ەلورداداعى ۇلتتىق اكادەميالىق كىتاپحانادا قالامگەر, عالىم دارحان قىدىرالىنىڭ «مۇستافا», «ابىزدار اماناتى», «تامىر», «نۇكتە فيلوسوفياسى» جانە قىرعىز تىلىندە باسىلعان «تاشقا جازىلعان تارىح» اتتى كىتاپتارى كوپشىلىككە تانىستىرىلدى. ءىس-شاراعا عالىمدار, قالامگەرلەر, زيالى قاۋىم وكىلدەرى جانە پارلامەنت دەپۋتاتتارى قاتىستى.
سەنات توراعاسى ماۋلەن اشىمباەۆ جاڭادان جارىق كورگەن ەڭبەكتەر ۇلتتىق بىرەگەيلىكتى ساقتاۋ جولىندا تاريحي ماڭىزعا يە ەكەنىن ايتتى. سونداي-اق ول اتالعان كىتاپتار تۋعان حالقىنىڭ كەمەل كەلەشەگى ءۇشىن قىزمەت ەتكەن كورنەكتى تۇلعالاردىڭ ءومىرى مەن مۇراسىن دارىپتەۋگە زور ۇلەس قوساتىنىنا نازار اۋداردى. ناقتى تاريحي دەرەكتەر مەن ارحيۆ ماتەريالدارى قامتىلعان تۋىندىلار وقىرمان قاۋىمعا ۇلت ءۇشىن باسىن بايگەگە تىككەن ساياسي قايراتكەرلەردىڭ ومىرىنە قاتىستى تىڭ مالىمەتتەر ۇسىنادى.
سونىمەن قاتار پالاتا سپيكەرى ەلدىڭ وتكەنى, بۇگىنى جانە بولاشاعى ونىڭ تاريحي مۇراسىمەن تىعىز بايلانىستى ەكەنىن اتاپ ءوتتى. سوندىقتان ۇلت شەجىرەسىن جۇيەلى زەرتتەپ, زەردەلەۋدىڭ ماڭىزى زور. مەملەكەت باسشىسىنىڭ تاريحي سانانى جاڭعىرتۋ جانە تاريحتى دارىپتەۋ باعىتىنداعى تاپسىرماسىنا سايكەس سەنات بۇل سالاعا باسا ءمان بەرىپ كەلەدى.
«پرەزيدەنت قاسىم-جومارت توقاەۆتىڭ تاپسىرماسىمەن ەلىمىزدىڭ اكادەميالىق ۇلگىدەگى جاڭا تاريحىن جازۋ ءۇشىن جۇيەلى جۇمىس جۇرگىزىلىپ كەلەدى. سوعان سايكەس وتاندىق عالىمدار مەن تاريحشىلار ەجەلگى زاماننان بۇگىنگە دەيىنگى ارالىقتى قامتيتىن جەتى تومدىق اۋقىمدى ەڭبەك ازىرلەپ جاتىر. كوپتومدىقتىڭ باستى ماقساتى – تاۋەلسىزدىك شەجىرەسىن تەرەڭ ءتۇسىنىپ, تاريحىمىزدى وبەكتيۆتى تۇردە قابىلداۋدى قالىپتاستىرۋ. مۇنىڭ ءبارى بۇگىن جارىق كورىپ وتىرعان «مۇستافا», «ابىزدار اماناتى», «تامىر», «نۇكتە فيلوسوفياسى» جانە «تاشقا جازىلعان تارىح» كىتاپتارىنىڭ نەگىزگى يدەياسىمەن ۇندەس ەكەنىن اتاپ وتكەن ءجون. ۇلت تاريحى مەن ۇلى تۇلعالارىمىزدىڭ ءومىرى تەرەڭ زەردەلەنگەن بۇل ەڭبەكتەر الداعى ۋاقىتتا مەملەكەتتىلىگىمىزدى نىعايتۋعا جانە ۇلتتىق كودىمىزدى ساقتاۋعا قىزمەت ەتەدى دەپ سەنەمىز», دەدى ماۋلەن اشىمباەۆ.
سونداي-اق ءىس-شارا بارىسىندا كورنەكتى مەملەكەت جانە قوعام قايراتكەرلەرى, زيالى قاۋىم وكىلدەرى, عالىمدار, جازۋشىلار جانە جۋرناليستەر ءسوز سويلەپ, جاڭا ەڭبەكتەردىڭ ءمانى مەن ماڭىزى تۋرالى وي ءوربىتتى.