ۇكىمەتتە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆتىڭ توراعالىعىمەن وتكەن كەڭەستە ازاماتتاردىڭ قارجىلىق ساۋاتىن ارتتىرۋعا باعىتتالعان «قارىزسىز قوعام» جوباسىن ىسكە اسىرۋ بارىسى تالقىلاندى.
اتالعان جوبا بىلتىر مامىر ايىندا قازاقستاننىڭ 8 وڭىرىندە باستالدى. ول ازاماتتارعا بىلىكتى قارجىلىق جانە قۇقىقتىق كومەك كورسەتۋدى, حالىقتىڭ قارجىلىق ساۋاتىن ارتتىرۋدى, ازاماتتارعا بانكتىك قارىزدار مەن ميكروكرەديتتەر بويىنشا پروبلەمالىق بەرەشەكتى رەتتەۋگە جاردەمدەسۋدى كوزدەيدى.
مەملەكەت باسشىسى قاسىم-جومارت توقاەۆ «ادىلەتتى قازاقستاننىڭ ەكونوميكالىق باعدارى» جولداۋىندا جوبانىڭ اۋقىمىن كەڭەيتۋدى تاپسىردى. قازىرگى تاڭدا جوبا بارلىق وبلىستاردا, سونداي-اق رەسپۋبليكالىق ماڭىزى بار استانا, الماتى جانە شىمكەنت قالالارىندا جۇزەگە اسىرىلىپ كەلدى. جۇمىسقا 11 مەملەكەتتىك ورگان, 12 بانك, قازاقستان قارجىگەرلەر قاۋىمداستىعى مەن قازاقستاننىڭ ميكروقارجى ۇيىمدارىنىڭ قاۋىمداستىعى قوسىلدى.
«Amanat» پارتياسىنىڭ حاتشىسى ەلدار جۇماعازيەۆتىڭ ايتۋىنشا, جىل باسىنان بەرى 43 مىڭنان استام ادام وقۋدان وتكەن. ولاردىڭ 81%-ى اۋىلدار مەن اۋىلدىق وكرۋگتەردىڭ تۇرعىندارى. جوباعا قاتىسۋشىلار ساراپشىلاردىڭ دارىستەرىنەن بولەك enbek.kz پورتالىندا تىركەلۋ مەن جەكە كاسىپكەردى اشۋدان باستاپ, سوتتان تىس بانكروتتىقتى سۇيەمەلدەۋ جانە بەرەشەكتى وتەۋ كەستەسىن قۇرۋ بويىنشا كەڭەستەر الۋدا.
ء«بىز ەل ازاماتتارى اراسىنداعى پروبلەمالىق نەسيەلەردىڭ ۇلەسىن ازايتۋعا ءارى حالىقتىڭ قارىزعا بەلشەدەن باتۋىنا جول بەرمەۋگە تىرىسامىز. بۇل ەڭ ماڭىزدى الەۋمەتتىك ماسەلە جانە وسى رەتتە پارتيا شەتتە قالا المايدى. قازىر ءبىز ونىڭ سالدارىمەن كۇرەسىپ جاتىرمىز. سوندىقتان قارجىلىق ساۋاتتىلىقتى مەكتەپتەردە, كوللەدجدەردە جانە جوو-دا وقىتۋ قاجەت دەپ سانايمىز. وسىلايشا, قوعامداعى قارجىلىق مادەنيەت دەڭگەيىنىڭ ۇلەسىن ايتارلىقتاي ارتتىرا الامىز», دەپ اتاپ ءوتتى ءوز سوزىندە ە.جۇماعازيەۆ.
قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى نۇرلان ءابدىراحمانوۆ «قارىزسىز قوعام» جوباسىنا ازاماتتاردى كوبىرەك تارتۋ ءۇشىن جەرگىلىكتى اتقارۋشى ورگاندار مەن مەملەكەتتىك ورگانداردىڭ نازارىن جەرگىلىكتى جەرلەردە اقپاراتتىق جۇمىستى كۇشەيتۋ قاجەتتىلىگىنە نازار اۋداردى.
ءوز كەزەگىندە «قارىزسىز قوعام» جوباسىنىڭ جەتەكشىسى اقمارال بەكمۇرزاەۆا الەمدىك وزىق تاجىريبەلەردى ەسكەرە وتىرىپ, قارجىلىق ساۋاتتىلىق بويىنشا ادىستەمە مەن وقۋ-پراكتيكالىق ماتەريالداردى ازىرلەۋدىڭ ماڭىزدىلىعىنا توقتالدى.
ء«بىز 513 مىڭ ادامنىڭ اراسىندا ساۋالناما جۇرگىزدىك. ولاردىڭ ىشىندە مۇعالىمدەر, وقۋشىلار جانە اتا-انالار بار. ءبىلىم بەرۋ ۇدەرىسىنە قاتىسۋشىلار اراسىندا قارجىلىق ساۋاتتىلىقتى وقىتۋدىڭ ۇيىمداستىرىلۋى مەن نىسانى تۋرالى بىرىڭعاي تۇسىنىك جوق. مۇعالىمدەردىڭ 80%-ى «جاھاندىق قۇزىرەتتىلىك» ءپانى اياسىندا ساۋاتتىلىقتى وقىتۋعا ارنالعان وقۋلىقتار مەن ادەبيەتتەردىڭ جوقتىعىن ايتادى. وقۋشىلاردىڭ 60%-ى پانگە قىزىعۋشىلىق تانىتقانىمەن, ونىڭ فورماتى ءارى ماتەريالداردىڭ ۇسىنىلۋى ۇنامايتىنىن كورسەتكەن», دەدى «قارىزسىز قوعام» جوباسىنىڭ جەتەكشىسى ا.بەكمۇرزاەۆا.
وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتى توراعاسىنىڭ ورىنباسارى جومارت قارامباەۆ مۇعالىمدەرگە قارجىلىق ساۋاتتىلىق بويىنشا دا ساباق بەرۋ ءۇشىن بىلىكتىلىكتى ارتتىرۋ كۋرستارى جۇرگىزىلىپ جاتقانىن حابارلادى.
عىلىم جانە جوعارى ءبىلىم ۆيتسە-ءمينيسترى دينارا ششەگلوۆانىڭ ايتۋىنشا, «Narxoz» ۋنيۆەرسيتەتىندە بيىلدان باستاپ بارلىق جوعارى وقۋ ورىندارىندا وقىتىلاتىن «قارجىلىق ساۋاتتىلىق» كۋرسى ازىرلەنگەن. جىل سايىن شامامەن 100 مىڭ ستۋدەنت قامتىلادى, ولاردىڭ باسىم بولىگىن ءبىرىنشى كۋرس ستۋدەنتتەرى قۇرايدى.
كەڭەستى قورىتىندىلاي كەلە, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ حالىق اراسىندا «قارىزسىز قوعام» تۋرالى ءتۇسىندىرۋ جۇمىستارىنىڭ ماڭىزدىلىعىن اتاپ ءوتتى.
«جوبانىڭ پايداسىن ءبارى تۇسىنەدى. ونى ساپالى جۇزەگە اسىرۋ – ورتالىق جانە جەرگىلىكتى مەملەكەتتىك ورگانداردىڭ ورتاق مىندەتى. بارلىق جاۋاپتى ۆەدومستۆولار وقۋ-ادىستەمەلىك قۇرالدارىن ازىرلەۋ مەن جوبانى ناسيحاتتاۋعا بەلسەندى قاتىسۋى كەرەك. سونداي-اق اۋىلداردىڭ, شاعىن جانە مونوقالالاردىڭ تۇرعىندارىن كاسىپكەرلىك قىزمەتكە تارتۋ ءۇشىن قولداۋ كورسەتۋ قۇرالدارىن كەڭەيتۋ قاجەت. بۇل ءۇشىن قاجەتتى رەسۋرستار بار», دەدى پرەمەر-ءمينيستردىڭ ورىنباسارى.
نۇرلان بايبازاروۆ ورتالىق جانە جەرگىلىكتى اتقارۋشى ورگانداردىڭ باسشىلارىنا جوبانى ىسكە اسىرۋ تۋرالى حالىقتى اقپاراتتاندىرۋ جۇمىسىن كۇشەيتۋدى, جوباعا قاتىسۋشىلاردى بارىنشا تارتۋ قاجەتتىگىن ءارى وقۋشىلار مەن ستۋدەنتتەر ءۇشىن قارجىلىق ساۋاتتى ارتتىرۋ كۋرسىن ءتيىستى دەڭگەيدە ۇيىمداستىرۋدى تاپسىردى.