ارقا اسپانىنان كۇمبىرلەپ كۇمىس ولەڭ توگىلدى. سوناۋ الاتاۋ تورىنەن حالىقارالىق «الاش» ادەبي سىيلىعىنىڭ لاۋرەاتى, اقىن ابزال بوكەن 75 جاس مەرەيتويىنا وراي ەلىنە كەلىپ, ەركەلەپ قايتتى. ساكەن سەيفۋللين اتىنداعى وبلىستىق قازاق دراما تەاترىنىڭ ارتىستەرى اقىننىڭ ەل جاتقا وقيتىن «شىت كويلەك» سەكىلدى ولەڭدەرىن ەرەكشە اسەرمەن جەتكىزدى. كەنشىلەر مادەنيەت سارايىندا وتكەن «كۇن استىنان كۇمىس جامبى جاۋدىرعان» اتتى كەشتىڭ شىمىلدىعى وسىلاي ءتۇرىلدى.
وبلىس اكىمدىگىنىڭ قولداۋىمەن, مادەنيەت, ارحيۆ جانە قۇجاتتاما باسقارماسىنىڭ ۇيىمداستىرۋىمەن وتكەن جىر كەشىنىڭ بەتاشار ءسوزىن وبلىس اكىمىنىڭ ورىنباسارى ەرلان قۇسايىن ايتىپ, ايماق باسشىسى ەرماعانبەت بولەكپاەۆتىڭ قۇتتىقتاۋ حاتىن تابىستاپ, اقىنعا لايىقتى قۇرمەت كورسەتتى.
– سوناۋ 70-جىلداردىڭ جۋان ورتاسىندا جىرسۇيەر قاۋىم جاتقا وقىپ, تىڭدارمانى تامسانعان «شىت كويلەك» اتتى ليريكالىق تۋىندىسىمەن ادەبي ورتانى ەلەڭ ەتكىزگەن جاس اقىن بۇگىندە قازاق پوەزياسىنىڭ كورنەكتى وكىلىنە اينالدى. كەشەگى الاش كوسەمدەرىنىڭ التىن بەسىگى اقتوعايدا تۋىپ, عالامعا اقسوراڭنىڭ بيىگىنەن قاراعان اقىننىڭ توقىراۋىنداي ءمولدىر جىر جازباۋى مۇمكىن ەمەس ەدى. بويىنا ۇلت ۇلىلارىنىڭ رۋحى دارىعان ابزال اعامىز – تۋعان جەرىنىڭ قاسيەتتى توپىراعىن بويىنا تۇمار, جىرىنا ارقاۋ ەتىپ, تۋعان ەلىنىڭ ءانۇرانىنا اينالعان «التىن بەسىك اقتوعايىم» ءانىنىڭ ءسوزىن جازىپ, پەرزەنتتىك پارىزىن ادال اتقارعان اقىن. حالىقارالىق «الاش» ادەبي سىيلىعىنىڭ لاۋرەاتى, «قۇرمەت» وردەنىنىڭ يەگەرى ابزال اقىننىڭ سەزىم سەرگىتەر جىرلارى اقتوعاي توپىراعىندا ءبۇر جارىپ, قاراعاندىدا قاناتتانىپ, اسقاق شىڭدارى اسپانمەن تىلدەسكەن الاتاۋدا ەسەيىپ, بۇگىن ارقاعا ورالىپ وتىر. قازىنالى ولكەمىز بۇگىن قاسيەتتى قارا ولەڭنىڭ قاعباسىنداي قاستەرلى كۇيگە بولەنىپ, جىر مەرەكەسىنە كۋا بولىپ جاتىر. قۋانىشتارىڭىز قۇتتى بولسىن, ارقا جۇرتى!, – دەدى قۇتتىقتاۋىندا ەرلان بەيسەمباي ۇلى.
كەشتى ءسان-سالتاناتىمەن جۇرگىزگەن اقىن, قازاقستان جازۋشىلار وداعىنىڭ مۇشەسى ءىلياس مۇقاي قارا ولەڭدى «تاققا» وتىرعىزىپ, وعان ء«تاج» كيگىزگەن, قوعامنىڭ اششى اقيقاتىن «ۋىتتى» تىلىمەن سىناپ, ۇلتتىق پوەزيانىڭ «قاراكوگىن» ەرتتەپ مىنگەن ابزال بوكەن اقىندى ەلدىڭ ىقىلاسىمەن ورتاعا الدىرىپ, ولەڭ سۇرادى. ەل ىقىلاسىنا مەرەيى تاسىعان اقىن تەبىرەنىپ تۇرىپ ولەڭدەرىن وقىدى.
قازاقستان جازۋشىلار وداعى باسقارما توراعاسىنىڭ ورىنباسارى, اقىن باۋىرجان جاقىپ, مەملەكەتتىك سىيلىقتىڭ لاۋرەاتى, اقىن, دراماتۋرگ يران عايىپ سىي-قۇرمەتتەرىن كورسەتىپ, مەرەيتوي يەسىنە ارناعان ولەڭدەرىن وقىدى.
ال پارلامەنت ءماجىلىسىنىڭ دەپۋتاتى, اقىن قازىبەك يسا مەرەيتوي يەسىن «الاش» التىن مەدالىمەن ماراپاتتادى.
– ابزال اعانىڭ ولەڭدەرىنەن كەلىستى تىركەس, كەمەل ءپىشىن, كورنەكتى, كوركەم شەبەرلىك, كەستەلى ءسوز شەبەرىن كورىپ, ءوزىمىز دە قاتتى ريزا بولاتىنبىز. ءبىز مەكتەپ بىتىرگەن 1979 جىلى ول كىسىنىڭ «باستاۋ» دەگەن تۇڭعىش جيناعى شىقتى. «سالبۋرىن», «جالعىز جەلكەن» ولەڭدەرىن ىزدەپ ءجۇرىپ وقىدىق. «شىت كويلەك» ولەڭىمەن داڭقى قاتتى تارادى. شىت كويلەك كيگەن قىزداردىڭ ءبارى شىرايلى كورىندى. سول ولەڭنەن سوڭ, شىت كويلەكتىڭ باعاسى قىمباتتادى. تەك شىت كويلەكتىڭ ەمەس, شىنايى پوەزيانىڭ كوركەمدىك دەڭگەيى كوتەرىلدى, – دەدى قازىبەك يسا.
مارتەبەلى مەيماندار اقىن ەرجان الاشتۋعاننىڭ قولداۋىمەن «ار» باسپاسىنان جاقىندا عانا باسىلىپ شىققان, سياسى كەپپەگەن «كۇمىس كىسە» كىتابىنىڭ تۇساۋىن كەستى.
ابزال اقىننىڭ سوزىنە جازىلعان اندەرگە دە كەزەك بەرىلدى. سىرلى سازگەر قادىر بايمىرزانىڭ «قاراعاندىم» ءانىن نۇرجان جاسىمحان شىرقاسا, قازاقستاننىڭ ەڭبەك سىڭىرگەن قايرەتكەرى, ءداستۇرلى ءاننىڭ ءدۇلد ۇلى داۋرەنبەك اركەنوۆ «اڭساۋدى» اۋەلەتتى.
ودان كەيىن قۇتتىقتاۋلار لەگىن قازاقستان جازۋشىلار وداعىنىڭ حاتشىسى, اقىن داۋلەتكەرەي كاپ ۇلى, حالىقارالىق «الاش» سىيلىعىنىڭ لاۋرەاتى, اقىن-
دراماتۋرگ باقىت بەدەلحان, حالىقارالىق «قازاق ءتىلى» قوعامىنىڭ ۆيتسە-پرەزيدەنتى شەرۋباي قۇرمانباي ۇلى, بالقاشتان كەلگەن جازۋشى جانبولات باشار جالعادى. «شىت كويلەكتى» شەبەر وقيتىن شەرۋباي قۇرمانباي ۇلى مەن ابزال اقىن ومىرلەرىندە العاش رەت كەزدەسىپ, ولەڭدى وقىپ بەردى.
ابزال بوكەن اقىن عانا ەمەس, كوسەمسوزدىڭ دە شەبەرى. ءبىر كەزدەرى قاراشاڭىراق «ورتالىقتا» قىزمەت اتقاردى. «Ortalyq Qazaqstan» گازەتىنىڭ باس رەداكتورى, بەلگىلى پۋبليتسيست ەرسىن مۇسابەك «Saryarqa aqparat» مەدياحولدينگىنىڭ ديرەكتورى قايرات ءابىلدانىڭ قۇتتىقتاۋ حاتىن تابىستاپ, شاپانىن جاپتى.
قازاقستاننىڭ ەڭبەك سىڭىرگەن قايراتكەرى امانتاي جۇماشەۆ انمەن شاشۋ شاشتى. جىر مەرەكەسى اقىننىڭ تۋعان جەرىنە ارناپ جازعان «اقتوعاي – التىن بەسىگىم» انىمەن حالىقتىق «توقىراۋىن تولقىندارى» ءان-بي ءانسامبلىنىڭ ورىنداۋىندا تۇيىندەلدى.
«كۇن استىنان كۇمىس جامبى جاۋعان» جىر كەشى وسىلاي ورنەكتەلدى.
قاراعاندى وبلىسى