قىرعىزستاننىڭ بىرنەشە ايماعىندا سەل ءجۇرىپ جاتىر. وش وبلىسىندا توتەنشە جاعداي جاريالانىپ, 100-گە جۋىق ءۇيدى سۋ باستى.
قىرعىزستاننىڭ كابار اگەنتتىگى سينوپتيكتەردىڭ بولجامىنا سۇيەنىپ, تالاس, وش, جالال-اباد, باتكەن, نارىن وبلىستارىنىڭ باسىم بولىگىندە, شۋ, ىستىقكول وبلىستارىنىڭ كەي جەرلەرىندە جاڭبىر جاۋىپ, نايزاعاي ويناپ, تاۋلى ايماقتاردا قار جاۋادى دەپ حابارلايدى. تاۋ بوكتەرىندە جانە جولداردىڭ تاۋلى بولىكتەرىندە قار جاۋىپ, كوكتايعاق بولادى. باتىستان سوعاتىن جەل جىلدامدىعى 4–9 م/س جەتەدى.
توتەنشە جاعدايلار مينيسترلىگى زارداپتاردىڭ الدىن الۋ ءۇشىن ارىقتار مەن درەناجدىق ارنالاردى تازالاۋعا كەڭەس بەرەدى.
ال وش وبلىسىندا توتەنشە جاعداي رەجىمى ەنگىزىلدى. وبلىستىڭ ەلدى مەكەندەرىندەگى سەلگە بايلانىستى شۇعىل شارالار قابىلداندى. مىرزاكە – قارا – قۇلجا – الايقۋ تاسجولىنىڭ 41-ءشى شاقىرىمىندا سەل ءجۇرىپ, ءبىر ادام قازا تاپتى. لاي اعىنى ءبىر وتباسىنىڭ ءتورت ادامى كەلە جاتقان كولىكتى باسىپ قالدى. جەرگىلىكتى تۇرعىندار ەكى ايەل مەن ءبىر بالانى امان الىپ قالدى. ەر ادامدى سەل الىپ كەتكەن. قۇتقارۋشىلار ونىڭ دەنەسىن تاۋىپ, تۋىستارىنا تاپسىردى.
باۋىرلاس ەلدەگى اۋىر جاعدايعا قازاقستان ازاماتتارى الاڭداۋشىلىق تانىتىپ, الەۋمەتتىك جەلىلەر ارقىلى اماندىق تىلەپ, نيەتتەس ەكەنىن ءبىلدىرىپ جاتىر.