بۇگىن كەشكە الماتىدا كۇن رايى كۇرت بۇزىلدى. قالا اسپانىن قارا بۇلت تورلاپ, نوسەر قۇيعان. سوڭىرا بۇرشاق جاۋعان, دەپ جازادى Egemen.kz.
قالالىق توتەنشە جاعدايلار دەپارتامەنتى قالا ىشىندە بىرنەشە اعاشتىڭ قۇلاعانىن مالىمدەدى.
«قازىرگى ۋاقىتتا 109 قۇتقارۋ قىزمەتىنىڭ تەحنيكاسى مەن ماماندارى المالى اۋدانى, قازىبەك بي كوشەسى, 65-ءۇيدىڭ جانىندا اعاشتاردىڭ قۇلاۋى تۋرالى حابارلامالارعا شىقتى. سونداي-اق بوستاندىق اۋدانى, شاشكين مەن پوپوۆ كوشەسىنىڭ قيىلىسىندا جانە وربيتا-3 شاعىن اۋدانىندا اعاشتار جولعا قۇلاعان. اۋماقتى تازارتۋ جۇمىستارى جۇرگىزىلىپ جاتىر», دەلىنگەن توتەنشە جاعدايلار دەپارتامەنتىنىڭ حابارلاماسىندا.