن بەرەتىنە سەنىمدىمىن.
كەيىنگى ءبىر جىلدا قحا ۇلكەن وزگەرىستەرگە ۇشىرادى. العاش رەت رەسپۋبليكالىق قۇرىلىمداردى دۇنگەندەر, تاجىكتەر, قىرعىزدار, بەلارۋستار قۇرادى. كەلەر جىلى بۇل ينستيتۋت ءوزىنىڭ وتىز جىلدىعىن اتاپ وتەدى. وسى ورايدا ونى جاڭا جوبالارمەن اتاپ ءوتۋ قاجەت دەپ بىلەمىن.
الماتى وبلىسىندا 10 ميلليون اعاش وتىرعىزۋ, ەتنوس جاستارى ءۇشىن كاسىپتىك باعدار بەرۋ, كومپيۋتەرلىك جانە قارجىلىق ساۋاتتىلىق بويىنشا ءبىلىم بەرۋ جانە ءبىلىم بەرۋ كۋرستارىن ۇيىمداستىرۋ سياقتى باستامالاردى ىلگەرىلەتۋدى ۇسىنامىن.
يۋري شين,
قحا توراعاسىنىڭ ورىنباسارى, قازاقستان كورەيلەرى قاۋىمداستىعىنىڭ پرەزيدەنتى