جامبىل وبلىسى اكىمدىگى جاستار ساياساتى ماسەلەلەرى باسقارماسىنىڭ ۇيىمداستىرۋىمەن ءوڭىردىڭ 85 جىلدىعى اياسىندا «جىر جاۋھارى» اتتى پوەتيكالىق دۋەل وتكىزىلدى. جەرگىلىكتى جاس اقىنداردىڭ باسىن قوسقان ءىس-شارا سوڭعى بىرنەشە جىلدىڭ بەدەرىندە تۇراقتى تۇردە وتكىزىلە باستاعانى كوڭىل قۋانتادى.
ءوڭىر جاستارىنىڭ پوەزيا مەرەكەسى بىرنەشە كەزەڭدى قامتىدى. اۋەلى ءوتىنىش بىلدىرگەن وتىزعا جۋىق جاس تالانتتىڭ شىعارمالارىمەن تانىسقان قازىلار القاسى ولاردىڭ ىشىنەن ون التى مىقتىنى ىرىكتەپ, فينالدىق كەزەڭگە وتكىزدى.
قارا ولەڭنىڭ قاسيەتىن تەرەڭنەن تۇسىنگەن ون التىنىڭ باسىم كوپشىلىگىن وسال دەپ ايتا المايسىڭ. ارينە, ىشىندە ءبىردى-ەكىلى ولەڭ جازۋدى ماشىققا اينالدىرىپ, تەحنيكانى مەڭگەرىپ العاندار بار. ال قالعاندارىنىڭ جازباسىنان كوركەم ادەبيەتتىڭ ەلەمەنتتەرىن ايقىن بايقايسىڭ. وسىعان قاراپ-اق اقىن اتىمەن اتالاتىن وڭىردە پوەزيانىڭ كوركەمدىك دەڭگەيى جوعارى ەكەنىن اڭعارۋ قيىن ەمەس.
ۇزدىك ون التى اقىن باستاپقىدا سەگىز جۇپقا جۇپتالدى. وزا شاپقاندارى جۇلدەلى ورىندارعا تالاسۋ ءۇشىن ەكىنشى كەزەڭگە جولداما الدى. ولاردىڭ قاتارىندا تالاي جىر بايگەسىندە وزا شاپقان دانيار الىمقۇل, ارايلى جاقسىلىق, عاينيكەن مارالتايقىزى سەكىلدى ەسىمى ەلگە تانىس اقىندار دا بار.
پوەتيكالىق دۋەلدە ادەمى تىركەستەرىمەن, توسىن تەڭەۋلەرىمەن وزگەلەردەن دارالانعان قازاقستان جازۋشىلار وداعىنىڭ مۇشەسى دانيار الىمقۇلدىڭ ولەڭدەرى كورەرمەندى بەيجاي قالدىرعان جوق.
ء«بىر تىلەگىم بار ەدى قايتا مازداپ,
كەلەم تاعى...
قۇستار دا قايتادى ازداپ.
سەنىڭ كۇلكىڭ شاشىلعان كوشەلەردى,
مەنىڭ مۇلكىم دەپ ەلگە ايتا جازداپ»,
دەپ جىرلاعان جاس تالاپتىڭ شىعارمالارىنا قوشەمەت كورسەتكەندەر از بولعان جوق.
جاڭا فورماتتا وتكەن ءىس-شارا قورىتىندىسىندا تالاستىق اقىن دانيار الىمقۇل توپ جارسا (سىياقىسى 500 مىڭ تەڭگە), جۋالىلىق ارايلى جاقسىلىققا ەكىنشى ورىن (300 مىڭ تەڭگە) بۇيىردى. تارازدىق عاينيكەن مارالتايقىزى مەن جۇماتاي كوكسۋباي ۇزدىك ۇشتىكتەن (200 مىڭ تەڭگە) كورىندى.
«جاڭا فورماتتا وتكىزىلىپ جاتقان «جىر جاۋھارى» پوەتيكالىق دۋەلىنە قاتىسۋشىلاردىڭ قاراسى كوپ بولدى. جۇلدە قورى وتكەن جىلعا قاراعاندا قوماقتى بولعانى دا اسەر ەتكەن شىعار. ەڭ باستىسى وسى ءىس-شاراعا قاتىسقان اقىنداردىڭ دەڭگەيى ءوسىپ كەلە جاتقانى قۋانتتى», دەيدى وبلىس اكىمدىگى جاستار ساياساتى ماسەلەلەرى باسقارماسىنىڭ باسشىسى جومارت زۇلپىحار.
دۋەل فورماتىندا وتكىزىلگەن ادەبي ءىس-شارا ءوز ماقساتىنا جەتتى. ءبىر جاقسىسى, ادەبيەتكە, پوەزياعا اڭسارى اۋعان جاستاردىڭ قاتارى كوبەيىپتى. مۇنى كورەرمەن رەتىندە قاتىسقان ازاماتتاردىڭ اڭگىمەلەرىنەن دە بايقادىق. ءار قاتىسۋشىنىڭ ولەڭىنە قاتىستى بايىپتى ويلارىن ايتىپ وتىرعانداردىڭ كوبەيگەنى راسىندا دا دەڭگەيدىڭ وسكەنىن كورسەتسە كەرەك.
«بۇل – پوەزيا مەرەكەسى. الماتىدان تارازعا ورالعانداعى باستى ماقسات دۋەلدە مىندەتتى تۇردە توپ جارۋ ەمەس. قاتارلاستاردىڭ ولەڭىن تىڭداعىم كەلدى. جاڭا ەسىمدەردى كەزدەستىرسەم دەگەن نيەتپەن قاتىستىم. سول ماقساتىمنىڭ ۇدەسىنەن شىققان سياقتىمىن», دەيدى جۇلدەگەرلەردىڭ ءبىرى ارايلى جاقسىلىق.
تاراز